ကျောင်းသုံးပြဋ္ဌာန်းစာအုပ် ပြတ်လပ်မှုနှင့်ပတ်သက်၍ ထိုင်းလွှတ်တော်အမတ် သတိပေး၊ စုံစမ်းစစ်ဆေးမှု စတင်

ဘန်ကောက်၊ ဇွန် ၁၆

ထိုင်းနိုင်ငံတစ်ဝန်းရှိ စာသင်ကျောင်းများတွင် ကျောင်းသုံးပြဋ္ဌာန်းစာအုပ်များ ပြတ်လပ်နေမှုနှင့် ပတ်သက်၍ အထက်လွှတ်တော်အမတ် ဒေါက်တာ ပရမ်ဆပ် ပီယာယူရာက စိုးရိမ်ပူပန်ကြောင်း ထုတ်ဖော်ပြောကြားခဲ့ပြီး ဘတ် ၁.၄ ဘီလီယံတန်ဖိုးရှိ စာအုပ်ရိုက်နှိပ်ရေးစီမံကိန်းတွင် မသမာမှုများ ရှိနိုင်ကြောင်း စွပ်စွဲပြောဆိုခဲ့သဖြင့် ပညာရေးဝန်ကြီးဌာနက စုံစမ်းစစ်ဆေးမှုများ စတင်ဆောင်ရွက်နေကြောင်း သိရသည်။

ဇွန်လ ၁၆ ရက်က ပြုလုပ်သည့် အထက်လွှတ်တော်အစည်းအဝေးတွင် ဒေါက်တာ ပရမ်ဆပ်က ၂၀၂၆ ပညာသင်နှစ်အတွက် ကျောင်းသုံးစာအုပ်များ အချိန်မီမရရှိသည့် ပြဿနာနှင့်ပတ်သက်၍ ပညာရေးဝန်ကြီး ပရာဆတ် ဂျန်တာရာရွန်တွန်အား မေးမြန်းခဲ့သည်။

၎င်း၏ ပြောကြားချက်အရ မေလ ၁၅ ရက်တွင် ကျောင်းများ ဖွင့်လှစ်ခဲ့ပြီးဖြစ်သော်လည်း နိုင်ငံတစ်ဝန်းရှိ စာသင်ကျောင်းပေါင်း ၂,၀၀၀ ကျော်မှာ ယနေ့အချိန်အထိ ကျောင်းသုံးစာအုပ်များ အပြည့်အဝ မရရှိသေးကြောင်း သိရသည်။

“ကျောင်းသုံးစာအုပ်တွေကို ဇွန်လ ၃ ရက် နောက်ဆုံးထား ပေးပို့ရမှာဖြစ်ပေမဲ့ ကျောင်းသားအများအပြား စာအုပ်မရသေးသလို ဆရာ၊ ဆရာမတွေမှာလည်း သင်ကြားရေးအထောက်အကူပြုပစ္စည်းတွေ မလုံလောက်သေးပါဘူး” ဟု ၎င်းက ပြောကြားခဲ့သည်။

ထို့ပြင် စာအုပ်ဝယ်ယူရေးနှင့် ထုတ်လုပ်ရေးလုပ်ငန်းစဉ်များတွင် ပွင့်လင်းမြင်သာမှု မရှိကြောင်းနှင့် တင်ဒါခေါ်ယူမှုလုပ်ငန်းစဉ်၌ မသမာမှုများ ရှိခဲ့သည်ဟု ယူဆရသည့် အထောက်အထားများ တွေ့ရှိထားကြောင်းလည်း စွပ်စွဲပြောကြားခဲ့သည်။

တစ်ဖက်တွင် ပညာရေးဝန်ကြီး ပရာဆတ်က အဆိုပါစီမံကိန်းကို မတ်လ ၂၇ ရက်တွင် ဘတ် ၁.၄ ဘီလီယံ အသုံးစရိတ်ဖြင့် အတည်ပြုခဲ့ကြောင်း ပြောကြားခဲ့ပြီး ကျောင်းသုံးစာအုပ်များကို အဓိကဖြန့်ချိသူ ၁၁ ဦးထံ ပေးပို့ထားပြီးဖြစ်သော်လည်း စာသင်ကျောင်းများထံ ဆက်လက်ဖြန့်ဝေရာတွင် ကြန့်ကြာမှုများ ဖြစ်ပေါ်နေကြောင်း ဝန်ခံခဲ့သည်။

ပညာရေးဝန်ကြီးဌာနအနေဖြင့် စာအုပ်ပေးပို့မှု ကြန့်ကြာရသည့် အကြောင်းရင်းများနှင့် ဝယ်ယူရေးလုပ်ငန်းစဉ်ဆိုင်ရာ စွပ်စွဲချက်များကို အပြည့်အဝ စုံစမ်းစစ်ဆေးသွားမည်ဖြစ်ကြောင်းနှင့် မည်သူမျှ ဥပဒေအထက်တွင် မရှိစေရဟု အလေးအနက် ပြောကြားခဲ့သည်။

Ref: Bangkok Post