ပြည်ပသို့ တင်ပို့သည့် ပို့ကုန်များမှ ရငွေများ လမကုန်ခင်ဝင်ရောက်ရန်ရှိသည့်အတွက် ဒေါ်လာဈေးပိုကျနိုင်ကြောင်း စီးပွားရေးလုပ်ငန်းရှင်တစ်ဦးဖြစ်သည့် ဒေါက်တာစိုးထွန်းက ခန့်မှန်း ပြောကြားထားသည်။
“ သူကတော့ ကောင်းတဲ့အခြေအနေပေါ့။ နှစ်တိုင်းနှစ်တိုင်းကလည်း ကျလေ့ရှိပါတယ်။ ဧပြီလဆိုကျတယ်။ ပြီးတော့ ဘတ်ဂျက်အပိတ်မှာလည်း ဒေါ်လာနဲ့ပတ်သက်ရင် မြန်မာပြည်ကို ပြန်လည်ဝင်ရောက်တဲ့ဟာ များတာပေါ့နော်။ဒီဘက်မှာလည်း ဗဟိုဘဏ်တို့ သက်ဆိုင်ရာ ကုန်စည် OSS တို့ကလည်း ဒီလမကုန်ခင်ငွေပြန်ဝင်ဖို့ဆိုပြီး Export ကုမ္ပဏီတွေကိုစာတွေထုတ်ပြီး ပြောတာဆိုတာရှိတာပေါ့။ အဲဒါကြောင့် ငွေပြန်ဝင်တဲ့ဟာများနေတာပေါ့။ဒီရက်ပိုင်းက။ ဒီထက်လည်းကျနိုင်ပါတယ်”ဟု ၎င်းက ဆိုသည်။
၂၀၂၂-၂၀၂၃ ဘဏ္ဍာနှစ်၏ ဧပြီလ ၁ ရက်မှ ၁၇ ရက်အထိ ပြည်ပသို့ ပို့ကုန်တင်ပို့မှုမှ ပို့ကုန်ဝင်ငွေ အမေရိကန်ဒေါ်လာ ၁၅ ဒသမ ၅ ဘီလီယံရရှိထားပြီး လာမည့် ၃၁ ရက်နေ့တွင် ဘဏ္ဍာနှစ်ကုန်ဆုံးမည်ဖြစ်ကြောင်းလည်း သိရသည်။
ပို့ကုန်ဝင်ငွေနှင့်ပတ်သက်၍ “သကြားကတော့ ကုမ္ပဏီတစ်ခုနှစ်ခုကပဲပို့တာဆိုတော့ သူကရှင်းရှင်းလင်းလင်းပဲ၊ဘာမှလက်ကျန်မရှိဘူး” ဟု မြန်မာနိုင်ငံသကြားနှင့်ကြံထွက်ပစ္စည်းလုပ်ငန်းရှင်များအသင်းက ဥက္ကဋ္ဌ ဦးဝင်းဌေးက ပြောသည်။
ယင်းအပြင် ဗဟိုဘဏ်မှလည်း ဘဏ္ဍာနှစ်ကုန်ဆုံးတော့မည်ဖြစ်သည့်အတွက် ဝင်ရောက်ရန်ကျန်ရှိနေသေးသည့် ပို့ကုန်ရငွေများနှင့် စပ်လျဉ်း၍ ပြည်ပသို့ ပို့ကုန်တင်ပို့မှုမှ ရရှိသည့်ပိုကုန်ဝင်ငွေကို သတ်မှတ်ရက်အတွင်း နိုင်ငံတွင်းရှိဘဏ်စာရင်းသို့ ဝင်ရောက်စေရန် ကြပ်မတ်ဆောင်ရွက်နေကြောင်း မြန်မာနိုင်ငံတော်ဗဟိုဘဏ် ဥက္ကဋ္ဌ ဒေါ်သန်းသန်းဆွေက ပြောကြားထားသည်။
မြန်မာနိုင်ငံတော်ဗဟိုဘဏ်သည် နိုင်ငံခြားသုံးငွေ စီမံခန့်ခွဲမှု ဥပဒေ ပုဒ်မ ၁၈-က၊ ပုဒ်မ ၃၈ (ခ)၊ နိုင်ငံခြားသုံးငွေ စီမံခန့်ခွဲမှု စည်းမျဉ်း အပိုဒ် ၃၅ ၊ ၃၆၊ ၃၇ နှင့် အမိန့်ကြော်ငြာစာအမှတ် (၂၇/ ၂၀၂၁) တို့အရ ပို့ကုန်တင်ပို့သူများအနေဖြင့် အာရှနိုင်ငံများသို့ တင်ပို့သည့်ပို့ကုန်များအတွက် ပို့ကုန်တင်ပို့သည့်နေ့မှ ၄၅ ရက် အတွင်း၌လည်းကောင်း၊ အာရှနိုင်ငံများမှအပအခြားနိုင်ငံများသို့တင်ပို့သည့် ပို့ကုန်များအတွက် ပို့ကုန်တင်ပို့သည့်နေ့မှ ရက်ပေါင်း ၉၀ အတွင်း၌လည်းကောင်း၊ ပို့ကုန်ရငွေများအား နိုင်ငံတော်အတွင်းရှိ ယင်း၏ဘဏ်ငွေစာရင်းသို့ ပြန်လည်ဝင်ရောက်ခြင်း ရှိ/မရှိကို ကုန်သွယ်မှုနှင့်ကုန်စည်စီးဆင်းမှုများ မှန်ကုန်မြန်ဆန်စေရေး ဗဟိုကော်မတီ၊ စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ အထူးစုံစမ်းစစ်ဆေးရေးဦးစီးဌာန၊ ကုန်သွယ်မှုနှင့်ကုန်စည်စီးဆင်းမှုများ မှန်ကန်မြန်ဆန်စေရေး လုပ်ငန်းအဖွဲတို့မှ ပူးပေါင်းစိစစ်ကြီးကြပ်နေကြောင်း သိရသည်။