ထိုင်းနိုင်ငံတွင် လေးလအတွင်း အောက်လွှတ်တော်ကို ဖျ-က်သိမ်းကာ အောက်လွှတ်တော်တွင် အင်အားအကြီးဆုံးပါတီဖြစ်သည့် အတိုက်အခံ ပြည်သူ့ပါတီ၏ ထောက်ခံမှုဖြင့် မဟာမိတ်ပါတီများနှင့်အတူ ကြားဖြတ်အစိုးရဖွဲ့သွားရန် အသင့်ဖြစ်နေပြီဟု Bhumjaithai ပါတီက ပြောကြားလိုက်သည်။
အခြေခံဥပဒေခုံရုံးက ပေတုံတန်ရှင်နာဝပ်ထရာကို ဝန်ကြီးချုပ်ရာထူးမှ ဖယ်ရှားခဲ့ပြီးနောက် နိုင်ငံရေးအဆက်ပြတ်မှုမဖြစ်စေရန်အတွက် ၂၀၂၃ ရွေးကောက်ပွဲအနိုင်ရပါတီဖြစ်သော ပြည်သူ့ပါတီ၏ အဆိုပြုချက်ကို ထောက်ခံကြရန် Bhumjaithai ပါတီခေါင်းဆောင် အနူတင်ချန်ဗီရာကူလ်က သောကြာနေ့တွင် စတင်စည်းရုံးနေပြီဖြစ်သည်။
၎င်း၏ ညွန့်ပေါင်းအဖွဲ့တွင် ပြည်သူ့ပါတီမှ အမတ်များအပြင် လုံလောက်သော အမတ်အရေအတွက် ရရှိထားပြီဟု သောကြာနေ့ညပိုင်းက ပါတီရုံးချုပ်တွင် ပြုလုပ်သော သတင်းစာရှင်းလင်းပွဲ၌ အနူတင်က ပြောကြားခဲ့သည်။ ဝန်ကြီးချုပ်နေရာအတွက်လည်းသူ အသင့်ဖြစ်နေပြီဟု သူက ပြောကြားခဲ့သည်။
ယခုနှစ်ကုန်တွင် အောက်လွှတ်တော်ကို ဖျ-က်သိမ်း၍ ဖွဲ့စည်းပုံအခြေခံဥပဒေသစ်ရေးဆွဲရေး ဆန္ဒခံယူပွဲကျင်းပမည့် အခြေအနေအရ အစိုးရသစ်ဖွဲ့စည်းရေးကို ထောက်ခံသွားမည်ဟု ပြည်သူ့ပါတီက ထုတ်ဖော်ပြောကြားထားသည်။
ပြည်သူ့ပါတီသည် အတိုက်အခံအဖြစ်ရပ်တည်နေပြီး အစိုးရအဖွဲ့သစ်ကို အပြည့်အ၀ စိစစ်နေကာ အစိုးရအဖွဲ့တွင် ပြည်သူ့ပါတီက ဝန်ကြီးတစ်နေရာမျှ ယူမည်မဟုတ်ဟု ပါတီက ပြောကြားခဲ့သည်။
ဝန်ကြီးချုပ်အသစ်ကို လာမည့်ရက်ပိုင်းအတွင်း ရွေးချယ်သွားမည်ဟု မျှော်လင့်ရပြီး အောက်လွှတ်တော်ရှိ အမတ်ထက်ဝက် သို့မဟုတ် အမတ်ဦးရေ ၄၉၂ ဦးတွင် ၂၄၇ ဦး၏ ထောက်ခံချက် ရရှိရမည်ဖြစ်သည်။ Bhumjaithai ဦးဆောင်သော မဟာမိတ်အဖွဲ့က မစ္စတာအနူတင်ကို ဝန်ကြီးချုပ်ကိုယ်စားလှယ်လောင်းအဖြစ် အမည်စာရင်းတင်မည်ဖြစ်သည်။
အောက်လွှတ်တော်တွင် Bhumjaithai ပါတီက အမတ် ၆၉ ဦးနှင့် ပြည်သူ့ပါတီက ၁၄၃ ဦး စုစုပေါင်း ၂၁၂ ဦးရှိနေသည်။ ၎င်းတို့အနေဖြင့် အာဏာဆက်ထိန်းထားရန် ကြိုးပမ်းနေသည့် ဖြူထိုင်းပါတီကို အနားပေးရန်အတွက် နောက်ထပ် ၃၅ မဲလိုအပ်မည်ဖြစ်သည်။ လက်ရှိ ညွန့်ပေါင်းအဖွဲ့သည် စည်းလုံးနေဆဲဟု ဖြူထိုင်းက ဆိုထားသော်လည်း အမတ်ဦးရေ ၂၅ ဦးရှိ Klatham ပါတီကဲ့သို့ ဘက်ယိမ်းသွားနိုင်သော အမတ်အချို့၏ ထောက်ခံမှုရနိုင်ကြောင်း သိရသည်။
Ref: ဘန်ကောက်ပို့စ်