မြန်မာနိုင်ငံမှ ထွက်ရှိသည့် ကုန်စည်များ တရုတ်နိုင်ငံသို့ ပိုမိုတင်ပို့နိုင်ရေး တရုတ်နိုင်ငံအစိုးရ အကောက်ခွန် အထွေထွေအုပ်ချုပ်မှု အာဏာပိုင်အဖွဲ့ (GACC)နှင့် မြန်မာနိုင်ငံ စီးပွားကူးသန်းဝန်ကြီးဌာန ပြည်ထောင်စုဝန်ကြီး ဦးအောင်နိုင်ဦး ဦးဆောင်သည့်အဖွဲ့တို့ တွေ့ဆုံဆွေးနွေးခဲ့ကြကြောင်း သိရသည်။
တရုတ်နိုင်ငံ ကူမင်းမြို့သို့ ရောက်ရှိနေသည့် ပြည်ထောင်စုဝန်ကြီး ဦးအောင်နိုင်ဦးနှင့်အဖွဲ့သည် မေလ (၂၁) ရက်က တရုတ်နိုင်ငံ အကောက်ခွန် အထွေထွေအုပ်ချုပ်မှုအာဏာပိုင်အဖွဲ့(GACC) ၏ အဖွဲ့ဝင် Mr. Zhao Zenglian နှင့် တာဝန်ရှိသူများအား တွေ့ဆုံ၍ မြန်မာနိုင်ငံမှထွက်ရှိသည့် ရေထွက်ကုန်ပစ္စည်းများ၊ လယ်ယာထွက်ကုန်ပစ္စည်းများနှင့် မွေးမြူရေးထွက်ကုန်များ တရုတ်နိုင်ငံသို့ တင်ပို့နိုင်ရန်အတွက် GACC ၏ ခွင့်ပြုချက်ရရှိရေး၊ နယ်စပ်ဂိတ်များကို နည်းပညာသုံး၍ လုပ်ငန်းများဆောင်ရွ က်နိုင်ရေးနှင့် ပြတင်းတစ်ပေါက်စနစ် (Single Window) ထူထောင်ဆောင်ရွက်နိုင်ရေး၊ နယ်စပ်ကုန်သွယ်မှု အခြေခံအဆောက်အဦများ အဆင့်မြှင့်တင်နိုင်ရေးတို့တွင် ပိုမိုပူးပေါင်းဆောင်ရွက်နိုင်ရန် ဆွေးနွေးခဲ့ကြကြောင်း သိရသည်။
ထို့အပြင် ဘိန်းအစားထိုးသီးနှံ စိုက်ပျိုးရေး၊ တန်ဖိုးမြှင့် လယ်ယာစိုက်ပျိုးရေး ထွက်ကုန်များ ထုတ်လုပ်နိုင်ရေးနှင့် စိုက်ပျိုးရေး နည်းပညာ မြှင့်တင်နိုင်ရန် ပူးပေါင်းဆောင်ရွက်ရေး၊ နှစ်နိုင်ငံကုန်သွယ်မှုတွင် လျင်မြန်ချောမွေ့စေရေးဆိုင်ရာ ကိစ္စရပ်များကို ယူနန်ပြည်နယ် ပါတီအတွင်းရေးမှူး Mr. Wang Ning နှင့် တွေ့ဆုံဆွေးနွေးခဲ့ကြကြောင်း သိရသည်။
ထို့အပြင် မြန်မာနိုင်ငံဆိုင်ရာ တရုတ်နိုင်ငံ သံအမတ်ကြီး၊ တဲဟုန်မြို့ပြည်နယ်ခွဲ ပါတီအတွင်းရေးမှူး Mr. Jiang Shan ၊ ကုန်သွယ်မှုနှင့် သက်ဆိုင်ရာဌာန ဆိုင်ရာများမှ တာဝန်ရှိသူများနှင့် တွေ့ဆုံ၍ ကုန်သွယ်မှု လျင်မြန်ချောမွေ့စေရေး၊ ကုန်သွယ်မှုဖွံ့ဖြိုးတိုးတက်ရေး၊ နယ်စပ်ဂိတ်များအကြား အခြေခံအဆောက်အဦများ မြှင့်တင်နိုင်ရေး၊ ကုန်သွယ်မှုအတွက် ဘဏ်စနစ်တိုးမြှင့် အသုံးပြုပြီး ပို့ကုန် သွင်းကုန်လုပ်ငန်းများ ဆောင်ရွက်ရေး၊ နှစ်နိုင်ငံ သဘောတူညီပြီးဖြစ်သည့် နယ်စပ်စီးပွားရေး ပူးပေါင်းဆောင်ရွက်မှုဇုန် အကောင်အထည်ဖော်ဆောင်ရွက်ရေး၊ မြန်မာ – တရုတ်နယ်စပ်ကုန်သွယ်မှု ပူးပေါင်းညှိနှိုင်းရေး ကော်မတီ အစည်းအဝေး ပုံမှန်ကျင်းပနိုင်ရေး ဆိုင်ရာကိစ္စရပ်များ၊ နှစ်နိုင်ငံအကြား တရားမဝင် ကုန်သွယ်မှုများ လျော့နည်းပပျောက်စေရေးနှင့် ခရီးသွားလုပ်ငန်းဖွံ့ဖြိုး တိုးတက်ရေးဆိုင်ရာကိစ္စရပ်များကိုလည်း ဆွေးနွေးခဲ့ကြကြောင်း သိရသည်။
ပြည်ထောင်စု ဝန်ကြီးနှင့် အဖွဲ့သည် မြန်မာနိုင်ငံဆိုင်ရာ တရုတ်ပြည်သူ့သမ္မတနိုင်ငံ သံအမတ်ကြီးနှင့်အတူ တရုတ် – မြန်မာ နယ်စပ်ဂိတ်များဖြစ်သည့် မန်ဝိန်း၊ နန်းတော်၊ဆင်ဖြူ၊ ဟိုဆောင်၊ ကျင်စန်းကျော့၊ ပန်ဆိုင်း/ကျူကုတ် နယ်စပ်ဂိတ်များသို့ သွားရောက်၍ နှစ်နိုင်ငံ နယ်စပ်ဂိတ်များမှ လူဝင်/လူထွက် လုပ်ငန်းစဉ်များဆောင်ရွက်နေမှုနှင့် ပို့ကုန်၊ သွင်းကုန် ယာဉ်အဝင်/အထွက် ရှင်းလင်းရေးလုပ်ငန်းစဉ်များကို သွားရောက်ကြည့်ရှု့ခဲ့ကြောင်း သိရသည်။
ထို့အပြင် ရွှေလီမြို့ရှိ မြန်မာ့ ကျောက်စိမ်းများအား အချောထည်ပြုလုပ်ကာ တရုတ်နိုင်ငံတစ်ဝန်းသို့ Online/ Offline ဖြင့် ဖြန့်ဖြူးရောင်းချနေသည့် ကျောက်စိမ်းရောင်းဝယ်ရေးစင်တာသို့ သွားရောက်ကြည့်ရှုခဲ့သည့်အပြင် မြန်မာနိုင်ငံမှ တင်ပို့သည့် ဆန်များအား တန်ဖိုးမြှင့်ထုတ်ကုန်အဖြစ် ထုတ်လုပ်နေသည့် လုပ်ငန်းဆောင်ရွက်မှုကို သွားရောက်ကြည့်ရှုခဲ့ကြောင်းလည်း သိရသည်။
