နိုင်ငံအတွင်း စက်သုံးဆီပြတ်လပ်မှုမရှိစေရေးနှင့် စွမ်းအင်ဖူလုံမှုရှိစေရေးအတွက် စက်သုံးဆီဖြန့်ဖြူးမှုကွင်းဆက်တစ်လျှောက်ကို ဒစ်ဂျစ်တယ်စနစ်ဖြင့် အချိန်နှင့်တစ်ပြေးညီ စစ်ဆေးကြပ်မတ်ဆောင်ရွက်လျက်ရှိကြောင်း လျှပ်စစ်နှင့် စွမ်းအင်ဝန်ကြီးဌာန ဒုတိယဝန်ကြီး ဦးကျော်နိုင်ဝင်းက ပြောကြားသည်။
ဇွန် ၂၅ ရက်က ကျင်းပသည့် တတိယအကြိမ် ပြည်သူ့လွှတ်တော် ဒုတိယပုံမှန်အစည်းအဝေး (၁၄) ရက်မြောက်နေ့တွင် ကမာရွတ်မဲဆန္ဒနယ်မှ ဦးကိုကိုသင်း၏ “စက်သုံးဆီပြတ်လပ်မှုမရှိစေရေးနှင့် ဈေးနှုန်းတည်ငြိမ်စေရေးအတွက် မဟာဗျူဟာမြောက် အရန်ဆီသိုလှောင်မှုစနစ် ဖော်ဆောင်ရန်နှင့် တင်သွင်းဖြန့်ဖြူးမှုကွင်းဆက်ကို စနစ်တကျ ထိန်းကျောင်းနိုင်မည့် အစီအစဉ်ရှိ/မရှိ” ဟူသည့် ကြယ်ပွင့်ပြမေးခွန်းကို ဖြေကြားရာတွင် ယင်းကဲ့သို့ ထည့်သွင်းပြောကြားခဲ့ခြင်းဖြစ်သည်။
ဒုတိယဝန်ကြီးက မြန်မာနိုင်ငံ၏ စက်သုံးဆီရရှိမှုသည် ပြည်ပတင်သွင်းမှုအပေါ် အခြေခံထားပြီး လက်ရှိတွင် စင်ကာပူကို အဓိကကုန်သွယ်ရေးဗဟိုချက် (Trading Hub) အဖြစ် မှီခိုတင်သွင်းလျက်ရှိကြောင်း ပြောကြားသည်။ စက်သုံးဆီတင်သွင်းမှု မပြတ်လပ်စေရေးနှင့် ဈေးနှုန်းတည်ငြိမ်စေရေးအတွက် အိမ်နီးချင်းနိုင်ငံများနှင့် မိတ်ဖက်နိုင်ငံများနှင့် ရေရှည်လောင်စာဆီထောက်ပံ့ရေး သဘောတူစာချုပ်များ (Long-term Supply Agreements) ချုပ်ဆိုနိုင်ရေးကို ညှိနှိုင်းဆောင်ရွက်လျက်ရှိကြောင်းလည်း ၎င်းက ဆိုသည်။
ထို့ပြင် ဝန်ကြီးဌာနအနေဖြင့် နိုင်ငံ၏ စွမ်းအင်ဖူလုံရေး၊ ပြည်သူများ စက်သုံးဆီကို သင့်တင့်မျှတသော ဈေးနှုန်းဖြင့် ဝယ်ယူအသုံးပြုနိုင်ရေးနှင့် စက်သုံးဆီပြတ်လပ်မှုမဖြစ်ပေါ်စေရေးတို့အတွက် စက်သုံးဆီဖြန့်ဖြူးမှုကွင်းဆက်တစ်လျှောက် စဉ်ဆက်မပြတ် စစ်ဆေးကြပ်မတ်ဆောင်ရွက်လျက်ရှိကြောင်း ပြောကြားသည်။
ထို့အပြင် Supply Chain တစ်လျှောက် မလိုအပ်သော ကုန်ကျစရိတ်များ လျှော့ချနိုင်ရေးနှင့် စက်သုံးဆီတင်သွင်းရေးလုပ်ငန်းစဉ်များကို စနစ်တကျ စီမံခန့်ခွဲနိုင်ရေးအတွက် သိုလှောင်ကန်များတွင် ATG (Automatic Tank Gauging) စနစ်၊ ဆီတင်ယာဉ်များတွင် GPS စနစ်နှင့် လက်လီအရောင်းဆိုင်များတွင် QR Code စနစ်တို့ကို အသုံးပြု၍ Real-time Monitoring ဆောင်ရွက်လျက်ရှိပြီး ဒစ်ဂျစ်တယ်နည်းပညာဖြင့် စနစ်တကျ ကြပ်မတ်စောင့်ကြည့်လျက်ရှိကြောင်း ဒုတိယဝန်ကြီးက ပြောကြားခဲ့သည်။