စင်္ကာပူ၊နိုဝင်ဘာ ၂၄
စင်္ကာပူဝန်ကြီးချုပ်ဟောင်း မစ္စတာလီရှန်လွန်းသည် နိုဝင်ဘာလ ၂၄ မှ ၂၉ ရက်နေ့အထိ တရုတ်နိုင်ငံသို့သွားရောက်မည်ဖြစ်ကြောင်းသိရသည်။အဆိုပါခရီးစဉ်အတွင်း ဆူကျုံစက်မှုဇုန် နှစ် ၃၀ ပြည့်အခမ်းအနားသို့တက်ရောက်ကာ တရုတ်သမ္မတရှီနှင့်သာမက တရုတ်အစိုးရအရာရှိများနှင့်ပါတွေ့ဆုံမည်ဖြစ်သည်ဟုသိရသည်။
မစ္စတာလီရှန်လွန်း၏ တရုတ်သို့သွားရောက်မည့် တရားဝင်ခရီးစဉ်အတွင်း ၎င်းသည် ဆူကျုံ၊ပေကျင်းနှင့်ရှန်ဟိုင်းမြို့များသို့ပါသွားရောက်မည်ဖြစ်ကြောင်းသိရပြီး နှစ်နိုင်ငံဆက်ဆံရေးနှင့်ပူးပေါင်းဆောင်ရွက်မှုများသည် ယခင်ကထက်ပိုမိုတိုးတက်လာကာ မကြာသေးမီကလည်း နှစ်ဖက်သဘောတူညီချက် ၂၅ ခုကို လက်မှတ်ရေးထိုးခဲ့ကြသေးသည်။
ယခုခရီးစဉ်သည် စင်္ကာပူဝန်ကြီးချုပ်ရာထူးမှ မေလတွင်အနားယူပြီးနောက်ပိုင်း မစ္စတာလီ၏ ပထမဆုံးတရုတ်ခရီးစဉ်လည်းဖြစ်သည်။တရုတ်နှင့်စင်္ကာပူအစိုးရအကြား ပထမဆုံးပူးပေါင်းဆောင်ရွက်ခဲ့သည့် ဆူကျုံစက်မှုဇုန်ထူထောင်မှုနှစ် ၃၀ ပြည့်အခမ်းအနားကိုလည်း တက်ရောက်ကာ မိန့်ခွန်းပြောကြားမည်ဖြစ်ကြောင်းသိရသည်။
ရှန်ဟိုင်း၌လည်း တာဝန်ရှိသူများနှင့်သာမက တရုတ်နိုင်ငံရောက် စင်္ကာပူနိုင်ငံသားများနှင့်ပါတွေ့ဆုံမည်ဖြစ်ကြောင်းသိရသည်။မစ္စတာလီနှင့်အတူ ၎င်း၏ဇနီးအပြင် စင်္ကာပူနိုင်ငံခြားရေးဝန်ကြီး၊ပညာရေးဝန်ကြီးနှင့် ဆူကျုံစက်မှုဇုန်တာဝန်ရှိသူများအပြင် အခြားဝန်ကြီးအချို့လည်း ယင်းခရီးစဉ်၌ပါဝင်မည်ဖြစ်သည်။
Source : စီအင်န်အေ