နောက်တစ်ပတ်တွင်တွေ့ရန်ထရမ့်ပ်က မိုဒီကို အိမ်ဖြူတော်သို့ ဖိတ်ခေါ် 

အမေရိကန်သမ္မတ ဒေါ်နယ်ထရမ့်ပ်က လာမည့်သီတင်းပတ်တွင် အိမ်ဖြူတော်သို့ အလည်အပတ်လာရောက်ရန် အိန္ဒိယဝန်ကြီးချုပ် နာရင်ဒြာမိုဒီကို ဖိတ်ကြားခဲ့သည်ဟု အိမ်ဖြူတော်အရာရှိတစ်ဦးက တနင်္လာနေ့တွင် အတည်ပြုပြောဆိုကြောင်း ရိုက်တာသတင်းဌာနက ဖေါ်ပြသည်။

ရာထူးတာဝန်စတင်ထမ်းဆောင်ပြီးနောက် ထရမ့်ပ်သည် ဇန်နဝါရီ ၂၇ ရက်တွင် မိုဒီနှင့် ဖုန်းဆက်သွယ်ဆွေးနွေးမှုလုပ်ခဲ့သည်။ နှစ်နိုင်ငံကုန်သွယ်မှု ညီမျှစေရေးနှင့် အမေရိကလုပ် လုံခြုံရေးဆိုင်ရာ ပစ္စည်းကိရိယာများကို အိန္ဒိယက ပိုမိုဝယ်ယူရန် အရေးပါကြောင်းကို ထရမ့်ပ်က အလေးပေးပြောကြားခဲ့သည်။

ဒေလီသည် ဝါရှင်တန်နှင့် ကုန်သွယ်မှု ဆက်ဆံရေးမြှင့်တင်ရန်နှင့် ၎င်း၏ နိုင်ငံသားများ ကျွမ်းကျင်လုပ်သားဗီဇာရရှိရေး လျင်မြန်လွယ်ကူစေရန် အသင့်ပြင်ထားသည်။ တရုတ်နိုင်ငံကို တန်ပြန်ရာတွင် အိန္ဒိယသည် အမေရိကန်ပြည်ထောင်စု၏ မဟာဗျူဟာမိတ်ဖက်နိုင်ငံအဖြစ် သတ်မှတ်ခံထားရသည်။

အိန္ဒိယသည် အမေရိကန်ထုတ်ကုန်များအပေါ် စည်းကြပ်ခွန်မြင့်မားစွာကောက်ခံမှုအတွက် အမေရိကန်သမ္မတက သတိပေးမှုလုပ်ထားခဲ့ဖူးပြီး မိုဒီနှင့် ထရမ့်ပ်တို့ ဆွေးနွေးမှုအတွင်း ယင်းကုန်သွယ်ရေးစည်းကြပ်ခွန်များကိစ္စလည်း ပါဝင်နိုင်သည်။

ဝန်ကြီးချုပ် မိုဒီ အမေရိကန်သို့ ဆောလျင်စွာ လာရောက်နိုင်ငံရေး နှစ်နိုင်ငံ တာဝန်ရှိသူများ ညှိနှိုင်းဆောင်ရွက်လျက်ရှိကြောင်းနှင့် ဖေဖော်ဝါရီလတွင် ဖြစ်နိုင်ဖွယ်ရှိကြောင်း အစောပိုင်းတွင် ဗဟိုအစိုးရက အတည်ပြုထားခဲ့သည်။

ရိုက်တာသတင်းဌာန၏ ဖော်ပြချက်အရ အမေရိကသည် အိန္ဒိယ၏ အကြီးဆုံးကုန်သွယ်ဖက်နိုင်ငံဖြစ်ပြီး နှစ်နိုင်ငံအကြား ကုန်သွယ်မှုသည် ၂၀၂၃-၂၀၂၄ ခုနှစ်တွင် ဒေါ်လာ ၁၁၈ ဘီလျံကျော်လွန်ခဲ့ပြီး ယင်းတွင် အိန္ဒိယက ကုန်သွယ်မှုပိုငွေ ဒေါ်လာ ၃၂ ဘီလျံရှိကြောင်း ဆိုခဲ့သည်။

Ref: အင်းဒီးယန်းအိတ်စ်ပရက်စ်