လေးမျက်နှာ၊ ဇူလိုင် ၃၁
ဧရာဝတီတိုင်းဒေသကြီး၊ လေးမျက်နှာမြို့နယ်တွင် ငဝန်မြစ်ရေကာတာ ကျိုးပေါက်မှုကြောင့် ကျေးရွာအုပ်စု ၄ ခုရှိ လယ်မြေများ ရေလွှမ်းမိုးသွားခဲ့ပြီး ကယ်ဆယ်ရေးအဖွဲ့များဖြင့် ချိတ်ဆက်ဆောင်ရွက်လျက်ရှိကြောင်း တိုင်းဒေသကြီး လွှတ်တော်ကိုယ်စားလှယ် ဦးကျော်ဝင်းနိုင်က ပြောကြားခဲ့သည်။
ထို့ပြင် မြို့ပေါ်ရပ်ကွက် ၅ ခုတွင်လည်း ရေဝင်ရောက်နေသဖြင့် အရေးပေါ် ရွှေ့ပြောင်းပေးခြင်း၊ ပိတ်မိနေသူများနှင့် သက်ကြီးရွယ်အိုများကို ကယ်ဆယ်ပေးခြင်းများ လုပ်ဆောင်နေကြကြောင်း သိရသည်။
“အခုထိ အသေအပျောက်မရှိသေးပါဘူး။စာရေးကွင်းကျေးရွာမှာ ကယ်ဆယ်ရေးစခန်းအထိုင်ချဖွင့်ထားပြီး၊ ကယ် ဆယ်လိုရတဲ့သူတွေကို ဒီကနေတဆင့် ဟင်္သာတဘက်ကို ပိုဆောင်နေပါတယ်။ အချိုကလည်း မိသားစုဝင်တွေက လာရောက်ခေါ်ဆောင်နေပါတယ်။ ရန်ကုန်နဲ့ ဒေသစုံက ကယ်ဆယ်ရေးအဖွဲတွေလည်း ရောက်နေကြပါပြီ”ဟု ၄င်းက ဆိုသည်။
ဖြစ်စဉ်မှာ ဇူလိုင် ၃၀ ရက် မွန်းလွဲ ၂ နာရီခွဲခန့်က လေးမျက်နှာမြို့နယ်၊ သခွက်ချောင်းကျေးရွာအုပ်စု၊ မြစ်ကျိုးကျေးရွာရှိ အမြင့် ၁၈ ပေရှိသော ငဝန်မြစ်ရေကာတာ၏ တာမိုင်အမှတ် (၂၅/၃) ၌ သဲဗွက်ဖြစ်ပေါ်ကာ တာနိမ့်ဆင်းမှု စတင်ဖြစ်ပွားခဲ့ခြင်းဖြစ်သည်။
ယင်းနောက် မီးသတ်တပ်ဖွဲ့ဝင်များနှင့် သက်ဆိုင်ရာ အဖွဲ့အစည်းများ ပူးပေါင်း၍ တုတ်ရိုက်ခြင်း၊ ကျောက်ချခြင်း၊ သဲမြေဖို့ခြင်းနှင့် သဲအိတ်စီခြင်းတို့ဖြင့် အရေးပေါ် ထိန်းသိမ်းခဲ့သော်လည်း ည ၁၀ နာရီ ၄၂ မိနစ်ခန့်တွင် အလျားပေ ၅၀ ခန့် ကျိုးပေါက်သွားခဲ့ကြောင်း မြန်မာနိုင်ငံမီးသတ်ဦးစီးဌာန၏ ထုတ်ပြန်ချက်အရ သိရသည်။
လက်ရှိတွင် ဟင်္သာတခရိုင် မီးသတ်ဦးစီးမှူး ဦးဆောင်သော အဖွဲ့များနှင့် သက်ဆိုင်ရာ ဌာနများ ပူးပေါင်း၍ ရေအမှတ်များကို စောင့်ကြည့်ခြင်း၊ တာဘောင် ပြုပြင်ခြင်းလုပ်ငန်းများကို အရှိန်အဟုန်မြှင့် ဆောင်ရွက်လျက်ရှိကြောင်း သိရသည်။