ရန်ကုန်တိုင်း၊ ဒဂုံမြို့သစ်(တောင်ပိုင်း)မြို့နယ်ရှိ မြန်မာ့သားကောင်းအဆင့်မြင့်စစ်မှုထမ်းဟောင်းအိမ်ရာ(လေးထောင့်ကန်)၌ ဆိုလာလျှပ်စစ်ဓာတ်အားထုတ်လုပ်ရေးစီမံကိန်းတစ်ခုထည့်သွင်းဆောင်ရွက်ရန် နစက ဥက္ကဋ္ဌ၊ နိုင်ငံတော်ဝန်ကြီးချုပ်၊ ဗိုလ်ချုပ်မှူးကြီးမင်းအောင်လှိုင်မှ ယမန်နေ့ ဇန်နဝါရီ ၂၅ ရက်နံနက်ပိုင်းက ယင်း အိမ်ရာအားကြည့်ရှုစစ်ဆေးစဥ် မှာကြားခဲ့သည်။
နစကဥက္ကဋ္ဌက မြန်မာ့သားကောင်းအဆင့်မြင့်စစ်မှုထမ်းဟောင်းအိမ်ရာ(လေးထောင့်ကန်)အား စစ်မှုထမ်းဟောင်းမြို့အဖြစ် တည်ဆောက်နေခြင်းဖြစ်ပြီး ရန်ကုန်မြို့တော်ဖွံ့ဖြိုးရေးအတွက် တစ်ဖက်တစ်လမ်းမှအထောက်အကူပြုသည့် စံပြုအိမ်ရာတစ်ခုအဖြစ် ရည်မှန်းဆောင်ရွက်သွားရမည်ဟု ပြောသည်။
” အိမ်ရာအတွင်းလိုအပ်တဲ့ လျှပ်စစ်ဓာတ်အားရရှိစေဖို့အတွက် စီမံကိန်းလိုအပ်ချက်နဲ့ကိုက်ညီတဲ့ ဆိုလာလျှပ်စစ်ဓာတ်အားထုတ်လုပ်ရေးစီမံကိန်းတစ်ခုကို စနစ်တကျတွက်ချက်ပြီး ထည့်သွင်းဆောင်ရွက်ရပါမယ်။ လက်ရှိအချိန်အထိ အိမ်ရာဝန်းတစ်ခုအတွင်းမှာပဲ အိမ်ခန်းပေါင်း(၄၀၀၀) ကျော်ကိုဆောင်ရွက်ပေးနိုင်ခဲ့တာကြောင့် မြို့ငယ်တစ်မြို့လိုဖြစ်လာပါပြီ။ ဒါ့ကြောင့် လိုအပ်တာတွေဖြည့်ဆည်းပေးရပါမယ်”ဟု နစက ဥက္ကဋ္ဌက ပြောသည်။
ထို့နောက် နစက ဥက္ကဋ္ဌသည် မြန်မာ့သားကောင်း အဆင့်မြင့်စစ်မှုထမ်းဟောင်းအိမ်ရာ(လေးထောင့်ကန်)အနီး ဘုရင့်နောင်လမ်းနှင့် အမှတ်(၇)လမ်းထောင့်တွင်တည်ဆောက်နေသည့် Shopping Complex လုပ်ငန်းခွင်အားကြည့်ရှုစစ်ဆေးခဲ့သည်။
ထိုသို့ စစ်ဆေးပြီးနောက် အမှာစကားပြောကြားစဉ် Shopping Complex အား ဒဂုံတောင်ပိုင်းနေ ပြည်သူများနှင့် မြန်မာ့သားကောင်းအဆင့်မြင့်စစ်မှုထမ်းဟောင်းအိမ်ရာ(လေးထောင့်ကန်)တွင်နေထိုင်သူများ၏ လူနေမှုအဆင့်မြှင့်တင်နိုင်ရေး၊ အလုပ်အကိုင်အခွင့်အလမ်းများ ပိုမိုရရှိစေရေးအတွက် အကောင်အထည်ဖော်ဆောင်ရွက်စေခြင်းဖြစ်သည်ဟု ပြောသည်။
ထို့ကြောင့် ရေ၊ မီး စနစ်များအသုံးပြုရန်လိုအပ်သည့် လျှပ်စစ်မီးအချိန်ပြည့်ရရှိစေရေး Roof Top တွင် ဆိုလာပြားတပ်ဆင်ရန်၊ စီမံကိန်းမြေနေရာ၏ အခြားမြေလွတ်နေရာများတွင်လည်း ဆိုလာလျှပ်စစ်ဓာတ်အားပေးစနစ်တပ်ဆင်အသုံးပြုနိုင်ရန်တို့အပြင် ရေထုတ်စနစ်များကောင်းမွန်စေရေးအတွက်လည်း တွက်ချက်ဆောင်ရွက်သွားရန် နစက ဥက္ကဋ္ဌကမှာကြားခဲ့သည်။