ဘန်ကောက်၊ဇန်နဝါရီ ၂၀
ထိုင်းနိုင်ငံ၌ ဇန်နဝါရီလ ၂၀ ရက်နေ့က စံချိန်တင်ဖမ်းဆီးရမိမှုအဖြစ် ခရစ်စတယ်မက်သာဖက်တမင်း တစ်တန်ခွဲကျော်ကို ဖမ်းဆီးရမိခဲ့ကြောင်း ထိုင်းမူးယစ်တိုက်ဖျက်ရေးဌာန အကြီးတန်းအရာရှိတစ်ဦးကပြောကြားခဲ့သည်။
အဆိုပါ ခရစ်စတယ်မက်သာဖက်တမင်းများသည် အာဖရိကဘက်မှ အိန္ဒိယသို့ပို့ဆောင်ကာ ထိုင်းသို့ရောက်လာခြင်းဖြစ်ပြီး အနောက်နိုင်ငံများဖြစ်သည့် ဥရောပ၊အမေရိကနှင့်ဩစတြေးလျတို့သို့ပို့မည့်ပစ္စည်းများဖြစ်သည်ဟုလည်း အာဏာပိုင်များကပြောကြားခဲ့သည်။
မူးယစ်ဆေးများသိမ်းဆည်းရမိသည့်နေရာ၌ပင် လူလေးဦးကို ဖမ်းဆီးရမိခဲ့သည်ဟုလည်းသိရသည်။အဆိုပါမူးယစ်ဆေးများကို ချည်ထည်လိပ်များအတွင်း ဝှက်ထားခြင်းဖြစ်ပြီး စုစုပေါင်း ၁ ဒသမ ၆၅ တန်ခန့်ရှိသည်ဟုလည်း တာဝန်ရှိသူတစ်ဦးကပြောကြားခဲ့သည်။
“အခုဖမ်းမိတဲ့ပမာဏဟာ ကျွန်တော်တို့ ဖမ်းဆီးအရေးယူလာတဲ့ကာလတစ်လျှောက် စံချိန်တင်အများဆုံးဖမ်းမိတဲ့ပမာဏဖြစ်ပါတယ်” ဟုလည်းပြောကြားခဲ့ပြီး ဖမ်းဆီးရမိမှု၏တန်ဖိုးကိုပြောကြားခြင်းမရှိသော်လည်း ယမန်နှစ်မေလအထိပေါက်ဈေးအရ ခရစ်စတယ်မက်သာဖက်တမင်း တစ်တန်သည် အ မေရိကန်ဒေါ်လာ ၂၅ သန်းအထိရှိခဲ့သည်။
ရွှေတြိဂံဟုခေါ်သည့် မြန်မာ၊လာအိုနှင့် ထိုင်းသုံးနိုင်ငံဆုံရာဒေသမှထွက်ရှိသည့် တရားမဝင်မူးယစ်ဆေးဝါးများကို တင်ပို့ရာ၌ ထိုင်းနိုင်ငံသည် အချက်အချာကျသည့်လမ်းကြောင်းတစ်ခုလည်းဖြစ်သည်။
Source : အေအက်ဖ်ပီ/အယ်လ်အိတ်ချ်