ငြိမ်းချမ်းရေးအတွက် ပထမဆုံးလာရောက်ဆွေးနွေးသည့် ရှမ်းနီအမျိုးသားများညီညွတ်ရေးအဖွဲ့

နိုင်ငံတော်အစိုးရနှင့်အတူလက်တွဲပြီး ပြည်ထောင်စုအဝန်းအဝိုင်းအတွင်း အေးအတူပူအမျှနေထိုင်ရေးကိုဆွေးနွေး

ကြိုတင်ကန့်သတ်ချက်များမထားသည့် ဆွေးနွေးပွဲများပြုလုပ်နိုင်ရန် ကြေညာချက်အမှတ် ၁/၂၀၂၆ ဖြင့် ဧပြီ ၂၁ ရက်ကကမ်းလှမ်းဖိတ်ခေါ်ထားမှုအရ ငြိမ်းချမ်းရေးအတွက် အမျိုးသားစည်းလုံးညီညွတ်ရေးနှင့် ငြိမ်းချမ်းရေးဖော်ဆောင်မှုညှိနှိုင်းရေးကော်မတီနှင့် ရှမ်းနီအမျိုးသားများညီညွတ်ရေးအဖွဲ့တို့ ဇွန် ၄ ရက်ကတွေ့ဆုံဆွေး နွေးခဲ့ကြသည်။

ဆွေးနွေးပွဲတွင် အမျိုးသားစည်းလုံးညီညွတ်ရေးနှင့် ငြိမ်းချမ်းရေးဖော်ဆောင်မှုညှိနှိုင်းရေးကော်မတီဥက္ကဋ္ဌ ဒု-ဗိုလ်ချုပ်ကြီးရာပြည့်က ရှမ်းနီအမျိုးသားများညီညွတ်ရေးအဖွဲ့သည် ဒေသတည်ငြိမ်ရေးကို တပ်မတော်နှင့်ပူးပေါင်းဆောင်ရွက်နေပြီး ဒေသနေပြည်သူများ၏ လုံခြုံရေးကိုဆောင်ရွက်နေခြင်းကိုသိရသည်ဟု ပြောသည်။

ထို့ပြင် ရှမ်းနီအမျိုးသားများညီညွတ်ရေးအဖွဲ့အနေဖြင့် နိုင်ငံရေး၊ ဒေသတည်ငြိမ်အေးချမ်းရေးအတွက် ဆက်လက်လုပ်ဆောင်မည်များကို ပွင့်ပွင့်လင်းလင်းဆွေး နွေးပေးစေလိုကာ ဒေသဖွံ့ဖြိုးရေးလုပ်ငန်းစဉ်များကို နှစ်ဖက်ညှိနှိုင်းပြီးလိုအပ်သည်များကို ဆက်လက်ဆောင်ရွက်ပေးသွားမည်ဟု ပြောကြားခဲ့သည်။

ထို့အတူ ရှမ်းနီအမျိုးသားများညီညွတ်ရေးအဖွဲ့ ဒု- ဥက္ကဋ္ဌ(၁) စဝ်စိုင်းကမ်က ဒေသတည်ငြိမ်အေးချမ်းရေးအတွက် တပ်မတော်နှင့် ပူးပေါင်းဆောင်ရွက်မည်ဖြစ်ကာ ဆက်လက်၍ နယ်မြေဖွံ့ဖြိုးရေးအတွက်လည်း တပ်မတော်နှင့်အတူပူးပေါင်းပါဝင်မည်ဟု ပြောသည်။

ထို့နောက် နှစ်ဖက်အဖွဲ့ဝင်များသည် ဒေသတည်ငြိမ်အေးချမ်းရေးအတွက် ဆက်လက်ဆောင်ရွက်မည့်အ ခြေအနေ၊ ကချင်ပြည်နယ်၊ စစ်ကိုင်းတိုင်းတို့တွင် ရှမ်းနီ (တိုင်းလျန်၊ တိုင်းလိုင်)တိုင်းရင်းသားများနေထိုင်မှုနှင့် ဥပဒေနှင့်အညီ ကိုယ်ပိုင်အုပ်ချုပ်ခွင့်ရဒေသရရှိလိုမှု၊ ကချင်ပြည်နယ်နှင့် စစ်ကိုင်းတိုင်းအတွင်း နယ်မြေဒေသတည်ငြိမ်အေးချမ်းရေးဆောင်ရွက်ရာ၌ ကြုံတွေ့ရသောလိုအပ်ချက်များကို ဆွေးနွေးခဲ့ကြသည်။

ထို့အတူ နိုင်ငံတော်အစိုးရနှင့် အတူလက်တွဲပြီး ပြည်ထောင်စုအဝန်းအဝိုင်းအတွင်း အေးအတူပူအမျှနေထိုင်ရေး၊ ယာယီနေရပ်စွန့်ခွာသူများအား လူသားချင်းစာနာထောက်ထားမှုအကူအညီပေးနိုင်ရေးနှင့် ဒေသတွင်းပူးပေါင်းဆောင်ရွက်မှုတို့ကိုလည်း ဆွေးနွေးခဲ့ကြသည်။

ထို့နောက် ရှမ်းနီ(တိုင်းလျန်၊ တိုင်းလိုင်)လူမျိုးများ၏ သမိုင်းကြောင်းအရ ပျံ့နှံ့နေထိုင်မှု၊ မှတ်ပုံတင်အရ လူ မျိုးအမည်အသုံးအနှုန်း၊ ဒေသအသိအမှတ်ပြုလိုမှုတို့ကို ဖွဲ့စည်းပုံအခြေခံဥပဒေနှင့်အညီ လွှတ်တော်သို့တင် ပြဆောင်ရွက်နိုင်မည့်အခြေအနေများကို အမျိုးသားစည်းလုံးညီညွတ်ရေးနှင့် ငြိမ်းချမ်းရေးဖော်ဆောင်မှု ညှိနှိုင်းရေးကော်မတီက အသေးစိတ်ရှင်းလင်းဆွေးနွေးခဲ့သည်။

ထို့နောက် အမျိုးသားစည်းလုံးညီညွတ်ရေးနှင့် ငြိမ်းချမ်းရေးဖော်ဆောင်မှုညှိနှိုင်းရေးကော်မတီ အတွင်း ရေးမှူး ဒု-ဗိုလ်ချုပ်ကြီးမင်းနိုင်က ဆွေးနွေးချက်များမှ ရှေ့ဆက်လက်ဆောင်ရွက်သွားနိုင်မည့် ငြိမ်းချမ်းရေးလုပ်ငန်းစဉ်များနှင့် ဒေသဖွံ့ဖြိုးရေးကိစ္စရပ်များအား ပြန်လည်ရှင်းလင်းဆွေးနွေးခဲ့သည်။