မကွေးတိုင်း၊ မင်းဘူး(စကု)မြို့နယ်ရှိ မန်းရွှေစက်တော်ရာဘုရားကြီး၏ ဗုဒ္ဓပါဒပူဇနိယပွဲတော်အား ယနေ့ ဧပြီ ၁၇ ရက်(နှစ်ဆန်းတစ်ရက်နေ့)နံနက် ၈ နာရီခွဲက အခမ်း အနားဖြင့်ပိတ်သိမ်းခဲ့သည်။
မန်းရွှေစက်တော်ရာဘုရားဂေါပကအဖွဲ့၏ ဩဝါဒါစရိ ယဆရာတော်ကြီးများကြွရောက်တော်မူကာ မကွေး တိုင်းဝန်ကြီးချုပ်ဦးတင်ကိုကို၊ တိုင်းလွှတ်တော်ဥက္ကဋ္ဌနှင့် တာဝန်ရှိသူများတက်ရောက်ကြည်ညိုပူဇော်ခဲ့ကြသည်။
မန်းရွှေစက်တော်ရာဘုရားဂေါပကအဖွဲ့၏ ဩဝါဒါစရိ ယဆရာတော်ကြီးများက အောက်စက်တော်ရာနှင့် အ ထက်စက်တော်ရာ ပါဒစေတီတော်နှစ်ဆူအား ဗုဒ္ဓါဘိသေကအနေကဇာတင်လှူပူဇော်ခဲ့ကြသည်။
ထို့နောက် ဩဝါဒါစရိယဆရာတော်ကြီးများနှင့် တာဝန် ရှိသူများက ပါဒစေတီတော်နှစ်ဆူအား နမ္မဒါရေစင်သွန်းဖျန်း၍ ရွှေသင်္ကန်းများကပ်လှူပူဇော်ကာ အောက် ခြေတော်ရာပါဒစေတီတော်အလင်းပေါက်ဖန်အုပ် သျှောင်တော်အား စက်ခလုပ်နှိပ်ပိတ်သိမ်း၍ အထက်စက်တော်ရာ ပါဒစေတီတော်ခြေတော်ရာသံတံခါးအားသော့ခတ်ပိတ်သိမ်းတော်မူခဲ့ကြသည်။
ထိုသို့ ပိတ်သိမ်းပြီးနောက် မန်းရွှေစက်တော်ရာဘုရား ဗုဒ္ဓပူဇနိယပွဲတော်အောင်မြင်စွာကျင်းပနိုင်ခဲ့ခြင်းနှင့် ပါ ဒစေတီတော်နှစ်ဆူ ခြေတော်ရာပိတ်သိမ်းပွဲအောင်မြင်ခြင်းအထိမ်းအမှတ်အလှူတော်မင်္ဂလာကို ဆက်လက်ကျင်းပခဲ့ကြသည်။
မန်းရွှေစက်တော်ရာဘုရားကြီးသည် မြန်မာနိုင်ငံ၏ (က)အဆင့်စာရင်းဝင်တန်ခိုးကြီးဘုရားဖြစ်ပြီး (၂,၅၉၂)ကြိမ်မြောက် ဗုဒ္ဓပါဒပူဇနိယဘုရားပွဲတော်ကြီးကို ဇန်နဝါရီ ၂၂ ရက်မှ ဧပြီ ၁၇ ရက်အထိ သင်္ကြန်ရုံး ပိတ်ရက်အပါအဝင် ရက်ပေါင်း(၈၆)ရက်ကြာစည်ကားသိုက်မြိုက်စွာကျင်းပခဲ့ပြီး ဘုရားပွဲတော်ကာလတွင် တည်ခိုးဆောင်အခန်း(၅၁၉)ခန်းနှင့် ဈေးဆိုင်ခန်း (၂၆၅)ဆိုင်ဆောက်လုပ်ခဲ့ရာ အနယ်အနယ်အရပ်ရပ်မှ ဘုရားဖူး(၂၂၀,၀၀၀)ခန့်လာရောက်ခဲ့သည်။
