စစ်ကိုင်းတိုင်းဒေသကြီး၊ ကလေးဝမြို့နယ်တွင် အကြမ်းဖက်အဖွဲ့များ၏ ဖောက်ခွဲဖျက်ဆီးမှုကြောင့် တာဝါတိုင် (၁၆) တိုင် ပြိုလဲပျက်စီးခဲ့သဖြင့် ပြတ်တောက်နေသည့် မဟာဓာတ်အားလိုင်းကို နယ်မြေလုံခြုံရေးအခြေအနေပေါ်မူတည်၍ ပြန်လည်ပြုပြင်ဆောင်ရွက်သွားမည်ဖြစ်ကြောင်း လျှပ်စစ်နှင့် စွမ်းအင်ဝန်ကြီးဌာန ဒုတိယဝန်ကြီး ဦးအေးကျော်က ပြောကြားသည်။
ယင်းကိစ္စနှင့်ပတ်သက်၍ ဇွန် ၁၇ ရက်က ကျင်းပသည့် တတိယအကြိမ် ပြည်သူ့လွှတ်တော် ဒုတိယပုံမှန်အစည်းအဝေး (နဝမနေ့) တွင် ကလေးဝမဲဆန္ဒနယ်မှ လွှတ်တော်ကိုယ်စားလှယ် ဦးတင်ထွန်းလွင်၏ မေးခွန်းအား ဒုတိယဝန်ကြီးက ပြန်လည်ဖြေကြားခဲ့ခြင်းဖြစ်သည်။
ဒုတိယဝန်ကြီး၏ ရှင်းလင်းချက်အရ ကလေးဝမြို့နယ်သို့ ဓာတ်အားပို့လွှတ်ပေးနေသည့် ၂၃၀ ကေဗွီ ညောင်ပင်ကြီး-ချောင်းကူး မဟာဓာတ်အားလိုင်းသည် ၂၀၂၅ ခုနှစ် မတ်လအတွင်း ဖောက်ခွဲဖျက်ဆီးခံရမှုကြောင့် တာဝါတိုင် (၁၆) တိုင် ပျက်စီးခဲ့ပြီး ဓာတ်အားပို့လွှတ်မှု ပြတ်တောက်ခဲ့ကြောင်း သိရသည်။
ကလေးဝမြို့နယ်သည် ချောင်းကူးဓာတ်အားခွဲရုံမှတစ်ဆင့် ၆၆ ကေဗွီ ချောင်းကူး-ဂန့်ဂေါ-ကလေး-ကလေးဝ ဓာတ်အားလိုင်းဖြင့် လျှပ်စစ်ဓာတ်အား လက်ခံအသုံးပြုနေခြင်းဖြစ်ကြောင်းလည်း သိရသည်။
လက်ရှိတွင် ပျက်စီးသွားသည့် မဟာဓာတ်အားလိုင်းများ ပြန်လည်တည်ဆောက်နိုင်ရေးအတွက် စီမံဆောင်ရွက်လျက်ရှိပြီး နယ်မြေတည်ငြိမ်အေးချမ်းမှုနှင့် လုံခြုံရေးအခြေအနေပေါ် မူတည်၍ ပြန်လည်ပြုပြင်သွားမည်ဖြစ်ကြောင်း ဒုတိယဝန်ကြီးက ပြောကြားခဲ့သည်။