ဘင်္ဂလားဒေ့ရှ်နှင့် ပါကစ္စတန်တို့ တိုက်ရိုက်ကုန်သွယ်မှုပြန်လည်စတင်ပြီ

ဒါကာ၊ ဖေဖော်ဝါရီ ၂၄

ဘင်္ဂလားဒေ့ရှ်နိုင်ငံသည် ၁၉၇၁ ခုနှစ်၌ လွတ်လပ်ရေးရပြီးကတည်းက ပထမဆုံးအကြိမ်အဖြစ် ပါကစ္စတန်နိုင်ငံနှင့် တိုက်ရိုက်ကုန်သွယ်မှုကိုပြန်လည်စတင်ခဲ့ပြီး ပထမဆုံးအသုတ်အဖြစ် ဆန်တန်ချိန် ၅၀,၀၀၀ ကို အစိုးရချင်းသဘောတူညီချက်အရ ကာစင်ဆိပ်ကမ်းမှ ပို့ဆောင်ခဲ့ကြောင်း တာဝန်ရှိသူများက ပြောကြားခဲ့သည်။

ယခု သဘောတူညီမှုသည် နို့ဘဲလ်ဆုရှင် မုဟာမက် ယူနုစ် ဦးဆောင်သော ဘင်္ဂလားဒေ့ရှ် နိုင်ငံကြားဖြတ်အစိုးရ၏ အုပ်ချုပ်မှုအောက်တွင် သံတမန်ရေးရာဆက်ဆံရေး ကို ပိုမိုတိုးတက်လာစေရန် လုပ်ဆောင်ခဲ့ခြင်းဖြစ်သည်။ ယခင်ဝန်ကြီးချုပ် ရှိတ်ခ် ဟာစီနာ ကို နိုင်ငံတွင်းမှ နှင်ထုတ်ခဲ့သော ဆန္ဒပြပွဲများအပြီးတွင် အဆိုပါ သဘောတူညီချက်ကိုအကောင်အထည်ဖော်ခဲ့ခြင်းဖြစ်သည်။

ယခင်က အရှေ့ပါကစ္စတန်ဟု သိကြသော ဘင်္ဂလားဒေ့ရှ်သည် ကိုးလကြာစစ်ပွဲများအပြီးတွင် ကိုယ်ပိုင်လွတ်လပ်ရေးရရှိခဲ့သည်။

ယခုလအစောပိုင်းတွင် အပြီးသတ်သဘောတူထားသည့် သဘောတူညီချက်အသစ်အရ ဘင်္ဂလားဒေ့ရှ် နိုင်ငံသည် ပါကစ္စတန်နိုင်ငံ၏ကုန်သွယ်‌ရေးကော်ပိုရေးရှင်းမှ ဆန်ဖြူတစ်တန်လျှင် ၄၉၉ ဒေါ်လာဖြင့် ဝယ်ယူနေခြင်းဖြစ်သည်။ ကုန်ပစ္စည်းတင်ပို့မှုကို နှစ်သုတ်ခွဲ၍ ပို့ဆောင်မည်ဖြစ်ပြီး ကျန်တန်ချိန် ၂၅,၀၀၀ ကို မတ်လအစောပိုင်းတွင် တင်ပို့နိုင်မည်ဟုမျှော်မှန်းထားသည်။

သို့သော်လည်း ဘင်္ဂလားဒေ့ရှ်နိုင်ငံမှ တင်သွင်းသည့် ဆန်ဈေးမှာ တစ်တန်လျှင် အမေရိကန်ဒေါ်လာ ၄၇၄ ဒသမ ၂၅ ကျသင့်နေပီး ဗီယက်နမ်နိုင်ငံမှ ဆန်ထက် ဈေးပိုများနေသည်ကိုတွေ့ရသည်။

အစိုးရသည် ဆန်ဈေးကွက်ကို တည်ငြိမ်စေရန် ကြိုးပမ်းနေရပြီးမကြာသေးမီလများအတွင်း ဆန်ဈေးနှုန်းသည် ၁၅-၂၀% မြှင့်တက်ခဲ့သည်။ ယခုအခါ အလတ်တန်းစား အရည်အသွေးရှိသည့် ဆန်တစ်ကီလိုကို ၈၀ တာကာ ($0.66) ခန့်ဖြင့် ရောင်းချလျက်ရှိသည်။

ဆန်ဈေးနှုန်းကို ထိန်းချုပ်ရန်အတွက် အစိုးရသည် တင်ဒါများအပါအဝင် နိုင်ငံတကာဈေးကွက်များမှ ဆန်များ ကို ပိုမိုတင်သွင်းနေပြီး ဆန်တင်သွင်းမှုအခွန်များ၊ သွင်းကုန်ခွန်များကို ဖျက်သိမ်းဖယ်ရှားခဲ့သည်။

Ref: ရိုက်တာ