ထိခိုက်ပျက်စီးဆုံးရှုံးသွားသောအာရုံခံစားမှုများပြန်လည်ရရှိနိုင်ရန်အတွက် လူတို့၏ဦးနှောက် အတွင်းသို့ထည့်သွင်းနိုင်မည့် ကွန်ပျူတာများကို အမေရိကန်အဆင့်မြင့်သုတေသနစီမံကိန်းအဖွဲ့အစည်း (DARPA) ကတီထွင်နေကြောင်းသိရှိရသည်။
DARPA အနေဖြင့် ဦးနှောက်အတွင်းသို့ ထည့်သွင်းနိုင်မည့် အာရုံကြောဆိုင်ရာနည်းပညာတစ်မျိုးကို တီထွင်ရန် Neural Engineering System Design (NESD) စီမံကိန်းသို့ အမေရိကန်ဒေါ်လာ ၆၅ သန်း ရန်ပုံငွေ ထောက်ပံ့ထားသည်။
Defense Advanced Research Projects Agency (DARPA) ဆိုသည်မှာ အမေရိကန်တပ်မတော်၏ စစ်လက်နက်သုတေသနဌာနကြီးတစ်ခုဖြစ်ပြီး ၎င်းတို့ယခုတီထွင်နေသည့် ကွန်ပျူတာများကို အာရုံခံစား မှုထိခိုက်ဆုံးရှုံးသွားသူတို့၏ အမြင်၊ အကြားနှင့် စကားပြောနိုင်သည့်အာရုံခံစားမှုများ ပြန်လည်ရရှိစေရန် အသုံးပြုသွားမည် ဖြစ်ပါသည်။
ဦးနှောက်အတွင်းထည့်သွင်းနိုင်မည့်ကွန်ပျူတာသည် အရွယ်အစားအားဖြင့် ၁ ကုဗစင်တီမီတာ ထက်သေးငယ်မည်ဖြစ်ပြီး လူ့ဦးနှောက်အာရုံကြောစနစ်မှ ဆက်သွယ်မှုများကို ကွန်ပျူတာဘာသာက နားလည်မည့် (0, 1) ဘာသာစကားအဖြစ်သို့ ပြောင်းလဲပေးမည်ဖြစ်ကြောင်း DARPA ကဆိုသည်။
ထို့ကြောင့် လူသားတို့၏ဦးနှောက်နှင့် ကွန်ပျူတာတို့အကြား အပြန်အလှန်တိုက်ရိုက်ဆက်သွယ်သွား နိုင်တော့မည်ဖြစ်ကြောင်း သိရှိရသည်။
ယခုတီထွင်နေသည့် အာရုံခံစားမှုပြန်လည်ရယူပေးနိုင်မည့်နည်းပညာသည် DARPA က တီထွင်ထားသော နည်းပညာများအနက် အသုံးချနိုင်ခြေအလားအလာအရှိဆုံးနည်းပညာတစ်မျိုး ဖြစ်ကြောင်း ဇီဝဗေဒနည်းပညာဌာနမှ စီမံကိန်းမန်နေဂျာဖြစ်သူ Dr Elizabeth Strychalski ကဆိုသည်။ ထို့အပြင် DARPA အနေဖြင့် ယခုနည်းပညာနှင့်ပတ်သက်၍ စစ်ဘက်တွင်အသုံးပြုနိုင်မည့် အခြားသော နည်းလမ်းများကိုလည်း ရှာဖွေ၍သုတေသနပြုလုပ်သွားရန် Dr Elizabeth Strychalski ကအကြံပြုထားသည်။
ထို့အပြင် NESD စီမံကိန်းအနေဖြင့် အနာဂတ်တွင် ရောဂါကုသရာ၌ အာရုံစားမှုကို ပိုမိုတိကျစွာထောက်ပံ့ပေးနိုင်မည့် အဆင့်မြင့်အာရုံခံစနစ်သုံးကိရိယာများကို တီထွင်သွားရန် ရည်ရွယ်ထားကြောင်း Neural Engineering System Design (NESD) စီမံကိန်းမန်နေဂျာဖြစ်သူ Phillip Alvelda ကဆိုသည်။
ဥာဏ်ဝေ