ဘလင်ကင် နှင့် ဆူလီဗန် တို့အား လုံခြုံရေးခွင့်ပြုချက်များ‌ပေးထားခြင်းကို ရုပ်သိမ်းရန် ထရမ့်စီစဉ်နေ

အမေရိကန်သမ္မတ ဒေါ်နယ်ထရမ့်သည် ယခင်နိုင်ငံခြားရေးဝန်ကြီး အန်တိုနီဘလင်ကင် နှင့် ယခင် အမေရိကန်အမျိုးသားလုံခြုံရေးအကြံပေး ဂျိတ်ဆူလီဗန် တို့အား လုံခြုံရေးခွင့်ပြုချက်များ‌ပေးထားခြင်းကို ရုပ်သိမ်းရန် စီစဉ်နေကြောင်း New York Post (NYP) သတင်းစာက ဖော်ပြထားသည်။

ဖေဖော်ဝါရီ ၇ ရက်နေ့က ထရမ့်သည် ယခင် သမ္မတ ဂျိုးဘိုင်ဒင်အား လုံခြုံရေးခွင့်ပြုချက်များ‌ပေးထားခြင်းကို ရုပ်သိမ်းခဲ့ပြီး “ဂျိုး၊ မင်းကို အလုပ်ဖြုတ်လိုက်ပြီ” ဟု မှတ်ချက်ပြုခဲ့သည်။

ဘလင်ကင် အပေါ် ယခုကဲ့သို့ဆုံးဖြတ်ချက်ချမှတ်ရခြင်းမှာ ဂျိုးဘိုင်ဒင်၏သား ဟန်တာဘိုင်ဒင် ၏ လက်ပ်တော့ပ် အမှုတွင် ရုရှားပါဝင်ပတ်သက်နေသည်ဟု မှားယွင်းစွာ စွပ်စွဲ၍ ပြုလုပ်ခဲ့သည့် ရွေးကောက်ပွဲမဲဆွယ်မှုတွင် ပါဝင်ခဲ့သောကြောင့်ဖြစ်သည်။ ဟန်တာဘိုင်ဒင် ၏ လက်ပ်တော့ပ်ထဲတွင် သူ၏ဖခင်ရာထူးကို အသုံးချကာ ကိုယ်ပိုင်စီးပွားရေးအကျိုးအမြတ်ရယူရန် ကြိုးစားနေသည့် အကြောင်းအရာများနှင့် သူကိုယ်တိုင် မူးယ-စ်ဆေးဝါးသုံးစွဲမှုဆိုင်ရာ ဓာတ်ပုံနှင့် ဗီဒီယိုများပါဝင်နေသည်။

ထရမ့်ကို တရားစွဲဆိုခဲ့သည့် ဥပဒေရေးရာမှုခင်းများတွင် ယခင်က ပါဝင်ခဲ့သည့် နယူးယောက် ရှေ့နေချုပ် လက်တစ်တီယာဂျိမ်းစ် နှင့် မန်ဟက်တန် ခရိုင် ရှေ့နေ အယ်လ်ဗင်ဘရက် တို့သည်လည်း ထရမ့်က “လျှို့ဝှက်အဆင့်သတင်းအချက်အလက်များကို အသုံးပြုခွင့်များရုပ်သိမ်းခြင်းနှင့် အစိုးရရုံးဌာနအဆောက်အအုံများသို့ ဝင်ရောက်ခွင့်ပိတ်ပင်ခြင်းတို့ဖြင့် အပြစ်ပေးရန် စီစဉ်ထားသူများ” ထဲတွင် ပါဝင်နေကြောင်း New York Post (NYP) သတင်းစာက ရေးသားဖော်ပြထားသည်။