ပခုက္ကူစာပေ တစ်သက်တာဆုရ ဆရာမကြီး (၂)ဦးနှင့် အခြား ဆုရသူများအား နေပြည်တော်တွင် ဆုချီးမြှင့်

(၂၉)ကြိမ်မြောက်၊ ပခုက္ကူစာပေ တစ်သက်တာဆု၊ ပခုက္ကူစာပေဆု၊ ပခုက္ကူဦးအုံးဖေ ပညာရည်ချွန်ဆုနှင့် ပခုက္ကူဦးအုံးဖေစာကြည့်တိုက်စာအုပ်ဆုများ ချီးမြှင့်ပွဲအခမ်းအနားကို ဇွန်လ (၉) ရက်၊ နံနက်ပိုင်းက နေပြည်တော်၌ ကျင်းပခဲ့ကြောင်း သိရသည်။

ပခုက္ကူ ဦးအုံးဖေ စာပေဆုသည် ၁၉၉၄ ခုနှစ်တွင် စတင်ခဲ့ခြင်းဖြစ်ပြီး သက်တမ်းရှည် ပုဂ္ဂလိကစာပေဆုတစ်ခုဖြစ်ကာ ယခုအခါတွင် တစ်သက်တာ စာပေဆုနှင့် ဘာသာရပ်ငါးမျိုးကို ဆုချီးမြှင့်လျက်ရှိပြီး ဘဝတစ်သက်တာလုံး စာပေအကျိုးကို တစိုက်မတ်မတ်စွမ်းစွမ်းတမံ သယ်ပိုးထမ်းရွက်ခဲ့သည့် စာရေးဆရာ၊ စာရေးဆရာမကြီးများကို တစ်သက်တာစာပေဆုအဖြစ် ဂုဏ်ပြုချီးမြှင့်ခဲ့သည်မှာ ယခုနှစ်ဆိုလျှင် (၃၅) ဦးအထိ ရှိပြီဖြစ်ကြောင်း ပြန်ကြားရေးဝန်ကြီးဌာန၊ ပြည်ထောင်စုဝန်ကြီး ဦးမောင်မောင်အုန်းက ပြောကြားခဲ့သည်။

အဆိုပါ အခမ်းအနားတွင် နစက အဖွဲ့ဝင် မန်းငြိမ်းမောင်က ပခုက္ကူ စာပေတစ်သက်တာဆုရ ဆရာမကြီး ဒေါက်တာရီရီလှ (ယုဝတီခင်ဦး)နှင့် ဆရာမကြီးဒေါ်တင်ရီ(တင်ရီမ-ညောင်ဦး)၊ ပြည်ထောင်စုဝန်ကြီး ဦးမောင်မောင်အုန်းမှ ဝတ္ထုရှည်ပထမဆုရ မောင်ငြိမ်းမွန် (ချောင်းဦး)၊ ဒုတိယဆုရ ပုသိမ်အောင်သန်းဦးနှင့် တတိယဆုရ ဘိုမျိုး (ရွှေ ဘို)တို့ကို ဆုများပေးအပ်ချီးမြှင့်ခဲ့ကြကြောင်း သိရသည်။

ထို့ပြင် ပြည်ထောင်စုဝန်ကြီး ဦးကိုကိုမှ ဝတ္ထုတိုပထမဆုရ စိုးမြင့်(စက်မှုတက္ကသိုလ်)၊ ဒုတိယဆုရ သက်နှင်းညိုနှင့် တတိယဆုရ ကိုကေအီး(နိဗ္ဗာန်)၊ ပြည်ထောင်စုဝန်ကြီး ဒေါက်တာမျိုးသိန်းကျော်မှ ကျမ်းစာပေ ပထမဆုရ မောင်မြကျော်၊ ဒုတိယဆုရ ကျော်သက်ခိုင်(မုံရွာ)နှင့် တတိယဆုရ သိဒ္ဓိမောင်ဒွေး၊ ပြည်ထောင်စုဝန်ကြီး Jeng Phang နော်တောင်က သုတေသနစာပေ ပထမဆုရတင်တော်၊ ဒုတိယဆုရဒေါက်တာခင်စန်းရီနှင့် တတိယဆုရ မင်းသူရိန်(ထားဝယ်)တို့ကို ဆုများပေးအပ်ချီးမြှင့်ခဲ့ကြသည်။

ထို့အတူ ဒု-ဝန်ကြီးဦးရဲတင့်က (၂၉)ကြိမ်မြောက် ပညာရည်ချွန်ဆုရ အမျိုးသားယဉ်ကျေးမှုနှင့် အနုပညာတက္ကသိုလ်(ရန်ကုန်) ရုပ်ရှင်နှင့် ပြဇာတ်ပညာဌာနမှ ဒုတိယနှစ်ကျောင်းသူ မခိုင်သဇင်သိန်းနှင့် အမျိုးသားယဉ်ကျေးမှုနှင့် အနုပညာတက္ကသိုလ်(မန္တလေး) ရုပ်ရှင်နှင့်ပြဇာတ်ပညာဌာနမှ ဒုတိယ နှစ်ကျောင်းသူ မမြတ်ရွှေစင်မှူးတို့ကို ဆုများပေးအပ်ချီးမြှင့်ခဲ့သည်။

မြန်မာနိုင်ငံ စာရေးဆရာအသင်း ဥက္ကဋ္ဌ ဦးအုန်းမောင် (မြင်းမူမောင်နိုင်မိုး)မှလည်း ကဗျာပေါင်းချုပ် ပထမဆုရ ဌေးသစ်လွင်(ပရိမ္မ)၊ ဒုတိယဆုရ ချစ်စုအောင်နှင့် တတိယဆုရ ခက်ဇော်(ကဗျာ)၊ ပခုက္ကူစာပေဆုရန်ပုံငွေကြီးကြပ်ရေးကော်မတီ ဒု-ဥက္ကဋ္ဌ ဦးသိန်းခိုင်ဦးက ပခုက္ကူဦးအုံးဖေစာကြည့်တိုက်ဆုရ MP Maung Myint ၊ အောင်တိုး (စိန်ခြယ်)နှင့် ဦးမြင့်နိုင်တို့ကို ဆုများပေးအပ်ချီးမြှင့်ခဲ့ကြကြောင်း သိရသည်။

ဆုချီးမြှင့်ပွဲတွင် တစ်သက်တာစာပေဆု အပါအဝင် ဝတ္ထုရှည်ဆု၊ ဝတ္ထုတိုပေါင်းချုပ်ဆု၊ ကဗျာပေါင်းချုပ်ဆု၊ ကျမ်းစာပေဆုနှင့် သုတေသနစာပေဆု(စုစုပေါင်း ၁၇ ဆု) ချီးမြှင့်ခဲ့ပြီး ပခုက္ကူဦးအုံးဖေစာကြည့်တိုက်ဆု (၃) ဆုနှင့် အမျိုးသားယဉ်ကျေးမှုနှင့် အနုပညာတက္ကသိုလ် ပညာသင်ဆု (၂)ဆုကိုလည်း ချီးမြှင့်ခဲ့ကြောင်း သိရသည်။