ရှမ်းပြည်နယ်၊ ကျောက်မဲမြို့နယ်၊ နောင်ပိန်တွင် ယနေ့ သြဂုတ် ၆ ရက်မွန်းလွဲပိုင်းမှစတင်ကာ မိုးသည်း ထန်စွာရွာသွန်းမှုကြောင့် “လုပ်ပါကန်”ကျိုးပေါက်ကာ ရေများစီးဆင်း၍ ရေကြီးရေလျှံမှုဖြစ်ပေါ်လျက်ရှိကြောင်း ကမ်းလင့်လက်များလူမှုကူညီရေးအသင်းထံမှ သိရသည်။
“လုပ်ပါကန်”ကျိုးပေါက်မှုကြောင့် နောင်ပိန် အမှတ် (၅)ရပ်ကွက်၊ ရွှေလမင်းဆီဆိုင်ရှေ့ကားလမ်းမကြီးပေါ်၌ရေကျော်နေစဥ် ဖြတ်သန်းမောင်းနှင်လာသော Honda Fit ကား၊ (၆)ဘီးကားနှင့် ဆိုင်ကယ်တစ်စီးတို့မှာ ရေစီးနှင့်အတူမျောပါသွားခဲ့ကြောင်း သိရသည်။
ရေစီးနှင့်အတူမျောပါစဥ် ဆိုင်ကယ်မောင်းနှင်လာသူမှာလွတ်မြောက်သွားခဲ့သော်လည်း Honda Fit ကားပေါ်တွင်လိုက်ပါလာသူ(၂)ဦးမှာမူ ကားနှင့်အတူမျောပါသွားခဲ့သဖြင့် ရှာဖွေမှုများပြုလုပ်ခဲ့ကြသော်လည်း ကားနှင့် လိုက်ပါလာသူ(၂)ဦးတို့ကို ပြန်လည်တွေ့ရှိရခြင်းမရှိသေးကြောင်း သိရသည်။
လက်ရှိအချိန်အထိ မိုးသည်းထန်စွာရွာသွန်းလျက်ရှိ၍ ရှာဖွေကယ်ဆယ်မှုများပြုလုပ်ရန် အန္တရာယ်ရှိခြင်းကြောင့် ရှာဖွေကယ်ဆယ်ရေးလုပ်ငန်းများအား ယာယီရပ်နားကာ မနက်ဖြန် သြဂုတ် ၇ ရက်ရေကျသွားချိန်မှသာ ရှာဖွေကယ်ဆယ်မှုများကို ဆက်လက်ပြုလုပ်သွားမည်ဖြစ်ကြောင်း သိရသည်။
ထို့ပြင် ရေကြီးရေလျှံမှုကြောင့် ပြောင်းဖူး/ကြံစိုက်ခင်းများစွာ ရေနစ်မြုပ်လျက်ရှိပြီး အနိမ့်ပိုင်းရပ်ကွက်ဖြစ်သော နောင်ပိန် အမှတ်(၃)ရပ်ကွက်ရှိ နေအိမ်များအတွင်းသို့လည်း ရေဝင်ရောက်မှုများဖြစ်ပေါ်လျက်ရှိကြောင်း သိရသည်။
ထို့အတူ တာဝန်ရှိသူများမှလည်း ရေကြီးရေလျှံမှုဖြစ်ပေါ်နေစဥ်အတွင်း၌ ရေကျော်နေသည့် လမ်းများပေါ်သို့ ဖြတ်သန်းသွားလာခြင်းမပြုကြရန် အသိပေးတားမြစ်ထားကြောင်း သိရသည်။