တရုတ်နိုင်ငံသည် မြန်မာနိုင်ငံ၏ အချုပ်အခြာအာဏာနှင့် နယ်မြေတည်တံ့ခိုင်မြဲရေးကို အလေးထားလေးစားကြောင်းနှင့် မြန်မာနိုင်ငံမြောက်ပိုင်း ငြိမ်းချမ်းရေး လုပ်ငန်းစဉ်ကို မြှ င့်တင်ဖော်ဆောင်ရန် တရုတ်နိုင်ငံအနေဖြင့် တက်ကြွစွာ ပံ့ပိုးကူညီလျက်ရှိကြောင်း တရုတ်နိုင်ငံခြားရေးဝန်ကြီးဌာနပြော ရေးဆိုခွင့်ရှိသူ Mr. Guo Jiakun က ပြောသည်။
ဧပြီ (၂၂) ရက် ပြုလုပ်သည့် ပုံမှန်သတင်းစာရှင်းလင်းပွဲတွင် ရှမ်းနယ်ပြည်မြောက်ပိုင်း အခြေအနေနှင့်ပတ်သက်၍ သတင်းထောက်များ၏ မေးမြန်မှုအပေါ် ၎င်းက ပြန်လည်ပြောကြားခဲ့ခြင်းဖြစ်သည်။
တရုတ်နိုင်ငံအနဖြင့် ကူမင်းငြိမ်းချမ်းရေးတွေ့ဆုံဆွေးနွေးပွဲ လုပ်ငန်းစဉ် တိုးတက်အောင် ဆက်လက်လုပ်ဆောင်သွားမည်ဖြစ်ပြီး၊ မြန်မာနိုင်ငံ မြောက်ပိုင်းဒေသ (ရှမ်း/မြောက်) စစ်ပွဲများ ရပ်တန့်ရန်အတွက်လည်း ဆွေးနွေးပွဲများကို လုပ်ဆောင်သွားမည်ဖြစ်ကြောင်း Mr. Guo Jiakun က ပြောကြားသည်။
လက်ရှိတွင် ကူမင်းဆွေးနွေးပွဲများမှတဆင့် မြန်မာ့တပ်မတော်နှင့် ကိုးကန့်တပ်(MNDAA)တို့ အကြား အပစ်အခတ်ရပ်စဲရေး သဘောတူညီမှုရရှိထားပြီး အဆိုပါ သဘောတူညီချက်များကို အကောင်အထည်ဖော်ရန် နှစ်ဘက်၏ ပူးတွဲဖိတ်ကြားချက်အရ တရုတ်နိုင်ငံသည် ပစ်ခတ်ရပ်စဲမှု စောင့်ကြည်ရေးအဖွဲ့ကို လားရှိုးမြို့သို့ စေလွှတ်ထားကြောင်းလည်း ၎င်းက သတင်းစာရှင်းလင်းပွဲတွင် တရားဝင်ထုတ်ပြော ထားသည်။
အဆိုပါ ပစ်ခတ်ရပ်စဲမှု စောင့်ကြည်ရေးအဖွဲ့အနေဖြင့် မြန်မာ့တပ်မတော်နှင့် MNDAA တို့အကြားရှိ ပစ်ခတ်ရပ်စဲရေးအကောင်အထည်ဖော်မှုကို စောင့်ကြည်သွားမည်ဖြစ်ကြောင်းလည်း ၎င်းက ပြောကြားသည်။