စစ်ကိုင်းတိုင်းဒေသကြီး တမူးမြို့နယ်တွင် ကျောင်းပြင်ပရောက်ရှိနေသည့် အခြေခံပညာ မူလတန်းနှင့် အလယ်တန်းအဆင့် ကျောင်းသားကျောင်းသူများအတွက် ကျင်းပသည့် အထူးအစီအစဉ် Placement Test ကို ဝင်ရောက်ဖြေဆိုသူ စုစုပေါင်း ၄၇၄ ဦးရှိကြောင်း သိရသည်။
အဆိုပါ Placement Test ကို တမူးမြို့ အမှတ်(၁) အခြေခံပညာအထက်တန်းကျောင်း၌ ယမန်နေ့က ကျင်းပခဲ့ခြင်းဖြစ်ပြီး မူလတန်းအဆင့် ကျောင်းသားကျောင်းသူ ၃၈၇ ဦးနှင့် အလယ်တန်းအဆင့် ကျောင်းသားကျောင်းသူ ၈၇ ဦး စုစုပေါင်း ၄၇၄ ဦး ဝင်ရောက်ဖြေဆိုခဲ့ကြောင်း သိရသည်။
အခြေခံပညာဦးစီးဌာနသည် ၂၀၂၁-၂၀၂၂ ပညာသင်နှစ်မှစတင်၍ အကြောင်းအမျိုးမျိုးကြောင့် ကျောင်းပြင်ပရောက်ရှိနေသည့် အခြေခံပညာ မူလတန်းအဆင့် (Grade 2 မှ Grade 5) နှင့် အလယ်တန်းအဆင့် (Grade 6 မှ Grade 9) ကျောင်းသားကျောင်းသူများအတွက် Placement Test အထူးအစီအစဉ် ဖြေဆိုနိုင်ရန် လျှောက်လွှာခေါ်ယူခဲ့ခြင်းဖြစ်သည်။
လျှောက်ထားသူများသည် အခြေခံပညာကျောင်း၊ ကိုယ်ပိုင်ကျောင်း သို့မဟုတ် ဘုန်းတော်ကြီးသင်ပညာရေးကျောင်းများတွင် ပညာသင်ယူခဲ့ဖူးသူများ ဖြစ်ရမည်ဖြစ်ကြောင်း သိရသည်။
ထို့ပြင် လျှောက်ထားသူများအနေဖြင့် မိမိအသက်အရွယ်အရ တက်ရောက်ရမည့် အတန်း၏ တစ်ဆင့်နိမ့်အတန်းကို ဖြေဆိုရမည်ဖြစ်ပြီး ဥပမာအားဖြင့် Grade 9 တက်ရောက်ရမည့် ကျောင်းသားသည် Grade 8 ကို ဖြေဆိုရမည်ဖြစ်ကြောင်း ထုတ်ပြန်ချက်တွင် ဖော်ပြထားသည်။
Placement Test အောင်မြင်၍ အတန်းတက်ရောက်ခွင့် ရရှိသူများအနေဖြင့် ၂၀၂၆-၂၀၂၇ ပညာသင်နှစ်တွင် အခြေခံပညာကျောင်းများ၌သာ တက်ရောက်ပညာသင်ယူရမည်ဖြစ်ကြောင်း သိရသည်။