မြန်မာ – တရုတ်နှစ်နိုင်ငံကြား ကုန်သွယ်မှုလုပ်ငန်းများအဆင်ပြေချောမွေ့စေရန် ပူးပေါင်းဆောင်ရွက်မှုတိုးမြှင့်ရေးနှင့်ပတ်သက်၍ နစက ဒုတိယ ဝန်ကြီးချုပ်တစ်ဦးဖြစ်သည့် စီမံကိန်းနှင့် ဘဏ္ဍာရေးဝန်ကြီးဌာန ပြည်ထောင်စုဝန်ကြီး ဦးဝင်းရှိန်က ပြောသည်။
မေ (၂၅) ရက် နံနက်ပိုင်းက နေပြည်တော်ရှိ MICC-2 ၌ ကျင်းပခဲ့သည့် မြန်မာ – တရုတ် စီးပွားရေးကုန်စည်ပြပွဲ (စတုတ္ထအကြိမ်) ဖွင့်ပွဲအခမ်းအနားတွင် ပြောကြားခဲ့ခြင်းဖြစ်သည်။
မြန်မာနိုင်ငံ၏ ကုန်သွယ်ဖက်နိုင်ငံများကြားတွင် တရုတ်နိုင်ငံသည် အဓိကကုန်သွယ်ဖက်နိုင်ငံတစ်ခုအဖြစ် နှစ်စဉ် ရပ်တည်လျက်ရှိကာ ဒေသတွင်း ပူးပေါင်းဆောင်ရွက်မှု သဘောတူညီချက်များအရ နယ်စပ်ဖြတ်ကျော် ကုန် သွယ်မှု၏ အခန်းကဏ္ဍသည်လည်း ယခင်ထက် ပိုမိုအရေးပါလာကာ တရုတ် – မြန်မာကုန်သွယ်မှုဖွံ့ဖြိုးတိုးတက်ရေးအတွက် အလားအလာကောင်းများရှိနေကြောင်းလည်း ဝန်ကြီးက ဆိုသည်။
ထို့ကြောင့် နှစ်နိုင်ငံကြား ကုန်သွယ်မှုလုပ်ငန်းများ အဆင်ပြေချောမွေ့စေရန် အစိုးရ အချင်းချင်းသာမက ပုဂ္ဂလိကလုပ်ငန်းရှင်များ အချင်းချင်း ပူးပေါင်းဆောင်ရွက်မှုများ တိုးမြှင့်ဆောင်ရွက်ရမည်ဟုလည်း ဆိုသည်။
ထို့အပြင် နှစ်ဖက်နယ်စပ်ကုန်သွယ်ရေးဖွံ့ဖြိုးတိုးတက်ရန် နယ်စပ်ဒေသများတွင် ဘဏ်လုပ်ငန်းစနစ်များ ဖွံ့ဖြိုးတိုးတက်ရေး၊ထောက်ပံ့ပို့ဆောင်မှုလုပ်ငန်းများပိုမိုတိုးတက်ရေးနှင့်ကုန်သွယ်မှုဆိုင်ရာ လုပ်ထုံးလုပ်နည်းများလွယ်ကူစေရေးတို့ကိုလည်း နှစ်ဖက်ပူးပေါင်းဆောင်ရွက်ရန်လည်း တိုက်တွန်းပြောကြားခဲ့သည်။
ထို့ပြင် မြန်မာနိုင်ငံဆိုင်ရာ တရုတ်နိုင်ငံ သံအမတ်ကြီး H. E. Mr. Chen Hai မှလည်း တရုတ်နိုင်ငံအနေဖြင့် မြန်မာနိုင်ငံနှင့်အတူ အပြန်အလှန် သင်ယူလေ့လာမှုအားကောင်းစေရန်၊ချစ်ခင်ရင်းနှီးသည့် ပူးပေါင်းဆောင်ရွက်မှု နက်ရှိုင်းလာစေရန်၊ မြန်မာနိုင်ငံကို ထောက်ခံအားပေးရန်၊ မြန်မာနိုင်ငံ၏ ငြိမ်းချမ်းရေး၊ တည်ငြိမ်မှုနှင့် ဖွံ့ဖြိုးတိုးတက်မှုအတွက် တရုတ်နိုင်ငံမှ ပံ့ပိုးကူညီရန် ဆန္ဒရှိသည်ဟု ပြောကြားခဲ့သည်။
စတုတ္ထအကြိမ်မြောက် ကုန်စည်ပြပွဲတွင် မြန်မာနိုင်ငံမှ ကုန်သည်လုပ်ငန်းရှင်အသင်းအဖွဲ့များနှင့် ကုမ္ပဏီ (၆၅) ခု က ပြခန်းပေါင်း (၇၉) ခန်း၊ တရုတ်နိုင်ငံကုန်သည်လုပ် ငန်းရှင် (၇၀) ခုက ပြခန်းပေါင်း (၄၀) ခန့်ဖြင့် ဒေသထွက်စားသောက်ကုန်များ၊ အမှတ်တရ လက်ဆောင်ပစ္စည်းများ၊ ကျောက်မျက် ရတနာများ၊ လက်ဖက်နှင့် ကော်ဖီ၊လယ်ယာထွက်ကုန်များ၊ ကြိမ်နှင့် ဝါးထွက်ကုန်များ၊ သစ်သားပန်းပုများ၊ ပရိဘောဂများနှင့် ဘဏ်လုပ်ငန်း၊ ခရီးသွားလုပ်ငန်းများမှ ပြခန်းများ ဖွင့်လှစ်ပြသလျက်ရှိသည်။
