အိပ်မက်ဆုံရာပြိုင်ပွဲဝင် ထက်အိမ်ကတော့’ ရေ’လို့ အမည်ရတဲ့ အခွေကိုထုတ်ခဲ့ပါတယ်။ အဆိုပါ အခွေမှာ ပြန်ဆိုတေးတွေများတဲ့အတွက် ပရိသတ်ဝေဖန်မှုအတွက် စိုးရိမ်နေကြောင်းကိုတော့ …
“ကျွန်တော် ဒီအခွေကို စီစဉ်တာ ကြာပါပြီ။ ဒီထဲမှာ သီချင်း ၁၂ ပုဒ် လောက်ပါတယ်။ ပြန်ဆိုတေး ၁ဝ ပုဒ်လောက်ပါတယ်။ တစ်ခွေလုံး မှာ ပြန်ဆိုထားတဲ့ သီချင်းတွေများပေမယ့် ပြန်ဆိုတေးအနေနဲ့ ထွက်တာမဟုတ်ပါဘူး။ ကျွန်တော်ရဲ့ ကိုယ်ပိုင်သီချင်း ကို ခေါင်းစဉ်တင်ထားတယ်။ ပြိုင်ပွဲဝင်တုန်းက ဆိုထားတဲ့ သီချင်းတွေ လည်းပါတယ်။ ပြန်ဆိုတေးဆိုတဲ့အခါမှာ လည်း အရမ်းတာဝန်ကြီးတယ်။ ကျွန်တော်တို့မှာ မှားသွားရင် သူတို့ရဲ့ ပရိသတ်တွေ ငြိုငြင်သွားမှာလည်း စိုးရတယ်။ ကျွန်တော်တို့ကလည်း ကြိုးစားပြီးတော့ အကောင်းဆုံးဖြစ်အောင်ဆိုလိုက်တာပဲ။ ဒီသီချင်းတွေက ကျွန်တော်ရဲ့ ပရိုဂျူဆာ ဦးသိန်းတန်ကိုယ်တိုင်က ကျွန်တော်ကို ဆို စေချင်လို့ ရွေးပေးထားတဲ့ သီချင်းတွေပါ။ ဘယ်အဆိုတော်မဆို သီချင်း တွေချစ်လို့ သီချင်းဆိုတယ်။ သီချင်းကိုပျက်သွားအောင် ဘယ်သူမှာလုပ်ဆိုမှာမဟုတ်ဘူး။ ဒီလို့ဆိုတဲ့အတွက် ဝေဖန်တာတော့ရှိမှာပေါ့။ ဝေဖန်တာ တော့နေရာတိုင်းမှာရှိတယ်။တကယ် တမ်းဝေဖန်တာကလည်း ကောင်းတဲ့ ဝေဖန်မှုနဲ့မကောင်းတဲ့ဝေဖန်မှုတွေလည်း ရှိတယ်။ ကောင်းတဲ့ဝေဖန်မှု ဆိုရင်တော့ နားထောင်လိုက်မယ်။ မကောင်း တဲ့ ဝေဖန်မှုဆိုရင်တော့ သိပ်ဂရုစိုက်ဖြစ်မှာ မဟုတ်ပါဘူး” လို့ ပြောပါတယ်။
အခွေထွက်နိုင်ပြီဖြစ်လို့ အရမ်း ပျော်နေတယ်ဆိုတဲ့ အကြောင်းကိုလည်း ထက်အိမ်က အခုလိုပြောပြခဲ့ပါတယ်။ “ကျွန်တော် သီချင်းခွေလေး ထွက်ပြီဆိုတော့ အရမ်းပျော်မိတယ်။ ပရိသတ်အားပေးမှုကိုတော့ အရမ်းကြီးမျှော်လင့် မထားပါဘူး။ ကျွန်တော်က ပြိုင်ပွဲကတည်းက အရမ်းမမျှော်လင့်မထားတော့လေ။ ကျွန်တော်က အစွမ်းကုန် ကြိုးစား ထားတဲ့အတွက် ပရိသတ်တွေ စိတ်ကျေနပ်မယ်လို့လည်းယုံပါတယ်။ ကျွန်တော်ရဲ့ ‘ရေ’သီချင်းခွေလေးကို ဖေဖော် ဝါရီလမှာစပြီး ဖြန့်ချိပြီးပါပြီ”လို့ ထက်အိမ်က ဆိုပါတယ်။
ချယ်ရီ
ဓာတ်ပုံ – ဇွဲမာန်