စင်္ကာပူ၊ဇန်နဝါရီ ၄
စင်္ကာပူနိုင်ငံ၌ ၂၀၂၉ ခုနှစ်တွင် စတင်လည်ပတ်ရန်လျာထားသော ဟိုက်ဒရိုဂျင်စွမ်းအင်သုံး ဓါတ်ငွေ့တာဘိုင်ကို တည်ဆောက်သွားမည်ဖြစ်ကြောင်း ကုန်သွယ်ရေးနှင့်စက်မှုဝန်ကြီးဌာနလက်အောက်ရှိ စွမ်းအင်ဈေးကွက်အာဏာပိုင်အဖွဲ့က သတင်းထုတ်ပြန်ကြေငြာခဲ့သည်။
“စွမ်းအင်ဝယ်လိုအားမြင့်တက်လာတာနဲ့အမျှ ကျွန်တော်တို့ရဲ့နေ့စဉ်ဘဝတွေအတွက် စွမ်းအင်ပေးနိုင်ဖို့ လုံလောက်တဲ့စွမ်းအင်ထုတ်စနစ်ရှိဖို့က အရေးကြီးပါတယ်၊အခုစတင်အကောင်အထည်ဖော်တဲ့စနစ်ဟာ ကာဗွန်အထွက်နည်းတဲ့ စွမ်းအင်ထုတ်လုပ်ရေးအနာဂတ်ကိုကူးပြောင်းဖို့ဖြစ်ပါတယ်” ဟုဆက်လက်ပြောကြားခဲ့သည်။
စင်္ကာပူအခြေစိုက် လျှပ်စစ်လက်လီရောင်းချသူ Pacific Light Power က လုပ်ဆောင်မည့် ယခုစက် ရုံသည် အနည်းဆုံး ၆၀၀ မဂ္ဂါဝပ်အထိ ထုတ်လုပ်နိုင်မည်ဖြစ်သည်ဟုလည်းသိရသည်။
စင်္ကာပူအနောက်တောင်ပိုင်းရှိ ဂျူရွန်ကျွန်းတွင်တည်ဆောက်မည့်အဆိုပါစက်ရုံသည် စတင်ချိန်၌ ဟိုက်ဒရိုဂျင် ၃၀ ရာခိုင်နှုန်းနှင့်စတင်လည်ပတ်မည်ဖြစ်ပြီး နောက်ပိုင်းတွင် ဟိုက်ဒရိုဂျင်ကိုသာ ရာနှုန်းပြည့်သုံးစွဲလည်ပတ်သွားနိုင်ရန်အစီအစဉ်ပြုလုပ်ထားကြောင်း ကုမ္ပဏီကပြောကြားခဲ့သည်။
စင်္ကာပူ၌ လျှပ်စစ်သုံးစွဲမှုများသော ခေတ်မီကုန်ထုတ်လုပ်ငန်းများ၊ဒစ်ဂျစ်တယ်စီးပွားရေးနှင့်သယ်ယူပို့ဆောင်ရေးများအတွက် လျှပ်စစ်စွမ်းအင်လိုအပ်မှုက တဖည်းဖြည်းမြင့်တက်လျက်ရှိသဖြင့် ယခုကဲ့သို့ စွမ်းအင် ထုတ်လုပ်မှုစနစ်ကိုစတင်လည်ပတ်ရန်ဆုံးဖြတ်ခဲ့ကြခြင်းဖြစ်သည်ဟုလည်းသိရသည်။
Source : ရှင်းဟွာ