တရုတ်နှင့် လာအိုတို့ ပူးပေါင်း၍ AI ဆန်းသစ်တီထွင်မှု ပူးပေါင်းဆောင်ရွက်ရေးစင်တာတည်ဆောက်မည်

ဗီယန်ကျင်း၊ ဖေဖော်ဝါရီ ၂၅

တရုတ်နိုင်ငံ၏ ကွမ်ရှီး ဇွမ် ကိုယ်ပိုင်အုပ်ချုပ်ခွင့်ရ ဒေသနှင့် လာအိုနိုင်ငံတို့ပူးပေါင်း၍ တနင်္ဂနွေနေ့တွင် တရုတ်-လာအို ဉာဏ်ရည်တု နည်းပညာ ဆန်းသစ်မှု ပူးပေါင်းဆောင်ရွက်ရေးစင်တာ ပူးတွဲတည်ထောင်ရန် သဘောတူညီ လက်မှတ်ရေးထိုးခဲ့သည်။

ဤသဘောတူညီမှုသည် တရုတ်နှင့် အရှေ့တောင်အာရှနိုင်ငံများအကြားတွင် ပထမဆုံးဦးဆုံး ဉာဏ်ရည်တု နည်းပညာ ပူးပေါင်းဆောင်ရွက်မှုနှင့် ဆန်းသစ်မှု ပလက်ဖောင်း အဖြစ် လက်မှတ်ရေးထိုးခြင်း ဖြစ်သည်။ ၎င်းသည် နည်းပညာခေတ်တွင် လာအိုနိုင်ငံ၏ ဉာဏ်ရည်တု နည်းပညာ နှင့် ပတ်သတ်သော အခြေခံစွမ်းရည်များကို စနစ်တကျ ဖွံ့ဖြိုးတိုးတက်လာစေရန်နှင့် အရှေ့တောင်အာရှနိုင်ငံများတွင် ကဏ္ဍအသီးသီး၏ ဖွံ့ဖြိုးတိုးတက်မှုကို အားကောင်းလာစေရန် ရည်ရွယ်ထားသည်။

ဆွေးနွေးပွဲတွင် ပါဝင်သည့် ကွမ်ရှီး ကိုယ်စားလှယ်အဖွဲ့၏အဆိုအရ တရုတ်နှင့် လာအို၏ ပူးပေါင်းကြိုးပမ်းမှုကြောင့် ဤစီမံကိန်းသည် စေ့စပ်ဆွေးနွေးညှိနှိုင်းမှုမှ စတင်ပြီး လက်မှတ်ရေးထိုးခြင်းအထိ အချိန်တိုအတွင်း ပြီးစီးခဲ့သည်။ ၎င်းသည် ဉာဏ်ရည်တု နည်းပညာ ကဏ္ဍတွင် ပူးပေါင်းဆောင်ရွက်မှု ပိုမိုနက်ရှိုင်းစေရန် နှစ်နိုင်ငံစလုံး၏ ခိုင်မာသော သဘောတူညီမှုနှင့် ထိရောက်စွာ အကောင်အထည်ဖော်မှုကို အပြည့်အဝပြသနေပါသည်။

ကွမ်ရှီး ကိုယ်စားလှယ်အဖွဲ့ မှပြောကြားချက်အရ ယခုကဲ့သို့ အောင်မြင်မှုသည် ဉာဏ်ရည်တု နည်းပညာ ဖွံ့ဖြိုးတိုးတက်မှုအတွက် အခွင့်အလမ်းများကို ရယူရှာဖွေရာတွင် တရုတ်နှင့် လာအိုတို့၏ လက်တွေ့ဆန်သော ချဉ်းကပ်မှုများကို တွေ့မြင်နိုင်ပါသည်။ ရေရှည်တည်တံ့ပြီး အားလုံးပါဝင်သော ဒစ်ဂျစ်တယ် ပတ်ဝန်းကျင် ဂေဟစနစ်တစ်ခု ကိုတည်ဆောက်ရာတွင် လွယ်ကူချော့မွေ့စွာပူးပေါင်းဆောင်ရွက်နိုင်ရန် တရုတ်-အာဆီယံ ပူးတွဲကြေညာချက် ကို နှစ်ဘက်လုံးက လိုက်နာ ဆောင်ရွက်ခြင်းဖြစ်ကြောင်း ကွမ်ရှီး ကိုယ်စားလှယ် အဖွဲ့ကထပ်မံပြောကြားခဲ့သည်။

ကွမ်ရှီး နှင့် အာဆီယံနိုင်ငံများသည် တရုတ်-အာဆီယံ ဉာဏ်ရည်တု နည်းပညာ ဆန်းသစ်တီထွင်မှု ပူးပေါင်းဆောင်ရွက်ရေးဗဟိုဌာနကို တရုတ်အစိုးရမှ အဆိုပြုထားသည့် အားလုံးအတွက် ပိုမိုကောင်းမွန်သော ဉာဏ်ရည်တု နည်းပညာ စွမ်းရည်တည်ဆောက်ရေး လုပ်ဆောင်ချက်အစီအစဉ် ကို အကောင်အထည်ဖော်ရန်နှင့် ကမ္ဘာလုံးဆိုင်ရာ ဉာဏ်ရည်တု နည်းပညာ ဖွံ့ဖြိုးတိုးတက်မှုကို မြှင့်တင်ရန် ရည်ရွယ်၍ ပူးပေါင်းတည်ထောင်ထားခြင်းဖြစ်သည်။

ရှေ့ဆက်၍ ကွမ်ရှီး သည် ဤပူးပေါင်းဆောင်ရွက်မှုမှ အစပြု၍ အာဆီယံနိုင်ငံများနှင့် တရုတ်-အာဆီယံ ဉာဏ်ရည်တု နည်းပညာ ဆန်းသစ်တီထွင်မှု ပူးပေါင်းဆောင်ရွက်ရေးစင်တာများကို ပူးတွဲတည်ထောင်ရန် ရည်ရွယ်ထားသည်။ ထို့အပြင် အာဆီယံနိုင်ငံများအား နိုင်ငံအလိုက် သီးခြားလွတ်လပ်၍ ထိန်းချုပ်နိုင်သော ဉာဏ်ရည်တု နည်းပညာ အပေါ် လုပ်ပိုင်ခွင့်ခွင့် အပြည့်ရှိသောပုံစံကို တည်ဆောက်ရန်ကူညီပံ့ပိုးပေးမည်ဖြစ်သည်။ ဉာဏ်ရည်တု နည်းပညာ ၊ နိုင်ငံဖြတ်ကျော်ဒေတာ လွှဲပြောင်းပို့ဆောင်ဖလှယ်ခြင်း ၊ စွမ်းရည်မြှင့်သင်တန်းများနှင့် အခြားနယ်ပယ်များတွင် တရုတ်နှင့် အာဆီယံအကြား ပူးပေါင်းဆောင်ရွက်မှုကို တိုးတက်မြှင့်တင်သွားမည်ဖြစ်သည်။

ဤစီမံကိန်း၏ အဓိကရည်ရွယ်ချက်မှာ ဉာဏ်ရည်တု နည်းပညာကို တိုးတက်မြှင့်တင်ပြီး ဆန်းသစ်တီထွင်မှုများ လုပ်ဆောင်နိုင်ရန် အားပေးခြင်း၊ အာဆီယံ နိုင်ငံများ၏ ဘာသာစကားများနှင့် ယဉ်ကျေးမှု များကို ဒစ်ဂျစ်တယ်ပုံစံဖြင့် ထိန်းသိမ်းစောင့်ရှောက်နိုင်ရန် ပံ့ပိုးမှုများပြုလုပ်ခြင်း၊ လူသားမျိုးနွယ် အားလုံးအတွက် အကျိုးရှိစေမည့် ဉာဏ်ရည်တု နည်းပညာ အသုံးချမှု အဆင့်မြှင့်တင်ခြင်း၊ ဉာဏ်ရည် အဆင့်အတန်းနှင့် လူမှုဖူလုံရေးကို တိုးတက်စေရေး ကူညီပံ့ပိုးရန် ရည်ရွယ်ပါသည်။

Ref: ရှင်းဟွာ