အမေရိကန်သယ်ယူပို့ဆောင်ရေးဌာန၏ ဖက်ဒရယ်လေကြောင်းအုပ်ချုပ်ရေးအဖွဲ့(FAA) က ထိုင်းနိုင်ငံ လေကြောင်းဘေးကင်းလုံခြုံမှုအဆင့်ကို အဆင့် ၂ မှ ၁ သို့ မြှင့်တင်ပေးမည့် လာမည့်နှစ် ဖေဖော်ဝါရီလလောက်တွင် ထိုင်းနိုင်ငံနှင့် အမေရိကန်ပြည်ထောင်စုအကြား တိုက်ရိုက်လေကြောင်းပြေးဆွဲမှုကို ပြန်စနိုင်မည်ဟု မျှော်လင့်ကြောင်း ဒုတိယဝန်ကြီးချုပ်၊ သယ်ယူပို့ဆောင်ရေးဝန်ကြီး ဆူရီယာ ဂျန်ဂရန်ဂရင်းကစ်က ပြောဆိုလိုက်သည်။
FAA သည် နိုဝင်ဘာ ၁၁ ရက်မှ ၁၅ ရက်အတွင်း ထိုင်းနိုင်ငံ မြို့ပြလေကြောင်းအာဏာပိုင်အဖွဲ့(CAAT) နှင့်အတူ စစ်ဆေးမှုလုပ်ခဲ့ရာ၌ ကျေနပ်လောက်စရာ အကဲဖြတ်ချက်များ ရရှိခဲ့ပြီးနောက် ထိုင်းနိုင်ငံ၏ လေကြောင်းဘေးကင်းမှုဆိုင်ရာ စံနှုန်းများတွင် သိသာထင်ရှားသော တိုးတက်မှုရှိခဲ့သည်ဟု မစ္စတာ ဆူရီယာက မကြာသေးမီတွင် ကြေညာခဲ့သည်။
အချို့အသေးအဖွဲ့ကိစ္စများ ကျန်ရှိနေသေးသော်လည်း ယင်းသည် အပြီးသတ်ဆုံးဖြတ်ချက်အပေါ် သက်ရောက်မှုရှိနိုင်ဖွယ်မရှိကြောင်းနှင့် ထိုင်းနိုင်ငံအနေဖြင့် လာမည့်နှစ်တွင် ဘေးကင်းလုံခြုံမှုအဆင့် ၁ အနေအထားကို ပြန်သတ်မှတ်ခံရနိုင်ပြီး နိုင်ငံ၏ လေကြောင်းကဏ္ဍအတွက် အရေးပါသောမှတ်တိုင်တစ်ခုဖြစ်လာမည်ဖြစ်ကြောင်း ၎င်းက ပြောဆိုခဲ့သည်။
ထိုင်းနိုင်ငံ၏ လေကြောင်းဘေးကင်းလုံခြုံမှုဆိုင်ရာ အခြေအနေသည် အပြည်ပြည်ဆိုင်ရာ မြို့ပြလေကြောင်းအဖွဲ့အစည်း(ICAO)၏ စံချိန်စံညွှန်းများနှင့် မကိုက်ညီဆိုသည်ကို FAA က ပြန်လည်အကဲဖြတ်ခဲ့ပြီးနောက် ၂၀၁၅ ခုနှစ် ဒီဇင်ဘာလတွင် လေကြောင်းဘေးကင်းလုံခြုံမှုအဆင့် ၂ သို့ အဆင့်နှိမ့်ချသတ်မှတ်ခဲ့ခြင်းဖြစ်သည်။
Ref: ဘန်ကောက်ပို့စ်