နေတိုးအဖွဲ့ဝင်နိုင်ငံများက PURL (ယူကရိန်း၏ လိုအပ်ချက်များကို ဦးစားပေးစာရင်း) အစီအစဉ်အောက်တွင် ဝယ်ယူထားသည့် အမေရိကန်လက်နက်များ ပေးပို့မှု စတင်နေပြီဖြစ်ကြောင်း ကိယက်ဗ်မြို့ရှိ မဟာမိတ်အဖွဲ့၏ အကြီးအကဲ ကိုယ်စားလှယ် ပက်ထရစ် တာနာက ပြောကြားသည်။
“ယူကရိန်း၏ လိုအပ်ချက်များကို ဦးစားပေးစာရင်း (PURL) အောက်ရှိ လက်နက်ပက်ကေ့ခ်ျ လေးခုအတွက် ရန်ပုံငွေ ထောက်ပံ့ပြီးဖြစ်ကာ၊ ပစ္စည်းတွေလဲ စတင်ရောက်ရှိနေပါပြီ” ဟု တာနာက ရိုက်တာသတင်းဌာနသို့ ပြောကြားခဲ့သည်။
အမေရိကန်သမ္မတ ဒေါ်နယ်ထရန့်၏ အစိုးရအဖွဲ့သည် ဥရောပရှိ နေတိုးနိုင်ငံများက ပေးချေထားသည့် ဒေါ်လာ သန်း ၅၀၀ တန်ဖိုးရှိ စစ်ရေးအကူအညီများ ပထမဆုံးအသုတ်နှစ်သုတ်ကို ခွင့်ပြုခဲ့ကြောင်း သတင်းရင်းမြစ်များကို ကိုးကား၍ စက်တင်ဘာ ၁၆ ရက်တွင် ရိုက်တာသတင်းဌာနက ရေးသားဖော်ပြခဲ့သည်။ အဆိုပါလက်နက်များကို အမေရိကန် စစ်လက်နက်သိုလှောင်ရုံများမှတဆင့် ထောက်ပံ့ပေးမည်ဖြစ်ပြီး လက်နက်အသုတ်နှစ်သုတ်စလုံးကို မကြာမီ ကိယက်ဗ်သို့ လွှဲပြောင်းပေးနိုင်ဖွယ်ရှိကြောင်းလည်း သတင်းတွင် ဖော်ပြခဲ့သည်။
ဇူလိုင်လတွင် ထရန့်က ယူကရိန်းသို့ စစ်ရေးအကူအညီပေးရေးအတွက် မူဘောင်အသစ်တစ်ခုနှင့် ပတ်သက်ပြီး အမေရိကန်နှင့် ဥရောပနိုင်ငံများက သဘောတူညီမှုရရှိခဲ့ကြောင်း ကြေညာခဲ့သည်။ ယင်းမူဘောင်အရ အမေရိကန်လက်နက် ထောက်ပံ့မှုများကို ဥရောပရှိ နေတိုးမဟာမိတ်များက ငွေပေးချေမည်ဖြစ်သည်။
မည်မျှပင် ခေတ်မီသော အနောက်တိုင်းလက်နက်များ ကိယက်ဗ်သို့ ထောက်ပံ့ပေးစေကာမူ စစ်မြေပြင်အခြေအနေကို ပြောင်းလဲနိုင်မည်မဟုတ်ကြောင်း ရုရှားသမ္မတ ဗလာဒီမာပူတင်က ထပ်ခါတလဲလဲ ပြောကြားခဲ့ပြီးဖြစ်သည်။