ထားဝယ်ရေနက်ဆိပ်ကမ်း စီမံကိန်းအတွက် လိုအပ်သည့် ဓာတ်အားပေးစက်ရုံ တည်ဆောက်ရေးဆိုင်ရာ နားလည်မှုစာချွန်လွှာ (MoU) ကို ရုရှားနှင့် မြန်မာကုမ္ပဏီများအကြား ဇွန်လ ၅ ရက်က လက်မှတ်ရေးထိုးခဲ့ကြောင်း သိရသည်။
အဆိုပါ MoU ကို ရုရှားဖက်ဒရေးရှင်းနိုင်ငံရှိ Inter RAO ကုမ္ပဏီနှင့် မြန်မာနိုင်ငံရှိ လောင်းလုံစီးပွားဖွံ့ဖြိုးကုမ္ပဏီလိမိတက်တို့မှ တာဝန်ရှိသူများက ပြည်ထောင်စုသမ္မတမြန်မာနိုင်ငံတော် ဒုတိယသမ္မတ ဦးညိုစောနှင့် ရုရှားစီးပွားရေးဖွံ့ဖြိုးတိုးတက်မှုဝန်ကြီးတို့၏ ရှေ့မှောက်တွင် လက်မှတ်ရေးထိုးပြီး စာချွန်လွှာများ အပြန်အလှန် လဲလှယ်ခဲ့ကြကြောင်း သိရသည်။
အဆိုပါ လက်မှတ်ရေးထိုးပွဲကို ရုရှားနိုင်ငံ စိန့်ပီတာစဘတ်မြို့ရှိ EXPOFORUM Convention and Exhibition Centre ၌ ကျင်းပသည့် (၂၉) ကြိမ်မြောက် စိန့်ပီတာစဘတ် နိုင်ငံတကာစီးပွားရေးဖိုရမ် (SPIEF 2025) ကာလအတွင်း ပြုလုပ်ခဲ့ခြင်းဖြစ်ကြောင်း သိရသည်။
ဖိုရမ်သို့ ဒုတိယသမ္မတ ဦးညိုစော ဦးဆောင်သည့် မြန်မာကိုယ်စားလှယ်အဖွဲ့ တက်ရောက်ခဲ့ပြီး ရုရှားသမ္မတ ဗလာဒီမာ ပူတင် (Vladimir Putin)၊ ဥဇဘက်ကစ္စတန်သမ္မတ ရှက်ကတ် မာဇီယိုယက်ဗ် (Shavkat Mirziyoyev)၊ တန်ဇန်းနီးယားသမ္မတ ဆာမီယာ ဆူလူဟူ ဟာဆန် (Samia Suluhu Hassan) နှင့် တရုတ်ဒုတိယသမ္မတ ဟန်ကျန့် (Han Zheng) တို့အပါအဝင် နိုင်ငံအသီးသီးမှ ခေါင်းဆောင်များ၊ အစိုးရအရာရှိများနှင့် စီးပွားရေးလုပ်ငန်းရှင်များ တက်ရောက်ခဲ့ကြောင်း သိရသည်။
ထို့ပြင် ဇွန်လ ၄ ရက်ကလည်း မြန်မာနိုင်ငံ အမျိုးသားစီမံကိန်း၊ ရင်းနှီးမြှုပ်နှံမှုနှင့် နိုင်ငံခြားစီးပွားဆက်သွယ်ရေးဝန်ကြီးဌာန၊ စီးပွားရေးနှင့် ကူးသန်းရောင်းဝယ်ရေးဝန်ကြီးဌာနတို့နှင့် ရုရှားဖက်ဒရေးရှင်းနိုင်ငံ Roscongress Foundation ၏ RC-Investments အဖွဲ့တို့အကြား စီးပွားရေးနှင့် ရင်းနှီးမြှုပ်နှံမှု ပူးပေါင်းဆောင်ရွက်ရေးဆိုင်ရာ နားလည်မှုစာချွန်လွှာ (MoC) များကို လက်မှတ်ရေးထိုးကာ အပြန်အလှန် လဲလှယ်ခဲ့ကြကြောင်း သိရသည်။