ရှမ်းပြည်နယ်အရှေ့ပိုင်း ၊ တာချီလိတ်မြို့တွင် ထိုင်းနှင့် လာအိုနိုင်ငံတို့မှ လျှပ်စစ်မီး ရရှိသည်ဖြစ်စေ၊ မရရှိသည်ဖြစ်စေ လျှပ်စစ်ဓာတ်အား အသုံးပြုနိုင်ရေးအတွက် ဆိုလာစနစ်အသုံးပြုသည့် ဓာတ်အားဖြန့်ဖြူးရေးစက်ရုံ တည်ဆောက်ရန်ဆွေးနွေးခဲ့ကြကြောင်း သိရသည်။
ယမန်နေ့ ဖေဖော်ဝါရီ (၁၀)ရက် နံနက်ပိုင်းက တာချီလိတ်မြို့နယ်အတွင်းလတ်တလော ဖြစ်ပေါ်နေသော စက်သုံးဆီလုံလောက်စွာရရှိရေးနှင့် လျှပ်စစ်ဓာတ်အား ဖြန့်ဝေပေးနေသည့် ကိစ္စရပ်များနှင့် စပ်လျဉ်း၍ ဒေသတာဝန်ရှိသူများနှင့် အရပ်ဖက် ဦးဆောင်ကော်မတီများ၊ မြို့မိမြို့ဖများတွေ့ဆုံဆွေးနွေးစဉ် ယင်းသို့ထည့်သွင်းဆွေးနွေးခဲ့ကြခြင်းဖြစ်သည်။
ဆွေးနွေးအတွင်း ဆိုလာစနစ်နှင့် လျှပ်စစ်ဓာတ်အားသုံးစွဲ ဖြန့်ဖြူးနိုင်ရေးအတွက် အမြန်ဆုံးလုပ်ဆောင်ရန် ၊ ခန့်မှန်းကုန်ကျစရိတ် တွက်ချက်ခြင်းအပါအဝင် ရေအားလျှပ်စစ် ဖော်ထုတ်ရေးကိစ္စရပ်များကိုပါ ထည့်သွင်းဆွေးနွေးခဲ့ကြကြောင်း သိရသည်။
တာချီလိတ်မြို့အတွင်း လျှပ်စစ်ဓာတ်အားလိုအပ်သည့် မဂ္ဂါဝပ်ပမာဏမှာ (၃၅) မဂ္ဂါဝပ် ဝန်းကျင်ရှိနေသော်လည်း လတ်တလော လာအိုနိုင်ငံဘက်မှ (၁၃) မဂ္ဂါဝပ်ကိုသာရရှိသဖြင့် အလှည့်ကျ မီးပေးသည့်စနစ်ဖြင့် အသုံးပြုနေကြရသည့်အပေါ် ထည့်သွင်းဆွေးနွေးခဲ့ကြသည်။
လက်ရှိတွင် ထိုင်းနိုင်ငံမှ လောင်စာဆီ စက်သုံးဆီတင်ပို့မှုအား ကြိုတင်အကြောင်းမကြားဘဲ ကန့်သတ်လိုက်ခြင်းကြောင့် ဒေသတွင်း ဆီလိုအပ်မှုများကို အလျင်မီနိုင်ရေး ဆောင်ရွက်ရန် ကြိုးပမ်းလျက်ရှိကြောင်း သိရသည်။
လောင်စာဆီအား ထိုင်းနိုင်ငံမှ တင်သွင်းမည်ဆိုခြင်းထက် ပြည်မမှတင်သွင်းနိုင်ရေးအတွက် ဒေသဆိုင်ရာတာဝန်ရှိသူများနှင့် စက်သုံးဆီလုပ်ငန်းရှင် အသင်းများအား ချိတ်ဆက် ဆောင်ရွက်ပေးသွားမည်ဖြစ်ကြောင်းလည်း ဆွေးနွေးခဲ့ကြကြောင်း သိရသည်။
လက်ရှိ ထိုင်းနိုင်ငံဘက်တွင် ရပ်တန့်ထားရသည့် စက်သုံးဆီယာဉ်များအနက် အစီးရေ(၅၀)ခန့်မှာ ငွေရှင်းပြီး ဖြစ်နေသဖြင့် တာချီလိတ် မြို့နယ်အတွင်း ဝင်ရောက်နိုင်ရေး လာအိုနိုင်ငံဘက် လမ်းကြောင်းမှတဆင့် တာချီလိတ်မြို့နယ် ဝမ်ပုံဆိပ်ကမ်းသို့ ဝင်နိုင်ရေး စတင်ဆောင်ရွက်လျက်ရှိသည်များ ဆွေးနွေးခဲ့ကြကြောင်း သိရသည်။