နိုင်ငံတော်သမ္မတ ဦးမင်းအောင်လှိုင်ထံ အီသီယိုပီးယားနိုင်ငံသံအမတ်ကြီး ဂါရဝပြုတွေ့ဆုံ

ပြည်တွင်းပဋိပက္ခများ ချုပ်ငြိမ်းရေးအတွက် ငြိမ်းချမ်းရေးအတွေ့အကြုံများ အပြန်အလှန်ဖလှယ်ရေး ဆွေးနွေး

နေပြည်တော်၊ ဇူလိုင် ၃၀

နိုင်ငံတော်သမ္မတ ဦးမင်းအောင်လှိုင်ထံ တာဝန်ပြီးဆုံး၍ ပြန်လည်ထွက်ခွာမည့် တိုကျိုမြို့အခြေစိုက် မြန်မာနိုင်ငံဆိုင်ရာ အီသီယိုပီးယားနိုင်ငံသံအမတ်ကြီး H.E. Mr. Daba Debele Hunde က ဇူလိုင် ၃၀ ရက် နံနက်ပိုင်းတွင် နေပြည်တော်၌ လာရောက်ဂါရဝပြုတွေ့ဆုံခဲ့သည်။

တွေ့ဆုံစဉ် နှစ်နိုင်ငံအကြား သံတမန်ဆက်ဆံရေးနှင့် ချစ်ကြည်ရင်းနှီးမှုများ ပိုမိုတိုးတက်ခိုင်မာရေး၊ အဆင့်မြင့်အရာရှိများ အပြန်အလှန်ချစ်ကြည်ရေးခရီးစဉ်များ တိုးမြှင့်ဆောင်ရွက်ရေး၊ လွှတ်တော်များအချင်းချင်း ဆက်ဆံရေးနှင့် ပူးပေါင်းဆောင်ရွက်မှုများ မြှင့်တင်ရေးတို့ကို ဆွေးနွေးခဲ့ကြသည်။

ထို့ပြင် ပြည်တွင်းပဋိပက္ခများ ချုပ်ငြိမ်းရေးအတွက် ငြိမ်းချမ်းရေးဖော်ဆောင်မှုဆိုင်ရာ အတွေ့အကြုံများကို နှစ်နိုင်ငံအကြား အပြန်အလှန်ဖလှယ်ရေး၊ ငြိမ်းချမ်းရေးဖော်ဆောင်မှုအဖွဲ့များ အပြန်အလှန် လေ့လာရေးခရီးစဉ်များ စေလွှတ်နိုင်ရေးကိုလည်း ဆွေးနွေးခဲ့ကြသည်။

ထို့အတူ နယ်စပ်ဒေသများ၏ တည်ငြိမ်အေးချမ်းရေး၊ နယ်စပ်ပြဿနာများကို ထိရောက်စွာ ကိုင်တွယ်ဖြေရှင်းရေး၊ နိုင်ငံအတွင်းသို့ တရားမဝင်ဝင်ရောက်လာသည့် ပြည်ပနိုင်ငံသားများကို သက်ဆိုင်ရာနိုင်ငံများသို့ စနစ်တကျ ပြန်လည်လွှဲပြောင်းပေးနေမှုနှင့် စိုက်ပျိုးရေး၊ ကုန်သွယ်ရေး၊ ခရီးသွားလုပ်ငန်း အပါအဝင် ကဏ္ဍစုံတွင် ပူးပေါင်းဆောင်ရွက်မှုများ တိုးမြှင့်ရေးကိုလည်း ဆွေးနွေးခဲ့ကြသည်။

ထို့အပြင် နှစ်နိုင်ငံပြည်သူများအကြား အပြန်အလှန်ကူးလူးဆက်ဆံမှုများ တိုးမြှင့်ရေးနှင့် မြန်မာ-အီသီယိုပီးယား နှစ်နိုင်ငံအကြား ချစ်ကြည်ရင်းနှီးမှုနှင့် ပူးပေါင်းဆောင်ရွက်မှုများကို ဆက်လက်မြှင့်တင်သွားရေးဆိုင်ရာ ကိစ္စရပ်များကိုလည်း ရင်းနှီးပွင့်လင်းစွာ အမြင်ချင်းဖလှယ် ဆွေးနွေးခဲ့ကြကြောင်း သိရသည်။