ဟော်မုဇ်ရေလက်ကြား၏ပုံမှန်သွားလာမှုကို အမြန်ဆုံးပြန်လည်ဖော်ဆောင်ရန်တိုက်တွန်း
တရုတ်ကွန်မြူနစ်ပါတီဗဟိုကော်မတီ၊ နိုင်ငံရေးရာဗျူ ရိုအဖွဲ့ဝင်နှင့် နိုင်ငံခြားရေးဝန်ကြီး Mr. Wang Yi နှင့် ပါကစ္စတန်နိုင်ငံ ဒု-ဝန်ကြီးချုပ်နှင့် နိုင်ငံခြားရေးဝန်ကြီး Mr. Ishaq Dar တို့ မတ် ၃၁ ရက်က ပေကျင်းမြို့၌တွေ့ဆုံ၍ ပင်လယ်ကွေ့ဒေသနှင့် အရှေ့အလယ်ပိုင်းဒေသ အခြေအနေများကိုဆွေးနွေးခဲ့ကြသည်။
တွေ့ဆုံစဥ် ရေကြောင်းသွားလာမှုဘေးကင်းလုံခြုံရေးကိုအာမခံချက်ရှိစေရန်အတွက် ဟော်မုဇ်ရေလက်ကြားနှင့် အနီးတစ်ဝိုက်ရေပြင်များသည် အပြည်ပြည်ဆိုင်ရာ ကုန်စည်နှင့် စွမ်းအင်ကုန်သွယ်မှုအတွက်အရေးကြီးသောလမ်းကြောင်းများဖြစ်ခြင်းကို ဆွေးနွေးခဲ့ကြသည်။
ထို့ပြင် တရုတ်နိုင်ငံနှင့် ပါကစ္စတန်နိုင်ငံတို့မှ သက်ဆိုင်ရာအဖွဲ့အစည်းများအား ဟော်မုဇ်ရေလက်ကြားအတွင်းပိတ်မိနေသော သင်္ဘောများနှင့် သင်္ဘောသားများ၏ ဘေးကင်းရေးကိုကာကွယ်ရန်၊ အရပ်ဘက်ကုန်သွယ်ရေးသင်္ဘောများအမြန်ဆုံးဘေးကင်းစွာဖြတ်သန်းသွားလာနိုင်ရေးစီစဉ်ပေးရန်နှင့် ရေလက်ကြား၏ ပုံမှန်သွားလာမှုကိုအမြန်ဆုံးပြန်လည်ဖော်ဆောင်ရန် တိုက်တွန်းခဲ့ကြသည်။
ထို့အတူ အပြည်ပြည်ဆိုင်ရာလူသားချင်းစာနာထောက်ထားမှုဆိုင်ရာဥပဒေများကို အပြည့်အဝလိုက်နာရန်၊ စွမ်းအင်၊ ရေချိုထုတ်လုပ်မှု၊ လျှပ်စစ်ဓာတ်အားစသည့် အရေးကြီးသော အခြေခံအဆောက်အအုံများနှင့် နျူကလီးယားစွမ်းအင်သုံး အဆောက်အအုံများအား တိုက်ခိုက်ခြင်းကို ရပ်တန့်ရန်လည်း တိုက်တွန်းခဲ့သည်။
ရန်လိုသည့်လုပ်ဆောင်ချက်များကို ချက်ချင်းရပ်တန့်ရန်၊ တရုတ်နိုင်ငံနှင့် ပါကစ္စတန်နိုင်ငံတို့သည် အပစ်အခတ်ရပ်စဲရေးနှင့် စစ်ပွဲများရပ်တန့်ရန်၊ ပဋိပက္ခများပျံ့ နှံ့မှုကိုအစွမ်းကုန်တားဆီးရန်၊ စစ်ဘေးသင့်ဒေသအားလုံးသို့ လူသားချင်းစာနာထောက်ထားမှုဆိုင်ရာ ကူညီကယ်ဆယ်ရေးပစ္စည်းများ ဝင်ရောက်ခွင့်ပြုရန်လည်း တောင်းဆိုခဲ့သည်။
ငြိမ်းချမ်းရေးဆွေးနွေးပွဲများ အမြန်ဆုံးစတင်ရန်၊ အီရန်နိုင်ငံနှင့် ပင်လယ်ကွေ့နိုင်ငံများ၏ အချုပ်အခြာအာဏာ၊ နယ်မြေပိုင်နက်တည်တံ့ခိုင်မြဲမှု၊ နိုင်ငံတော်လွတ်လပ်ရေးနှင့်လုံခြုံရေးတို့ကို ကာကွယ်စောင့်ရှောက်သင့်ပြီး ဆွေးနွေးညှိနှိုင်းခြင်းနှင့် သံတမန်နည်းလမ်းများသည် ပဋိပက္ခများကိုဖြေရှင်းရန်တစ်ခုတည်းသောဖြစ်နိုင်ခြေရှိသောလမ်းစဉ်ဖြစ်သည်ဟု တိုက်တွန်းခဲ့ကြသည်။
စစ်မှန်သော နိုင်ငံစုံပူးပေါင်းဆောင်ရွက်ရေးဝါဒကိုကျင့်သုံးသင့်ကာ ကုလသမဂ္ဂ၏ အရေးပါသော အခန်းကဏ္ဍကိုခိုင်မာစေရန် ပူးပေါင်းတွန်းအားပေးသင့်ပြီး ကုလသမဂ္ဂ ပဋိညာဉ်စာတမ်းပါ ရည်ရွယ်ချက်၊ မူဝါဒများနှင့် အပြည်ပြည်ဆိုင်ရာ ဥပဒေများအပေါ်အခြေခံ၍ ဘက်စုံငြိမ်းချမ်းရေးမူဘောင်တည်ဆောက်ရန်၊ ရေရှည်တည်တံ့သောငြိမ်းချမ်းရေးရရှိစေရန် သဘောတူညီချက်များရယူခြင်းကို ထောက်ခံအားပေးသည်ဟုလည်း အသိပေးခဲ့ကြသည်။