မြန်မာနိုင်ငံ၏ စိုက်ပျိုးရေးလုပ်ငန်းများဆောင်ရွက်ရာတွင် ရေလုံလောက်စွာရရှိရေးနှင့်ပတ်သက်၍ နစက ဥက္ကဋ္ဌမှ ဧပြီ ၈ ရက်နံနက်ပိုင်းက နေပြည်တော်၊တပ်ကုန်းမြို့နယ်၊ရှားတောကျေးရွာရှိ ဆင်သေချောင်း ယာယီရေထိန်းဆည်လုပ်ငန်းဆောင်ရွက်နေမှုနှင့်ဆိုလာစနစ်သုံးရေတင်စနစ်ဆောင်ရွက်နေမှုများကိုကြည့်ရှုစစ်ဆေးပြီး ဒေသခံစိုက်ပျိုးရေးတောင်သူများနှင့်တွေ့ဆုံစဥ် ပြောကြားခဲ့ခြင်းဖြစ်သည်။
နွေရာသီတွင် ရေလုံလောက်စွာရရှိရေးအတွက် အမြဲမပြတ်နည်းလမ်းရှာဖွေဆောင်ရွက်လျက်ရှိပြီး သဘာဝမှရရှိသည့် မြစ်ချောင်းရေ၊မိုးရေနှင့်ဆည်ရေ ၃ မျိုးရှိကာ ရေကိုအသုံးချရာတွင် လိုအပ်သလောက်သာ ထုတ်ယူသုံးစွဲရန် မှာကြားခဲ့သည်။
“ရေအသုံးချမှုနဲ့ပတ်သက်ရင် အစက်ချစနစ်၊ရေပိုက်နဲ့သွယ်တန်းအသုံးပြုခြင်းစနစ်တွေကို အသုံးပြုမယ်ဆိုရင် ရေသုံးစွဲမှုကိုလျှော့ချနိုင်မှာဖြစ်ပါတယ် ဒါ့ကြောင့် စိုက်ပျိုးရေးသင်တန်းကျောင်းတွေမှာ ရေသုံးစွဲမှုဘာသာရပ်တွေကို သင်ကြားပို့ချပေးဖို့ စီမံဆောင်ရွက်နေပါတယ်”ဟု နစက ဥက္ကဋ္ဌကပြောသည်။
ရေရရှိရေးဆောင်ရွက်ရာတွင် ခြောက်သွေ့သည့် နွေရာသီတွင် စိုက်ပျိုးရေးလုပ်ငန်းများဆောင်ရွက်ရန် ရေလိုအပ်ချက်ရှိ၍ လိုအပ်သည့်ရေများရရှိရေးအတွက် မြစ်ချောင်းများမှရယူခြင်း၊ဆည်ရေများမှရယူခြင်းနှင့်မြေအောက်ရေမှရယူအသုံးပြုခြင်းများရှိသည်ဟု ဆိုသည်။
ရေတင်ခြင်းလုပ်ငန်းများဆောင်ရွက်ရာတွင် နွေရာသီကာလဖြစ်၍ နေရောင်ခြည်စွမ်းအင်သုံးလျှပ်စစ်ရေတင်လုပ်ငန်းများကိုဆောင်ရွက်ပါက စက်သုံးဆီသုံးစွဲမှုများကို များစွာလျှော့ချနိုင်၍ အကျိုးဖြစ်ထွန်းစေမည်ဟု ဆိုသည်။
“နေရောင်ခြည်စွမ်းအင်သုံးရေတင်လုပ်ငန်းတွေကိုအသုံးချပြီး သီးထပ်စိုက်ပျိုးခြင်းလုပ်ငန်းတွေကိုဆောင်ရွက်နိုင်လို့ စိုက်ပျိုးရေးလုပ်ငန်းတွေ ပိုမိုတိုးတက်စေနိုင်မှာဖြစ်ပါတယ် ရေတင်ခြင်းလုပ်ငန်းတွေမှာ ချောင်းတွေ ရေမြောင်းတွေကို ယာယီရေထိန်းဆည်တွေနဲ့လည်း ဆောင်ရွက်နိုင်ပါတယ်”ဟု နစက ဥက္ကဋ္ဌကပြောသည်။
မြေအောက်ရေသုံးစွဲရာတွင် ရေဝေရေလဲ သစ်တောသစ်ပင်များစိုက်ပျိုး၍ ရေကိုစနစ်တကျထိန်းသိမ်းသုံးစွဲရမည်ဖြစ်ကာ မိုးရွာသွန်းသည့်အချိန်တွင် ရရှိသည့်ရေများကို စနစ်တကျ ထိန်းသိမ်းသိုလှောင်သုံးစွဲပြီး ချောင်းခြောက်၊မြောင်းခြောက်တို့တွင်လည်းရေကိုထိန်းသိမ်းသိုလှောင်ထားပါက မြေအောက်ရေကိုရရှိနိုင်သည်ဟု ဆိုသည်။
“ရေရရှိဖို့ လူကဖန်တီးဆောင်ရွက်ရမှာဖြစ်ပါတယ်။ ရေကိုထိန်းသိမ်းဆောင်ရွက်နိုင်မယ်ဆိုရင် စိုက်ပျိုးရေနဲ့သောက်သုံးရေတွေကို လုံလောက်စွာ ရရှိနိုင်မှာဖြစ်ပါတယ်”ဟု နစက ဥက္ကဋ္ဌကပြော သည်။
စိုက်ပျိုးရေးလုပ်ငန်းများဆောင်ရွက်ရာတွင် ရေ လုံလောက်စွာရရှိပါက သီးထပ်စိုက်ပျိုးခြင်းကိုဆောင်ရွက်နိုင်မည်ဖြစ်ပြီး တောင်သူများဝင်ငွေပိုမိုရရှိစေမည်ဖြစ်ကာ တိုင်းပြည်အတွက် စားရေ ရိက္ခာတိုးတက်လာမည်ဖြစ်ပြီး ပြည်ပနိုင်ငံများသို့တင်ပို့ရောင်းချနိုင်၍ နိုင်ငံဝင်ငွေတိုးတက်လာမည်ဟု နစက ဥက္ကဋ္ဌကပြောကြားခဲ့သည်။
