မြန်မာနိုင်ငံဂျပန်ပြန်ကျောင်းသားဟောင်းများအသင်း (MAJA) သည် လာမည့် ၂၀၂၆ ခုနှစ်၊ ဇူလိုင်လ ၅ ရက် (တနင်္ဂနွေနေ့) တွင် ကျင်းပမည့် ပထမအကြိမ် ဂျပန်စာအရည်အချင်းစစ်စာမေးပွဲ (JLPT) နှင့် ပတ်သက်၍ စာဖြေသူများ မဖြစ်မနေ လိုက်နာရမည့် စာဖြေခန်းရောက်ရှိချိန် သတ်မှတ်မှု အပါအဝင် ထပ်တိုးစည်းကမ်းချက်များနှင့် ညွှန်ကြားချက်များကို တရားဝင် ထုတ်ပြန်ကြေညာထားကြောင်း သိရသည်။
အဆိုပါ ထုတ်ပြန်ချက်အရ စာမေးပွဲဖြေဆိုခွင့်ကတ်ပြား(online Test Voucher) များကို ဇွန်လ ၁ ရက်နေ့မှစတင်ကာ စာမေးပွဲကျင်းပမည့် ဇူလိုင်လ ၅ ရက်နေ့အထိ စနစ်အတွင်း ထုတ်ယူခွင့်ပြုထားပြီး၊ စာဖြေသူများအနေဖြင့် (Color Print) ထုတ်ယူကာ စာမေးပွဲနေ့တွင် မဖြစ်မနေ ယူဆောင်လာရမည် ဖြစ်ကြောင်း သိရသည်။
ထိုပြင် စာမေးပွဲဖြေဆိုခွင့်ကတ်ပြား(online Test Voucher) များကို ဖုန်းဖြင့်ပြသ၍ ရမည်မဟုတ်ကြောင်းလည်း အသိပေးထားသည်။
၂၀၂၆ ခုနှစ် ဇူလိုင်လ JLPT စာမေးပွဲမှစတင်၍ စာဖြေသူများအားလုံး စာဖြေခန်းထဲသို့ရောက်ရှိရမည့် “Check-in Time” အချိန်ကို N1, N2 Level စာဖြေသူများအတွက် မနက် (၈း၀၀) နာရီ မှ မနက် (၈:၄၅) အတွင်း၊N3, N4, N5 Level စာဖြေသူများအတွက် မနက် (၁၀:၀၀) နာရီ မှ မနက် (၁၀:၄၅) အတွင်းဟုသတ်မှတ်ထားကြောင်း သိရပြီး အဆိုပါအချိန်အတွင်းမရောက်ရှိပါက ဝင်ရောက်ဖြေဆိုခွင့်မရှိကြောင်း အသိပေးထားသည်။
စာဖြေဆိုချိန်စတင်ပြီး (၁၀) မိနစ်အတွင်း နောက်ကျ ရောက်ရှိသူများအား (Listening session မပါ) ဝင်ခွင့်ပြုခဲ့သော်လည်း၊ ၂၀၂၆ ခုနှစ် ဇူလိုင်လမှ စတင်၍ အပိုင်းအားလုံးတွင် ဤစည်းမျဉ်းများကို ဖျ-က်သိမ်းလိုက်ကြောင်း အသိပေးထားပြီး စာဖြေသူများသည် ပထမပိုင်းဖြေဆိုချိန်အတွက် အထက်ဖော်ပြပါ “Check-in Time” အတွင်း မရောက်ရှိပါက စာမေးပွဲခန်းအတွင်း ဝင်ခွင့်ပြုမည်မဟုတ်ကြောင်း အသိပေးထားသည်။
ဒုတိယပိုင်းနှင့် နောက်ပိုင်းဖြေဆိုချိန်များတွင် စာဖြေဆိုချိန် ကျော်လွန်ပြီး နောက်ကျလာသူများကို စာမေးပွဲခန်းထဲ ဝင်ခွင့်မပြုဘဲ စာမေးပွဲ ဖြေဆိုခွင့်ပေးမည်မဟုတ်ကြောင်း JLPT စာမေးပွဲကျင်းပရေးကော်မတီက အသိပေးထားခြင်းလည်း ဖြစ်သည်။
ထို့ပြင် စာမေးပွဲနှင့်ပတ်သက်သည့် စည်းကမ်းချက်များကို ဖြေဆိုသူများ နားလည်စေရန်အတွက် MAJA ၏ Facebook လူမှုကွန်ယက်စာမျက်နှာတွင် ဗီဒီယိုဖိုင်ဖြင့် ယနေ့ ဇွန် ၂၃ ရက်နေ့တွင် အသိပေးထုတ်ပြန်ထားသည်။