မြန်မာနိုင်ငံရှိ ခရီးစဉ်ဒေသများအား ကမ္ဘာကသိရှိပြီး ပြည်ပခရီးသွားဧည့်သည်များပိုမိုတိုးတက်ဝင်ရောက်လာစေရန်ရည်ရွယ်၍ မြန်မာနိုင်ငံခရီးသွားပြပွဲ ၂၀၂၅ ကိုကျင်းပသွားမည်ဖြစ်သည်။
ထိုသို့ ကျင်းပနိုင်ရေးအတွက် ဖေဖော်ဝါရီ ၁၁ ရက်မွန်းလွဲပိုင်းက ဟိုတယ်နှင့်ခရီးသွားလာရေးဝန်ကြီးဌာန ပြည်ထောင်စုဝန်ကြီးဦးကျော်စိုးဝင်းဦးဆောင်၍ မြန်မာနိုင်ငံခရီးသွားလုပ်ငန်းအဖွဲ့ချုပ်ဥက္ကဋ္ဌနှင့် ဗဟိုအလုပ်အမှုဆောင်အဖွဲ့ဝင်များ တွေ့ဆုံခဲ့ကြသည်။
တွေ့ဆုံစဉ် ဟိုတယ်ခရီးပြည်ထောင်စုဝန်ကြီးမှ နိုင်ငံတော်အစိုးရအနေဖြင့် ခရီးသွားလုပ်ငန်း ဖွံ့ဖြိုးရေးကို အလေးအနက်ထား ပြည်တွင်းခရီး သွားလုပ်ငန်းတိုးတက်ရေးသာမက ပြည်ပခရီး သွားလုပ်ငန်းတိုးတက်ရေးအတွက်ကိုပါ အလေးထားဆောင်ရွက်သွားကြရမည်ဟု မှာကြားသည်။
ထို့ပြင် ယခုကျင်းပမည့် မြန်မာနိုင်ငံခရီးသွားပြပွဲ ၂၀၂၅ အား အာဆီယံဒေသတွင်းနိုင်ငံများမှ ဆောင်ရွက်သည့် ခရီးသွားပြပွဲများနှင့် ချိတ်ဆက်ဆောင်ရွက်နိုင်ပါက နိုင်ငံတကာကပိုမိုကျယ်ပြန့်စွာသိရှိနိုင်မည်ဖြစ်ကာ ခရီးသွားကဏ္ဍတိုးတက်ရန် ခရီးသွားလုပ်ငန်းလုပ်ကိုင်သူများအနေဖြင့် ပိုမိုအားစိုက်ကြိုးပမ်းဆောင်ရွက်ကြရမည်ဖြစ်ပြီး မြန်မာနိုင်ငံ ခရီးသွားလုပ်ငန်းဖွံ့ဖြိုးတိုးတက်ရေးအတွက် ခရီးသွားလုပ်ငန်းကဏ္ဍအတွင်း ပတ်ဝန်းကျင်ကောင်းများဖန်တီးပေးကြရန်လိုအပ်သည်ဟု ပြောကြားခဲ့သည်။
ထို့အတူ မြန်မာနိုင်ငံခရီးသွားလုပ်ငန်းအဖွဲ့ချုပ်ဥက္ကဋ္ဌ ဦးရန်ဝင်းက မြန်မာနိုင်ငံခရီးသွားပြပွဲ ၂၀၂၅ ၏ရည်ရွယ်ချက်များ၊ အာဆီယံဒေသတွင်းနိုင်ငံများနှင့် ချိတ်ဆက်ဆောင်ရွက်သွားလိုသည့်အခြေအနေနှင့် မြန်မာနိုင်ငံရှိ ခရီးစဉ်ဒေသများအား မြှင့်တင်ကြော်ငြာသွားမည့်အစီအစဉ်များကို ရှင်းလင်းတင်ပြခဲ့သည်။
ထို့ပြင် မြန်မာနိုင်ငံခရီးသွားလုပ်ငန်းအဖွဲ့ချုပ် ပြပွဲ၊ ပြိုင်ပွဲ ကျင်းပရေးလုပ်ငန်းကော်မတီ ဥက္ကဋ္ဌ ဦးမင်းသိန်း၊ မြန်မာနိုင်ငံခရီးသွားလုပ်ငန်းအဖွဲ့ချုပ်အကြီးတန်း နည်းပညာအကြံပေးဒေါ်ကြည်ကြည်အေးနှင့် Myanmar Tourism Master Plan (2026 – 2030)ရေးဆွဲရေးဆိုင်ရာ အဖွဲ့ဝင်များက သက်ဆိုင်ရာကဏ္ဍအလိုက် ရှင်းလင်းတင်ပြခဲ့ကြသည်။