မန္တလေး လမ်းမဧရိယာများနှင့် ပလက်ဖောင်းများပေါ်မှ စျေးဆိုင်များကိုရှင်းလင်းမည်

မန္တလေးတိုင်းအတွင်းရှိ လမ်းမဧရိယာများနှင့် ပလက်ဖောင်းများပေါ်တွင် ခွင့်ပြုချက်မရှိဘဲရောင်းချနေသည့် စျေးဆိုင်များကိုတားမြစ်သွားမည်ဟု မန္တ လေးတိုင်းဝန်ကြီးချုပ်ဦးမျိုးအောင်မှ သြဂုတ် ၂၆ ရက်ကပြုလုပ်သည့် တိုင်းဒေသကြီးအတွင်း လမ်းဘေးဈေးဆိုင်များနှင့် အိမ်ဈေးဆိုင်များစနစ်တကျရှိစေရေးလုပ်ငန်းညှိနှိုင်းအစည်းအဝေးတွင်ပြောကြားခဲ့ခြင်းဖြစ်သည်။

မန္တလေးတိုင်းအား မြို့အင်္ဂါရပ်နှင့်အညီဖြစ်စေရေး၊ ယာဉ်အသွားအလာ ရှုပ်ထွေးမှုမဖြစ်ပေါ်စေရေးနှင့် ယာဉ်အန္တရာယ်ကင်းရှင်းရေးတို့အတွက် လမ်းမဧရိယာများနှင့် ပလက်ဖောင်းများပေါ်တွင်ခွင့်ပြုချက်မရှိဘဲ ခင်းကျင်းရောင်းချနေမှုများကိုတားမြစ်သွားမည်ဟု ပြောသည်။

ထို့ပြင် အိမ်ဆိုင်များမှာလည်း အိမ်ရှေ့မြောင်းပေါ် ပလက်ဖောင်းပေါ်တို့တွင် ပစ္စည်းများစုပုံခင်းကျင်းရောင်းချခြင်းများမပြုလုပ်ရန် အသိပေးစာများပေးပို့ခြင်း၊ သတ်မှတ်ကာလတစ်ခုအတွင်း အသိပညာပေးခြင်းများကို ဆောင်ရွက်သွားမည်ဖြစ်ကာ စျေးဆိုင်များတိုးလာသဖြင့် စနစ်တကျရှိစေရန်၊ မြို့အင်္ဂါရပ်နှင့်အညီဖြစ်စေရန် စီမံချက်များချမှတ်၍ ထုတ်ပြန်ထားသည့် ဥပဒေ၊ နည်းဥပဒေ၊ အမိန့်နှင့် ညွှန်ကြားချက်များအတိုင်း အဂတိတရားကင်းရှင်းစွာဖြင့် ရေတို/ရေရှည် စဉ်ဆက်မပြတ်ဆောင်ရွက်ရမည်ဟု ပြောသည်။

ထို့နောက် မန္တလေးမြို့တော်ဝန်ဦးကျော်ဆန်းက မန္တ လေးမြို့တော်စည်ပင်မှ မြို့တော်ဖွံ့ဖြိုးတိုးတက်ရေးအတွက် ကဏ္ဍများအလိုက် လုပ်ငန်းများအကောင် အထည်ဖော်ဆောင်ရွက်နေမှု၊ လမ်းဘေးဈေးဆိုင်များနှင့် အိမ်ဆိုင်များ စနစ်တကျရှိစေရေးစီမံချက်များချမှတ်ဆောင်ရွက်သွားမည့် လုပ်ငန်းအစီအမံများကိုရှင်းလင်းပြောကြားခဲ့သည်။