စစ်ကိုင်းတိုင်းဒေသကြီး၊ မုံရွာမြို့တွင် တန်ဆောင်တိုင် မီးပုံးပျံလွှတ်ပွဲနှင့် စတုဒီသာပွဲကို ကန်သာယာပြည်ထောင်စုကျွန်းတွင် တန်ဆောင်မုန်းလပြည့်နေ့ (နိုဝင်ဘာလ ၁၅ ရက်) ညပိုင်းက ကျင်းပရာ တန်ဆောင်တိုင် မီးပုံးပျံအလုံး (၃၈၀) လွှတ်တင်ခဲ့ကြောင်း သိရသည်။
တန်ဆောင်တိုင်မီးပုံးပျံများလွှတ်တင်ရာတွင် ပထမအကြိမ် အမြင့် (၁၂) ပေရှိ အလှ မီးပုံးပျံအကြီး အလုံး (၄၀)၊ ဒုတိယအကြိမ် အမြင့် (၁၂) ပေရှိ အလှမီးပုံးပျံအကြီး အလုံး (၄၀)၊ တစ်ကြိမ်လျှင် မီးပုံးပျံအသေး အလုံး (၅၀) စီဖြင့် (၆) ကြိမ် မီးပုံးပျံအလုံးရေ (၃၀၀)၊ စုစုပေါင်း မီးပုံးပျံ (၃၈၀)လွှတ်တင်ခဲ့ကြခြင်းဖြစ်သည်။
တန်ဆောင်တိုင်ပွဲ လာရောက်ဆင်နွှဲကြသူများကို စစ်ကိုင်းတိုင်းဒေသကြီး အစိုးရအဖွဲ့ နှင့် တိုင်းဒေသကြီးအစိုးရ အဖွဲ့ဝင်ဝန်ကြီးများ၊ တိုင်းဒေသကြီး ဥပဒေချုပ်၊ တိုင်းဒေသကြီး အထွေထွေအုပ်ချုပ်ရေး ဦးစီးဌာန၊ တိုင်းဒေသကြီးစည်ပင်သာယာရေးအဖွဲ့တို့က စတုဒီသာများဖြင့် ဧည့်ခံကျွေးမွေးခဲ့ကြသည်။
ထို့ပြင်တိုင်းဒေသကြီး တိုင်းရင်းသားရေးရာဝန်ကြီးဌာနက ရှမ်းရိုးရာအက၊ မုံရွာမြို့ပေါ်ရှိ အနုပညာရှင်များက ဦးရွှေရိုးအက၊ တစ်ပင်တိုင်အက ၊ ပဒေသာအက ၊မုံရွာမြို့ မိုးဇော် ဆင်အကအဖွဲ့မှ ဆင်အကတို့ဖြင့် ဧည့်ခံဖျော်ဖြေခဲ့ကြကြောင်းသိရသည်။