ယနေ့ ဧပြီ ၇ ရက်နံနက်ပိုင်းကကျင်းပခဲ့သည့် တတိယအကြိမ် ပဲခူးတိုင်းဒေသကြီးလွှတ်တော် ပထမပုံမှန်အစည်းအဝေးမှ ပဲခူးတိုင်းဝန်ကြီးချုပ်ဦးမျိုးဆွေဝင်းဦးဆောင်မည့် အစိုးရအဖွဲ့သစ်ကို အတည်ပြုပေးခဲ့ကြောင်း သိရသည်။
ပဲခူးတိုင်းအစိုးရအဖွဲ့သစ်တွင် တိုင်းဝန်ကြီးချုပ်အဖြစ် ဦးမျိုးဆွေဝင်းက တာဝန်ယူ၍ လုံခြုံရေးနှင့် နယ်စပ်ရေးရာဝန်ကြီးအဖြစ် ဗိုလ်မှူးကြီးညီလန်းချို၊ စီမံကိန်း၊ စီးပွားရေးနှင့် ဘဏ္ဍာရေးဝန်ကြီးအဖြစ် ဦးဇော်ဝင်း၊ လူမှုရေးရာဝန်ကြီးအဖြစ် ဒေါက်တာထူးခြားအောင်တို့က တာဝန်ထမ်းဆောင်ကြမည်ဖြစ်ကြောင်း သိရသည်။
ထို့ပြင် လျှပ်စစ်၊ စွမ်းအင်၊ စက်မှုနှင့် လမ်းပန်းဆက်သွယ်ရေးဝန်ကြီးအဖြစ် ဦးကျော်ထွဋ်၊ စိုက်ပျိုးရေး၊ မွေးမြူရေးနှင့် ဆည်မြောင်းဝန်ကြီးအဖြစ် ဦးကိုကိုဦး၊ သယံဇာတနှင့် သဘာဝပတ်ဝန်းကျင်ထိန်းသိမ်းရေးဝန်ကြီးအဖြစ် ဦးကျော်ကျော်လင်း၊ စည်ပင်သာယာရေးဝန်ကြီးအဖြစ် ဦးထွန်းထွန်းဦး၊ တိုင်းရင်းသားရေးရာဝန်ကြီးအဖြစ် ဦးစောလင်းအောင်တို့မှလည်း တာဝန်ထမ်းဆောင်သွားမည်ဖြစ်ကြောင်း သိရသည်။