ကွပ်ဒ်ဟု လူသိများသော အင်ဒို-ပစိဖိတ်ဒေသကို အဓိကထားသည့်အဖွဲ့၏ အရှိန်အဟုန်ကိုပြည်လည်ရရှိရန် ကြိုးပမ်းသည့်အနေဖြင့် သြစတြေးလျ၊ အိန္ဒိယ၊ ဂျပန်နှင့် အမေရိကန်ပြည်ထောင်စုတို့မှ နိုင်ငံခြားရေးဝန်ကြီးများသည် အင်္ဂါနေ့တွင် နူးဒေလီ၌ တွေ့ဆုံကြမည်ဖြစ်သည်။ သမ္မတဒေါ်နယ်ထရမ့်ပ် လက်ထက်တွင် ယင်းအဖွဲ့၏ လှုပ်ရှားမှုများ နှေးကွေးသွားသည်ဟု ဝေဖန်သူများက ပြောကြားခဲ့သည်။
နိုင်ငံများ၏ ထိပ်တန်းသံတမန်များဖြစ်သည့် သြစတြေးလျမှ ပင်နီဝေါင်၊ အိန္ဒိယမှ အက်စ် ဂျေးရှန်ကာ၊ ဂျပန်မှ တိုရှီမစ်ဆု မိုတီဂီနှင့် အမေရိကန်နိုင်ငံခြားရေးဝန်ကြီး မာကို ရူဘီယိုတို့၏ တွေ့ဆုံမှုသည် ၂၀၂၄ ခုနှစ် စက်တင်ဘာလနောက်ပိုင်း တတိယအကြိမ်မြောက် တွေ့ဆုံမှုဖြစ်သည်။
အဆိုပါလေးနိုင်ငံသည် ပြီးခဲ့သည့်နှစ်က အိန္ဒိယတွင် ထိပ်သီးအစည်းအဝေးကျင်းပရန် မျှော်လင့်ထားခဲ့သော်လည်း ဝါရှင်တန်၏ အခွန်ကောက်ခံမှုနှင့် အခြားကိစ္စရပ်များနှင့် ပတ်သက်၍ ထရမ့်ပ်နှင့် အိန္ဒိယဝန်ကြီးချုပ် နာရင်ဒြာ မိုဒီတို့အကြား တင်းမာမှုများကြောင့် အကောင်အထည်မပေါ်ခဲ့ပေ။
သို့သော် တရုတ်၏ ကြီးထွားလာသော အင်အားအပေါ် ထိုနိုင်ငံများတွင် တူညီသော စိုးရိမ်မှုများရှိကြပြီး လွတ်လပ်ပြီး ပွင့်လင်းသော အင်ဒို-ပစိဖိတ်ကို ထိန်းသိမ်းရန်သည် အရေးကြီးကြောင်းကို နူးဒေလီနှင့် ဆက်ဆံရေး မြှင့်တင်ရန် ရည်ရွယ်သည့် လေးရက်ကြာခရီးစဉ်အတွက် စနေနေ့တွင် အိန္ဒိယသို့ ရောက်ရှိလာသည့် ရူဘီယိုက အလေးပေးပြောကြားခဲ့သည်။
“ကွပ်ဒ်ကို အတွေးအခေါ်တူ နိုင်ငံတွေရဲ့ ခြောက်လတစ်ကြိမ် အစည်းအဝေးတစ်ခုအဖြစ်သာ မဖြစ်စေလိုပါဘူး” ဟု ရူဘီယိုက တနင်္ဂနွေနေ့တွင် အိန္ဒိယမီဒီယာများကို ပြောကြားခဲ့သည်။ “ကျွန်တော်တို့ဟာ ကိစ္စရပ်တွေအပေါ် ဆက်လက်ပူးပေါင်းဆောင်ရွက်မယ့် ဖိုရမ်တစ်ခု ဖြစ်လာစေချင်ပါတယ်” ဟု ၎င်းက ဆိုခဲ့သည်။
အမေရိကန်ပြည်ထောင်စုအနေဖြင့် ကွဒ်သည် ရေကြောင်းလုံခြုံရေးနှင့် အရေးကြီးသည့် တွင်းထွက်သတ္ထု့များကဲ့သို့ ကိစ္စရပ်များတွင် လက်တွေ့ကျသော လုပ်ဆောင်ချက်များကို လုပ်ဆောင်စေလိုကြောင်း ရူဘီယိုက ပြောကြားခဲ့ပြီး ယခုနှစ်အနှောင်းပိုင်းတွင် ခေါင်းဆောင်များ၏ အစည်းအဝေးဖြစ်ပေါ်ရေး သံတမန်များက လုပ်ဆောင်သွားမည်ဟုလည်း ဆက်လက်ပြောကြားခဲ့သည်။
“အဲဒီရက်စွဲကိုတော့ မသိရသေးပါဘူး၊ ဒါပေမဲ့ ဒီနှစ်ထဲမှာတော့ ခေါင်းဆောင်လေးဦးစလုံး စုဝေးဖို့ရာ အချိန်တစ်ခု ချမှတ်နိုင်မယ်လို့ မျှော်လင့်ပါတယ်” ဟု ရူဘီယိုက ပြောကြားခဲ့သည်။
Ref: ရို-က်တာ