တရုတ်ကုန်ပစ္စည်းများ လှိမ့်ဝင်လာမည့်အရေး ထိုင်း ပြင်ဆင်ထားရမည်

တရုတ်နိုင်ငံမှ သွင်းကုန်များအပေါ် အမေရိကန်ပြည်ထောင်စုက အခွန်စည်းကြပ်မှုအသစ် ချမှတ်လိုက်ပြီးနောက် ဈေးပေါသော ကုန်စည်များလှိမ့်ဝင်လာနိုင်သည့်အခြေအနေတွင် အစိုးရအနေဖြင့် ပြည်တွင်းထုတ်လုပ်သူများကို အကာအကွယ်ပေးမည့် အစီအမံများကို အရှိန်မြှင့်လုပ်ဆောင်ရန် ထိုင်းကုမ္ပဏီများက အလိုရှိနေကြသည်။

အကယ်၍ ဝန်ကြီးချုပ် ပေတုံတန်အစိုးရက ယင်းသို့ဆောင်ရွက်ရန် ပျက်ကွက်ခဲ့မည်ဆိုလျှင် ဈေးပေါသော သွင်းကုန်များကြောင့် ပြင်းထန်စွာ ထိခိုက်လာမည့် စက်မှုလုပ်ငန်းအရေအတွက်သည် ယမန်နှစ်တွင် ၂၃ ခုရှိခဲ့ရာမှ ၃၀ အထိ တိုးလာနိုင်သည်ဟု ထိုင်းစက်မှုလုပ်ငန်းများအဖွဲ့ချုပ် ဥက္ကဌ Kriengkrai Thiennukul က ဗုဒ္ဓဟူးနေ့က ဘန်ကောက်တွင်ပြုလုပ်သည့် သတင်းစာရှင်းလင်းပွဲတွင် ပြောကြားခဲ့သည်။

သွင်းကုန်များ စီးဝင်မှုဒဏ်ကို ခံနေခဲ့ရသော လုပ်ငန်းများမှာ စတီးလ်၊ ပလပ်စတစ်၊ လျှပ်စစ်ပစ္စည်းများနှင့် အဝတ်အထည်များဖြစ်သည်ဟု ၎င်းက ဆိုသည်။

အမေရိကသို့ ထုတ်ကုန်များ မတင်ပို့နိုင်တော့သည့် တရုတ်ပို့ကုန်လုပ်ငန်းရှင်များသည် အိမ်နီးချင်းနိုင်ငံများဆီ ကုန်ပစ္စည်းများ ဒလဟောလှိမ့်သွင်းလာကြမည်ကို စိုးရိမ်လာစဉ် အကာအကွယ်ပေးရေး အစီအမံများ ကို တိုးမြှင့်ဆောင်ရွက်ရန် မေတ္တာရပ်ခံလာခြင်းဖြစ်သည်။ ပြီးခဲ့သည့်နှစ်က အမေရိကနှင့် ကုန်သွယ်ရာတွင် ကုန်သွယ်မှုပိုငွေ ဒေါ်လာ ၃၅ ဘီလျံရှိခဲ့သည့်အတွက် ထိုင်းပို့ကုန်များအပေါ် အခွန်တိုးမြှင့်စည်းကြပ်လာနိုင်သည့် အရေးကိုလည်း ထိုင်းအာဏာပိုင်များက ပြင်ဆင်နေရသည်။   
       
ဈေးပေါသော ထုတ်ကုန်များ ကို အဆက်မပြတ်တင်သွင်းခြင်းသည် ထိုင်းနိုင်ငံ၏ ထုတ်လုပ်ရေးကဏ္ဍကို ပိုမိုထိခိုက်လာရန် ခြိမ်းခြောက်နေပြီး စက်ရုံများတွင် ပျှမ်းမျှစွမ်းဆောင်ရည်အသုံးချနိုင်မှုမှာ ၅၆ ရာခိုင်နှုန်းခန့် ကျဆင်းနေခဲ့သည်။ ဝယ်လိုအားကျဆင်းနေသဖြင့် မော်တော်ကားရောင်းချရမှု ကျဆင်းနေပြီး ထိုင်းနိုင်ငံ၏ စက်ရုံထွက်ကုန်သည် ဒီဇင်ဘာလတွင် ၅ လဆက်တိုက် ကျဆင်းခဲ့သည်။

Ref: ဘန်ကောက်ပို့စ်