စိုက်ပျိုးရေး ရန်ပုံငွေ ဘီလီယံ ၄၀၀ ထုတ်ချေးပေးခြင်းမှာ ငွေလည်ပတ်စေရန် ဖြစ်ကြောင်း နစက ဥက္ကဋ္ဌ ဗိုလ် ချုပ်မှူးကြီးမင်းအောင်လှိုင်ပြော
နိုင်ငံတော်က စိုက်ပျိုးရေး ကဏ္ဍအတွက် ကျပ်ငွေ (၄၀၀) ဘီလီယံ ထုတ်ချေးပေးခြင်းသည် ငွေလည်ပတ်စေရန်အတွက် အကျိုးရှိမည့်နေရာတွင် အသုံးချခြင်း ဖြစ် ကြောင်း နစက ဥက္ကဋ္ဌက ပြောကြားသည်။
ဩဂုတ်လ (၂၂) ရက်က နေပြည်တော်တွင် ပြုလုပ်သည့် ပြည်ထောင်စုအစိုးရအဖွဲ့အစည်းအဝေးတွင် ၎င်းက ပြောကြားခဲ့ခြင်း ဖြစ်သည်။
” ငွေဆိုတာကတော့ အိပ်နေတာ မကောင်းဘူး။ လည်ပတ်နေတာ အကောင်းဆုံးပဲ။ အဲ့ဒီတော့ ငွေဆိုတာကတော့ လည်ပတ်သုံးစွဲတာကတော့ ကောင်းတယ်။ ဒီလိုငွေအိပ်နေမယ့်အစားကို အကျိုးရှိတာ ဘာလုပ်မလဲ ဆိုတဲ့ အခါကျတော့ စဉ်းစားတဲ့ အခါမှာ ခုနကပြောတဲ့ စိုက်ပျိုးရေး၊ မွေးမြူရေးလုပ်ငန်းမှာ အသုံးချနိုင်ရင် ကောင်းမယ်ဆိုတဲ့ အတွေးလေးဝင်လာတယ်။ဒါကြောင့် ကျွန်တော်တချို့ဝန် ကြီးတွေနဲ့ တိုင်ပင်ကြည့်တယ်။ ဒါလေး လုပ်ချင်တယ်။ ငွေတွေထုတ်သုံးလိုက်မယ်။ သူတို့ ဒါဆိုရင်တော့ ဘယ်လိုခေါင်းစဉ်နဲ့ သုံးရင် ဖြစ်နိုင်မယ်ဆိုပြီး သူတို့က ဒါလေးတွေ အကြံပြုကြတယ်။ အဲ့ဒါနဲ့ နိုင်ငံ့စီးပွားမြှင့်တင်ရေး ရန်ပုံငွေဆိုပြီးတော့ ပေါ်လာတာဖြစ်ပါတယ်” ဟု ဗိုလ်ချုပ်မှူးကြီး မင်းအောင်လှိုင်က ပြောသည်။
အဆိုပါ နိုင်ငံ့ စီးပွားမြှင့်တင်ရေး ရန်ပုံငွေ ကျပ် (၄၀၀) ဘီလီယံကို ပြည်နယ်နှင့် တိုင်းအလိုက် အချိုးကျ ခွဲဝေကာ စိုက်ပျိုးမွေးမြူရေး ကဏ္ဍကို ပထမ ဦးစားပေးအနေဖြင့် ထုတ်ချေးသွားမည်ဖြစ်ပြီး အဆိုပါ ကဏ္ဍမှ ထွက်ရှိလာမည့် ထုတ်ကုန်ပစ္စည်းများအတွက် စက်ရုံအလုပ်အလုပ်များ တည်ဆောက်ရေး၊ ကုန်ချောထုတ်လုပ်မှုကဏ္ဍများအတွက် ဒုတိယ ဦးစားပေးအနေဖြင့် အသုံးပြုသွားမည်ဖြစ်ကြောင်း သိရသည်။
စိုက်ပျိုးရေး ကဏ္ဍအတွက် ချေးငွေထုတ်ချေးပေးရာတွင် စပါး၊ ပဲနှင့် ဝါ သီးနှံများအတွက် ထုတ်ချေးပေးရန် စဉ်းစားခဲ့သော်လည်း ဝါစိုက်ရာသီကျော်လွန်နေပြီဖြစ်သည့်အတွက် နွေစပါးနှင့်ပဲသီးနှံအတွက် ကနဦး ထုတ်ချေးခဲ့ခြင်း ဖြစ်ကြောင်း နစက ဥက္ကဋ္ဌက ပြောသည်။
” စိုက်ပျိုးရေးနဲ့လုပ်တဲ့ နိုင်ငံတော်ကိုပြန်ပြီးတော့ အထောက်အကူရမယ့်လုပ်ငန်း ဘာနဲ့မီမလဲဆိုပြီးတော့၊ စပါးစိုက်ပျိုးရေးနဲ့ ပဲစိုက်ပျိုးရေးနှစ်ခုသွားတွေ့တယ်။ အဲဒီတုန်းက ကျွန်တော် သုံးခုစဉ်းစားခဲ့တာပေါ့။ ဝါ ပါ ပါတယ်။ စပါးရယ်၊ ပဲရယ်။ ဝါရယ် စဉ်းစားခဲ့တာ။ဒါပေမဲ့ ဝါက အ ချိန်မမီဘူး။ ဝါကအခု စိုက်နေကြပြီ။ မိုးကြိုဝါတွေ စိုက်နေကြပြီဆိုတော့ မမီနိုင်ဘူး။ မမီနိုင်တော့ မီတဲ့လုပ်ငန်း ဘာရှိမလဲဆိုတော့ ပဲနဲ့စပါးရှိတဲ့အတွက်ကြောင့် နွေစပါးနဲ့ပဲတီစိမ်း ပဲနှစ်မျိုးကို ဆောင်ရွက်ခြင်းဖြစ်ပါတယ်” ဟု ဗိုလ်ချုပ်မှူးကြီး မင်းအောင်လှိုင်က ပြောသည်။
အဆိုပါ ချေးငွေများကို ၂၅ ရာခိုင်နှုန်း (၄) ကြိမ်ခွဲ၍ ပြန် လည် ပေးချေရမည်ဖြစ်ပြီး သီးနှံ(၄) ရာသီ ပြီးပါက ချေး ငွေအားလုံးပေးချေနိုင်မည်ဖြစ်ကြောင်းလည်း ၎င်းက ပြောကြားခဲ့သည်။
“စိုက်ပျိုးရေး ထောက်ပံ့ငွေ၊ ချေးငွေယူတဲ့ သူကတော့ အဲ့ထဲကနေ (၂၅) ရာခိုင်နှုန်း ပြန်ဆပ်။ (၇၅) ရာခိုင်နှုန်းယူထား၊ သူကတော့ အကျိုးအမြတ် စားပေါ့လေ။ ပြီးရင် နောက်တစ်သီး ကျလို့ရှိရင် သူက (၂၅) ရာခိုင်နှုန်းပြန်ဆပ်၊ (၇၅) ရာခိုင်နှုန်း သူစား၊ အဲဒီတော့ ၄ သီးစားပြီးလို့ရှိရင် သူ့ရဲ့ အကြွေးတွေ အကုန်ကြေသွားမယ်” ဟု ၎င်းက ဆိုသည်။
အဆိုပါ ချေးငွေများသည် ကိုဗစ်ရန်ပုံငွေများထဲမှ ငွေကျပ် (၄၀၀) ဘီလီယံကို နိုင်ငံစီးပွားမြှင့်တင်ရေး ရန်ပုံငွေအနေဖြင့် ရန်ပုံငွေတစ်ရပ် ထူ ထောင်ကာ စိုက်ပျိုးရေးကဏ္ဍအတွက် ပြည်နယ်နှင့် တိုင်းအလိုက် လျာထားသတ်မှတ်ကာ ထုတ်ချေးပေးနေခြင်း ဖြစ်သည်။