တောင်ကိုရီးယား၌ လုပ်သားရှားပါးမှုကြောင့် စက်ရုပ်များ အစားထိုး သုံးလာ

တောင်ကိုရီးယား၌ လုပ်သားရှားပါးမှုကြောင့် စက်ရုပ်များ အစားထိုး သုံးလာ

ဆိုးလ်၊ ဩဂုတ် 22

တောင်ကိုရီးယားနိုင်ငံတွင် လုပ်သားရှားပါးမှုနှင့် အနိမ့်ဆုံးလုပ်ခလစာ တိုးမြှင့်သတ်မှတ်မှုတို့ကြောင့် ထောက်ပံ့ပို့ဆောင်ရေးနှင့် စားသောက်ဆိုင်လုပ်ငန်းများသည် လူလုပ်သားများအစား စက်ရုပ်လုပ်သားများကို အစားထိုးအသုံးပြုလာကာ ကုမ္ပဏီများစွာကိုလည်း စက်ရုပ်လုပ်သားများ အသုံးလာပြုရန် လှုံ့ဆော်ပေးလျက်ရှိသည်။

သယ်ယူပို့ဆောင်ရေးကုမ္ပဏီကြီးများသည် အထုပ်အပိုးကိုင်တွယ်ရာတွင် ပိုမိုချောမွေ့ထိရောက်လာစေရန် သယ်ယူပို့ဆောင်ရေးစက်ရုပ်များကို အသုံးပြုလာပြီး အစားအသောက် ပို့ဆောင်ရေး ဝန်ဆောင်မှုပေးသည့် ကုမ္ပဏီကြီးနှင့် စတိုးဆိုင်တို့သည်လည်း ဝယ်ယူသုံးစွဲသူတို့၏ ပစ္စည်းများကို အိမ်တိုင်ရာရောက် ပို့ဆောင်ရန် အလိုအလျောက် စက်ရုပ်များကို စတင် စမ်းသပ်အသုံးပြုနေပြီဖြစ်သည်။

ဆိုးလ်အနီး ဂွန်ပို မြို့ရှိ အွန်လိုင်းလက်လီရောင်းချသူများကိုယ်စား ထုပ်ပိုးခြင်းနှင့် ပို့ဆောင်ခြင်းဝန်ဆောင်မှုများကို လုပ်ဆောင်ပေးသည့် CJ Logistics ၏ ဂိုဒေါင် တစ်ခုတွင် သယ်ယူပို့ဆောင်ရေး စက်ရုပ်များကို အသုံးပြုလျက်ရှိသည်။

အဆိုပါ ဂိုဒေါင်၏ ဒုတိယထပ်တွင် အမြင့် ၂၇၈ စင်တီမီတာရှိသော ဂိုဒေါင်စင်ပေါင်း ၆၃၀ ရှိပြီး စက်ရုပ် ၁၀၁ ခုတို့က ၎င်းစင်ပေါ်တွင် ကုန်ပစ္စည်းများ တင်ဆောင်ကာ ရွှေ့ပြောင်းပေးနေကြောင်း သိရသည်။

သမားရိုးကျ ထုပ်ပိုးခြင်းနှင့် ပို့ဆောင်ခြင်းလုပ်ငန်းတွင် အလုပ်သမားများသည် စင်ရှိရာသို့သွားကာ မှာယူထားသည့် ကုန်ပစ္စည်းများကို သယ်လာ၍ တွန်းလှည်းများပေါ်တွင် တင်ကြရသည်။ CJ သည် စက်ရုပ်များကို အစားထိုးအသုံးပြုကာ ထိုလုပ်ငန်းစဉ်ကို ပြောင်းလဲခဲ့သည်။

ယနေ့ခေတ် စားသောက်ဆိုင်လုပ်ငန်းတွင်လည်း စက်ရုပ်များ အသုံးပြုလာသည်ကို သိသိသာသာ မြင်တွေ့လာရသည်။

တောင်ကိုရီးယား၌ စက်ရုပ်စားပွဲထိုးများကို လွန်ခဲ့သော သုံးနှစ်ခန့်က စတင်မိတ်ဆက်ခဲ့ပြီး ယခုအခါတွင် စက်ရုပ်စားဖိုးမှူများကိုလည်း နေရာအတော်များများ၌ အသုံးပြုလာကြသည်ကိုပင် မြင်တွေ့နေရပြီ ဖြစ်သည်။

ထို့အပြင် မကြာသေးမီက ဆိုးလ်မြို့ရှိ ရထားဘူတာရုံကြီးတစ်ခု၌ စက်ရုပ်ကော်ဖီဆာဗာတစ်ခုကို ပွဲထုတ်ခဲ့သည်။ အဆိုပါ ကော်ဖီဖျော်စက်ရုပ်သည် ယခုအခါ သေးငယ်ပြီး ဦးစီးသူမရှိသည့် ကော်ဖီဆိုင်တွင် နေ၍ အလုပ်လုပ်ကာ မြေအောက်ရထားဘူတာရုံများရှိ လူများအား ကော်ဖီဖျော်ပေးနေသည်ကို မြင်တွေ့ရသည်။

တောင်ကိုရီးယား ကုမ္ပဏီတစ်ခုသည် အများပြည်သူပိုင် လမ်းများပေါ်တွင် ကုန်ပစ္စည်းများ ပို့ဆောင်ပေးသည့် စက်ရုပ်များကို စတင် စမ်းသပ် အသုံးပြုနေပြီဖြစ်သည်။

အဆိုပါစမ်းသပ်မှုကို နိုင်ငံ၏အကြီးဆုံး အစားအစာပေးပို့သော အက်ပ်၏ အော်ပရေတာ ဖြစ်သည့် ဝူးဝါ ဘရားသားစ် ကတီထွင်ထားသော ဒေးလီးဒရိုက် အမည်ရသည့် သေးငယ်သောပို့ဆောင်ရေးစက်ရုပ်ကို အသုံးပြုကာ စတင်ခဲ့ခြင်းဖြစ်သည်။

ဝူးဝါ သည် စားသုံးသူထံမှ အမှာစာကို လက်ခံရရှိသောအခါ ဒေးလီးဒရိုက် စက်ရုပ်ကို စားသောက်ဆိုင်တစ်ခုသို့ ပို့ဆောင်မည်ဖြစ်သည်။ စားသောက်ဆိုင်ဝန်ထမ်းတစ်ဦးက မှာယူထားသည့် ဟင်းပွဲကို ၎င်းစက်ရုပ်ပေါ်သို့ ထုတ်ပိုးပေးလိုက်သောအခါ စက်ရုပ်သည် ထိုဟင်းပွဲကို တင်ဆောင်ကာ လမ်းသွားလမ်းလာများနှင့် ယာဉ်ကြောပိတ်ဆို့မှုများကို ဂရုတစိုက် ရှောင်ရှား၍ စားသုံးသူထံ အရောက်ပို့ဆောင်ပေးမည် ဖြစ်သည်။

တောင်ကိုရီးယားနိုင်ငံ၏ က‌ေလး‌ေမွးဖွားနှုန်းသည် ကမ္ဘာပေါ်တွင် အနိမ့်ဆုံးဖြစ်လာသောကြောင့် မကြာမီကာလအတွင်း လူဦးရေ လျင်မြန်စွာကျဆင်းမှုနှင့် ရင်ဆိုင်ရမည်ဟု ခန့်မှန်းရသည်။ ထို့ကြောင့် လုပ်သားရှားပါးမှုကို ဖြေလျှော့ရန် စက်ရုပ်များကို အခြားနိုင်ငံများထက် ပို၍လက်ခံ အသုံးပြုလာနိုင်ဖွယ်ရှိနေသည်။

Source: Nikkei Asia