မိုဒီထံမှဒေါ်လာ၂၀,၀၀၀တန်စိန်တစ်ပွင့်ဘိုင်ဒင်ကတော်လက်ဆောင်ရခဲ့

အမေရိကန်သမ္မတ ဂျိုးဘိုင်ဒင်မိသားစုသည် ၂၀၂၃ ခုနှစ်အတွင်း နိုင်ငံရပ်ခြားခေါင်းဆောင်များထံမှ ဒေါ်လာသောင်းချီ၍တန်ဖိုးရှိသော လက်ဆောင်ပဏ္ဍာများ ကို ရရှိခဲ့ကြသည်ဟု နိုင်ငံခြားရေးဝန်ကြီးဌာနက နှစ်စဉ်ထုတ်ပြန်သော စာရင်းအင်းတစ်ခုအရသိရသည်။ ယင်းလက်ဆောင်များထဲတွင် သမ္မတကတော် ဂျေးဘိုင်ဒင်ကို အိန္ဒိယဝန်ကြီးချုပ် နာရင်ဒြာမိုဒီက ပေးအပ်ခဲ့သော အမေရိကန်ဒေါ်လာ ၂၀,၀၀၀ တန်စိန်တစ်ပွင့်သည် ဈေးအကြီးဆုံး လက်ဆောင်ပဏ္ဍာဖြစ်သည်ဟု သိရသည်။

အိန္ဒိယဝန်ကြီးချုပ်က ပေးအပ်ခဲ့သော ၇ ဒဿမ ၅ ကာရက်ရှိ စိန်ပွင့်သည် ၂၀၂၃ ခုနှစ်တွင် သမ္မတမိသားစုဝင်များ ရရှိခဲ့သမျှ လက်ဆောင်များထဲတွင် တန်ဖိုးအကြီးဆုံးဖြစ်သည်။ ထို့အပြင် သူသည် အမေရိကန်နိုင်ငံဆိုင်ရာ ယူကရိန်းသံအမတ်ထံမှ ဒေါ်လာ ၁၄,၀၆၃ တန် ရင်ထိုးတစ်ခုနှင့် အီဂျစ်သမ္မတကတော်ထံမှ ဒေါ်လာ ၄,၅၁၀ တန် လက်ကောက်၊ ရင်ထိုးနှင့် ဓါတ်ပုံအယ်လ်ဘမ်တို့ကိုလည်း ရရှိခဲ့သေးသည်။

ဂျိုးဘိုင်ဒင်ကိုယ်တိုင်သည်လည်း မကြာသေးမီကမှ စွပ်စွဲပြစ်တင်ခံထားရသည့် တောင်ကိုရီးယားသမ္မတ ယွန်းဆွတ်ယိုးလ်ထံမှ ဒေါ်လာ ၇,၁၀၀ တန် အမှတ်တရဓါတ်ပုံအယ်လ်ဘမ်တစ်ခု၊ မွန်ဂိုလီးယားဝန်ကြီးချုပ်ထံမှ ဒေါ်လာ ၃,၄၉၅ တန် မွန်ဂိုလီးယားစစ်သည်ရုပ်တုတစ်ခု၊ ဘရူနိုင်းစော်စူလတန်ထံမှ ဒေါ်လာ ၃,၃၀၀ တန် ငွေပန်ကန်လုံးတစ်လုံး၊ အစ္စရေးသမ္မတထံမှ ဒေါ်လာ ၃,၁၆၀ တန် ငွေလင်ပန်းတစ်ချပ်နှင့် ယူကရိန်းသမ္မတထံမှ ဒေါ်လာ ၂,၄၀၀ တန် သောင်းပြောင်းထွေလာဓါတ်ပုံ ပန်းချီကားတစ်ချပ်အပါအဝင် တန်ဖိုးကြီးလက်ဆောင်ပဏ္ဏာ များစွာရရှိခဲ့သည်။

ပြည်ထောင်စုဥပဒေအရ အစိုးရအရာရှိများသည် နိုင်ငံခြားခေါင်းဆောင်များနှင့် ရာထူးအဆင့်တူ အရာရှိများထံမှ လက်ခံရရှိသည့် ခန့်မှန်းခြေ ဒေါ်လာ ၄၈၀ ထက်ပိုသော လက်ဆောင်ပစ္စည်းများကို ထုတ်ဖော်ကြေညာရန်လိုအပ်သည်။ အဆိုပါသတ်မှတ်ချက်နှင့်ကိုက်ညီသော လက်ဆောင်အများအပြားတွင် တန်ဖိုးအသင့်အတင့်ရှိသော လက်ဆောင်များကို အမြဲတစေမဟုတ်သော်လည်း ပုံမှန်အားဖြင့် အမျိုးသားမော်ကွန်းတိုက်ကို လွှဲပေးခြင်း သို့မဟုတ် တရားဝင်ပြသခြင်းများတွင် ထည့်သွင်းရလေ့ရှိသည်။

REF: ဆော့သ်ချိုင်းနားမောနင်းပို့စ်