ရန်ကုန်၊ ဇူလိုင် ၂၆
ဆေးရုံ၊ ဆေးခန်းများနှင့် ပြည်သူလူထုအတွင်း သားဖွားမီးယပ်အရေးပေါ်အခြေအနေများ၌ လျင်မြန်တိကျသော ဆုံးဖြတ်ချက်များ ချမှတ်နိုင်ရေးအတွက် ရည်ရွယ်သည့် အွန်လိုင်း Webinar ကို ဇူလိုင် ၃၀ ရက်တွင် ကျင်းပသွားမည်ဖြစ်ကြောင်း မြန်မာနိုင်ငံသူနာပြုနှင့် သားဖွားကောင်စီမှ သိရသည်။
အဆိုပါ “Decision-Making on Obstetric Emergencies for Nurses and Midwives in Clinical Settings” အွန်လိုင်း Live Webinar ကို မြန်မာနိုင်ငံသူနာပြုနှင့် သားဖွားကောင်စီမှ ဦးစီး၍ ဇူလိုင် ၃၀ ရက် မွန်းလွဲ ၁ နာရီတွင် Z-waka Application နှင့် Zoom Platform တို့မှတစ်ဆင့် တိုက်ရိုက်ထုတ်လွှင့် ကျင်းပသွားမည်ဖြစ်ကြောင်း သိရသည်။
အဆိုပါ Webinar တွင် မြန်မာနိုင်ငံသူနာပြုနှင့် သားဖွားကောင်စီဥက္ကဋ္ဌ ဒေါ်နွဲ့နွဲ့ခင်က အန္တရာယ်မြင့်ကိုယ်ဝန်ဆောင်များကို ရပ်ရွာအဆင့်တွင် စောစီးစွာသတ်မှတ်ခြင်း၊ မွေးဖွားရေးအစီအစဉ်ရေးဆွဲခြင်းနှင့် လွှဲပြောင်းကုသရန် ဆုံးဖြတ်ချက်ချခြင်းဆိုင်ရာ အကြောင်းအရာများကိုလည်းကောင်း၊ ရန်ကုန်ဗဟိုအမျိုးသမီးဆေးရုံကြီးမှ သူနာပြုဆရာမကြီး ဒေါ်ပန်းအိခိုင်က Pre-eclampsia နှင့် Eclampsia လူနာများ၏ ရောဂါပြင်းထန်မှု အကဲဖြတ်ခြင်း၊ သူနာပြုစောင့်ရှောက်မှုနှင့် Case-Based Clinical Decision-Making ဆိုင်ရာ အတွေ့အကြုံများကိုလည်းကောင်း၊ အထက်တန်းသူနာပြု ဒေါ်ဆွေစိုးမာက Placenta Previa လူနာများ၏ အကဲဖြတ်ခြင်းနှင့် ဆေးရုံအတွင်း သူနာပြုစီမံခန့်ခွဲမှုဆိုင်ရာ အကြောင်းအရာများကိုလည်းကောင်း အသီးသီး ဆွေးနွေးပို့ချပေးသွားမည် ဖြစ်သည်။
တက်ရောက်လိုသူများအနေဖြင့် Z-waka Application မှတစ်ဆင့်ဖြစ်စေ၊ Zoom QR Code၊ Zoom ID နှင့် Passcode သို့မဟုတ် Zoom Link ကို အသုံးပြု၍ဖြစ်စေ ကြိုတင်စာရင်းသွင်း တက်ရောက်နိုင်ပြီး CPD (3) Points ရယူလိုပါက KBZPay မှတစ်ဆင့် ငွေကျပ် ၃,၀၀၀ ပေးသွင်းကာ ငွေလွှဲပြေစာကို သတ်မှတ်ထားသည့် ဖုန်းနံပါတ်သို့ ပေးပို့ရမည်ဖြစ်ကြောင်းနှင့် Z-waka Application အသုံးပြုရာတွင် အခက်အခဲရှိပါက ရုံးဖုန်း ၀၉-၄၂၄၅၉၆၃၀၀ သို့ ရုံးချိန်အတွင်း ဆက်သွယ်မေးမြန်းနိုင်ကြောင်း မြန်မာနိုင်ငံသူနာပြုနှင့် သားဖွားကောင်စီက အသိပေးထုတ်ပြန်ထားသည်။