တရုတ် – မြန်မာ နှစ်နိုင်ငံ ကုန်သွယ်မှု ကဏ္ဍအပါအဝင် ပူးပေါင်းလုပ်ဆောင်မည့် လုပ်ငန်းများနှင့် ပတ်သက်၍တရုတ်ကွန်မြူနစ်ပါတီ ယူနန်ပြည်နယ်အတွင်းရေးမှူး မစ္စတာဝန်နင်ဦးဆောင်သည့်အဖွဲ့နှင့် မြန်မာအစိုးရတို့အကြား ပူးပေါင်းလုပ်ဆောင်မည့် လုပ်ငန်းများနှင့် ပတ်သက်၍ သဘောတူလက်မှတ်ရေးထိုးမှုများ ဆောင်ရွက်ခဲ့ကြောင်း သိရသည်။
အဆိုပါ သဘောတူလက်မှတ်ရေးထိုးမှုနှင့် ပတ်သက်၍ နိုင်ငံပိုင်သတင်းဌာနများကတဆင့် ယနေ့ ဧပြီလ (၃) ရက်တွင် ထုတ်ပြန်လာခြင်း ဖြစ်သည်။
တရုတ်နှင့် မြန်မာအစိုးရတို့အကြား ပူးပေါင်းဆောင်ရွက်ရန် သဘောတူညီမှု ရယူထားသည့် လုပ်ငန်းများတွင် ဆန်စပါး၊ ဓာတ်မြေဩဇာနှင့် လျှပ်စစ်ဆိုင်ရာ လုပ်ငန်းများပါဝင်ပြီး အသေးစိတ် အချက်အလက်များကို ထုတ်ဖော်ပြောကြားထားခြင်း မတွေ့ရပေ။
ပြီးခဲ့သည့် ရက်ပိုင်းအတွင်းက မြန်မာနိုင်ငံသို့ ရောက်ရှိလာသည့် ယူနန်ပြည်နယ်အတွင်းရေးမှူး မစ္စတာ ဝန်နင်ဦးဆောင်သည့်အဖွဲ့နှင့် နစက၏ အပြည်ပြည်ဆိုင်ရာ ပူးပေါင်းဆောင်ရွက်ရေး ဝန်ကြီး ဦးကိုကိုလှိုင် ဦးဆောင်သည့်အဖွဲ့တို့အကြား လက်မှတ်ရေးထိုးခဲ့သည့် သဘောတူညီမှုများထဲတွင် ဆန်စပါးထောက်ပံ့ရေး၊ ဓာတ်မြေဩဇာ ထောက်ပံ့ရေး၊ ကျောက်ဖြူအနာဂတ်ရွေ့လျား ဆေးခန်းစီမံကိန်း အပါအဝင် မြန်မာနိုင်ငံမှ စိုက်ပျိုးရေး ထုတ်ကုန်များကို တရုတ်နိုင်ငံ ယူနန်ပြည်နယ်အတွင်း တင်ပို့ရေး ကိစ္စများပါဝင်ကြောင်း သိရသည်။
ထို့အပြင် ၂၀၀၇ – ၂၀၀၈ ဘဏ္ဍာနှစ်ကတည်းက တရုတ်အစိုးရက တာဝန်ယူတည်ဆောက်ခဲ့သည့် ကချင် ပြည်နယ်အတွင်းရှိ တာပိန်(၁) ရေအားလျှပ်စစ်စခန်းနှင့် ပတ်သက်သည့် သဘောတူညီချက်လည်း ပါဝင်ကြောင်း သိရသည်။
တရုတ်ကွန်မြူနစ်ပါတီ၏ ယူနန်ပြည်နယ် အတွင်းရေးမှူး မစ္စတာဝန်နင်နှင့် အဖွဲ့သည် မြန်မာနိုင်ငံသို့ ဧပြီလ (၁) ရက်က စတင်ရောက်ရှိခဲ့ခြင်းဖြစ်ပြီး တရုတ် – မြန်မာနှစ်နိုင်ငံအကြား ပူးပေါင်းဆောင်ရွက်မည့် ကိစ္စရပ်များနှင့် ပတ်သက်၍ နစက တာဝန်ရှိသူများနှင့် ဆွေးနွေးမှုများ လုပ်ဆောင်နေခြင်း ဖြစ်သည်။
မြန်မာ – တရုတ် နှစ်နိုင်ငံအကြား ကုန်စည်စီးဆင်းမှုများနှင့် ပတ်သက်၍ တရုတ်နိုင်ငံ ယူနန်ပြည်နယ်သည် အဓိက ဝင်ထွက်ပေါက် တစ်ခုကဲ့သို့ ဖြစ်နေသည့်အတွက် မစ္စတာဝန်နင်၏ မြန်မာခရီးစဉ်သည် တရုတ် – မြန်မာ နှစ်နိုင်ငံကုန်သွယ်မှုအတွက် အထောက်အကူပြုနိုင်ကြောင်း နယ်စပ်ကုန်သွယ်လမ်းကြောင်းတွင် အလုပ်လုပ်ကိုင်သူများက သုံးသပ်မှုများလည်း ရှိသည်။
