ရှမ်းပြည်နယ်၊ ကျောက်မဲမြို့အား တပ်မတော်မှပြန် လည်ထိန်းချုပ်သိမ်းပိုက်ခဲ့ပြီးနောက် ပြန်လည်ဝင်ရောက်လာသူများအား လူဝင်မှုကြီးကြပ်ရေးနှင့်ပြည်သူ့အင်အားဦးစီးဌာနမှ သန်းခေါင်စာရင်းတိုက်ဆိုင်စစ်ဆေးခြင်းနှင့် မှတ်ပုံတင်ပြုလုပ်ပေးခြင်းတို့ကို ဆောင်ရွက်ပေးလျက်ရှိသည်။
ယနေ့ အောက်တိုဘာ ၁၀ ရက်တွင်လည်း ကျောက်မဲမြို့ရှိ အမှတ်(၁) အခြေခံပညာအထက်တန်း ကျောင်း၌ ကျောင်းသား/ကျောင်းသူ(၇၅၆)ဦး ထပ်မံကျောင်းအပ်ခဲ့သဖြင့် အောက်တိုဘာ ၈ ရက်မှ ယနေ့အထိ ကျောင်းသား၊ ကျောင်းသူ(၁,၉၇၇)ဦး ကျောင်းတက်လျက်ရှိကာ ထပ်မံကျောင်းအပ်သည့် ကျောင်း သား/ကျောင်းသူများအား ပညာရေးဝန်ကြီးဌာနမှ ကျောင်းသုံးစာအုပ်များ၊ စာရေးကိရိယာများနှင့် ထောက်ပံ့ပစ္စည်းများကို အခမဲ့ထောက်ပံ့ပေးခဲ့သည်။
ထို့ပြင် ကျန်းမာရေးဝန်ကြီးဌာနနှင့် တပ်မတော်မှဆရာဝန်များ၊ သူနာပြုများပူးပေါင်း၍ ကျောက်မဲမြို့ရှိ လာဘမုနိတရုတ်ဘုံကျောင်း၌ ယာယီဆေးရုံဖွင့်လှစ်ကာ ဆေးကုသပေးလျက်ရှိရာ ယနေ့တွင် ပြင်ပလူနာ (၁၀၅)ဦးနှင့် ဆေးရုံတက်ရောက်ကုသရန်လိုအပ်သော လူနာ(၆)ဦးတို့ကို လိုအပ်သည့်ကျန်းမာရေးစောင့် ရှောက်မှုလုပ်ငန်းများဆောင်ရွက်ပေးခဲ့ကြသည်။
လုံခြုံရေးအဖွဲ့ဝင်များမှလည်း ကျောက်မဲမြို့ပေါ်ရှိ ဌာနဆိုင်ရာရုံးများနှင့် အများပြည်သူသွားလာနေထိုင်လျက်ရှိသည့်နေရာများတွင် မိုင်းရှင်းလင်းရေးလုပ်ငန်းများကိုဆောင်ရွက်ပေးလျက်ရှိနေသည်။