မြန်မာနိုင်ငံတစ်ဝှမ်းတွင် လက်နက်ကိုင်တိုက်ပွဲများဆက်လက်ဖြစ်ပွားနေသည့်အတွက် နေရပ်စွန့်ခွာရွှေ့ပြောင်းနေထိုင်သူဦးရေခန့်မှန်းခြေ ၁ ,၅၄၅ ,၀၀၀ ဦးအထိရှိလာခဲ့ပြီဖြစ်ကြောင်း ကုလသမဂ္ဂ ဒုက္ခသည်များဆိုင်ရာ မဟာမင်းကြီးရုံး UNHCR က(ဇန်နဝါရီ ၁၉) ရက်တွင် သတင်းထုတ်ပြန်ထားသည်။
ကုလသမဂ္ဂ၏ထုတ်ပြန်ချက်အရ ယခုလ ဇန်နဝါရီလ ၉ ရက်အထိ နိုင်ငံတစ်ဝှမ်းတွင်နေရပ်စွန့်ခွာရွှေ့ပြောင်းနေထိုင်သူဦးရေခန့်မှန်းခြေ ၁ ,၅၄၅ ,၀၀၀ ဦးအထိရှိလာခဲ့ပြီး ၎င်းတို့အနက်လူဦးရေ ၁,၂၁၅,၀၀၀ ဦးခန့်သည် ဖေဖော်ဝါရီလ ၁ရက်မှစ၍ အသစ်နေရပ်စွန့်ခွာနေထိုင်သူများဖြစ်သည်ဟု သိရသည်။
UNHCRနှင့် မိတ်ဖက်အဖွဲ့အစည်းများသည် အရေးပေါ်ကယ်ဆယ်ရေးပစ္စည်းအစုံအလင်ပါဝင်သော ခြင်ထောင်များ၊ ဖျာများ၊စောင်များ နှင့်ရေသိုလှောင််ပုံးများအား လူဦးရေ ၃၂၀၀ ဦးထံ ဖြန့်ဝေခဲ့သည်။
ကချင်ပြည်နယ်နှင့်ရှမ်းပြည်နယ်(မြောက်ပိုင်း)တွင်နေထိုင်သော လူဦးရေ ၁၁၇၀ ဦးထံ ယာယီအမိုးအကာများပေးအပ်ခဲ့ပြီး မိသားစု ၁၁၉၀ ကျော်မှအရေးပေါ်အမိုးအကာအကူအညီများကို လက်ခံရရှိခဲ့ကြောင်း၊ ရခိုင်ပြည်နယ်ရှိ လူဦးရေ ၁၅၀၀ကျော်ထံကိုလည်း အရေးပေါ် ကယ်ဆယ်ရေးပစ္စည်းများဖြန့်ဝေခဲ့ပြီး စုပေါင်းနေထိုင်ရာစခန်း ၂ ခုမှ မိသားစုဝင် ၅၇၈ ဦး နေထိုင်နိုင်ရန်အတွက် နေအိမ်တန်းလျားရှည် ၅၈ ခုတို့အား ပြန်လည်ပြုပြင်ဆောက်လုပ်ပေးအပ်ခဲ့ပြီး အခြားမိသားစု ၅၆ ဦးလည်း အရေးပေါ်နေအိမ်အမိုးအကာအကူအညီများပေးခဲ့ကြောင်း သတင်းထုတ်ပြန်ရာတွင် ဖော်ပြထားသည်။
ကရင်ပြည်နယ်၊ ကယားပြည်နယ်နှင့် ရှမ်းပြည်နယ် (တောင်ပိုင်း) ရှိ လူဦးရေ ၄၇၀၀၀ ဦးထံ အရေးပေါ်ကယ်ဆယ်ရေးပစ္စည်းများဖြစ်သော ဆိုလာမီးအိမ်၊ ဖျာ၊ စောင်၊ ခြင်ထောင်နှင့် အခြားလိုအပ်သောပစ္စည်းများကိုဖြန့်ဝေခဲ့ပြီး ကရင်ပြည်နယ်၊ ကယားပြည်နယ်၊ ရှမ်းပြည်နယ် (တောင်ပိုင်း) နှင့် ပဲခူးတိုင်းဒေသကြီး (အရှေ့ပိုင်း) ရှိ လူဦးရေ ၈၀၀၀ သည် အရေးပေါ်နေအိမ်အမိုးအကာအကူအညီများ လက်ခံရရှိခဲ့သည်ဟုဆိုသည်။
ထို့အပြင် အနောက်မြောက်ပိုင်းဒေသ၊ မကွေးတိုင်းဒေသကြီးရှိ ပခုက္ကူမြို့နယ်တွင် ပဋိပက္ခဒဏ်နှင့်စားနပ်ရိက္ခာပြတ်လပ်မှုခံစားလျက်ရှိသော လူဦးရေ ၁၈၀ ခန့်ထံ အရေးပေါ်ကယ်ဆယ်ရေးပစ္စည်းများဖြန့်ဝေပေးနိုင်ခဲ့သည်ဟု သိရသည်။
