ကုလအဖွဲ့အစည်းများက ကမ္ဘာ့ နိုင်ငံများသို့ Round-5 အဖြစ် ကာကွယ်ဆေးပံ့ပိုးရာတွင် မြန်မာနိုင်ငံကိုပါ ထည့်သွင်း ပံ့ပိုးမည်

ကုလအဖွဲ့အစည်းများက ကမ္ဘာ့ နိုင်ငံများသို့ Round-5 အဖြစ် ကာကွယ်ဆေးပံ့ပိုးရာတွင် မြန်မာနိုင်ငံကိုပါ ထည့်သွင်း ပံ့ပိုးမည်

နေပြည်တော်၊အောက်တိုဘာ ၆ရက်

ကမ္ဘာ့ နိုင်ငံများသို့ ကုလအဖွဲ့အစည်းများက Round-5 အဖြစ် ကာကွယ်ဆေးပံ့ပိုးရာတွင် မြန်မာနိုင်ငံကိုပါ ထည့်သွင်းပြီး Pfizer ကာကွယ်ဆေး (၄,၀၄၈,၂၀၀) doses နှင့် Round-6 အဖြစ် Sinovac ကာကွယ်ဆေး (၂,၂၄၂,၈၀၀) doses ကို ပံ့ပိုးပေးသွားရန် ရှိနေသည်။

ပြီးခဲ့သည့် ဇူလိုင်လ ၂၈ရက်က GAVI အဖွဲ့မှ လာရောက်၍ နစက ကျန်းမာရေးဝန်ကြီးဌာနမှ တာဝန်ရှိသူ များနှင့်တွေ့ဆုံပြီး Pfizer ကာကွယ်ဆေးများ ပံ့ပိုးပေးနိုင်ရေးကိစ္စ၊ စက်တင်ဘာလအတွင်းက GAVI, WHO နှင့် UNICEF အဖွဲ့များမှ ကိုယ်စားလှယ်များအပါအဝင် ရန်ကုန်မြို့အခြေစိုက် WHO, UNICEF ရုံးမှ ကိုယ်စားလှယ်များနှင့် နစက ကျန်းမာရေးဝန်ကြီးဌာနတို့ ၄ကြိမ်ထက်မနည်း တွေ့ဆုံဆွေးနွေးအပြီး ကမ္ဘာ့ နိုင်ငံများသို့ ကုလအဖွဲ့အစည်းများက Round-5 အဖြစ် ကာကွယ်ဆေးပံ့ပိုးရာတွင် မြန်မာနိုင်ငံကိုပါ ထည့်သွင်းခဲ့ခြင်းဖြစ်သည်။

ပြီးခဲ့သည့် Round-1မှ Round-4 အထိ မြန်မာသည် ကိုဗစ်ကာကွယ်ဆေးရရေးကိစ္စတွင် ချန်လပ်ခံထားရသည်။

နစကကျန်းမာရေးဝန်ကြီးဌာန၏ ထုတ်ပြန်ချက်အရ UNICEF အဖွဲ့မှ အအေးလမ်းကြောင်း အဆင်သင့်ဖြစ်စေရေးအတွက် Ultra Cold Chain ရေခဲသေတ္တာများနှင့် ကာကွယ်ဆေးထိုးနှံရန် လိုအပ် သည့် ဆေးထိုးအပ် AD Syringe 0.5 ml များ ပံ့ပိုးပေးဖို့ ရှိနေကြောင်းလည်းသိရသည်။

မြန်မာနိုင်ငံအနေဖြင့် (NLDအစိုးရလက်ထက်) ကိုဗစ်-၁၉ ရောဂါကာကွယ်ဆေးများ ရရှိရန်အတွက် ၂၀၂၀ ပြည့်နှစ်၊ နှစ် ကုန်ပိုင်းတွင်စတင်၍ GAVI COVAX Facility နှင့် ညှိနှိုင်းခြင်း၊ ကာကွယ်ဆေးထုတ်လုပ်သည့် မိတ်ဆွေ နိုင်ငံများနှင့် နိုင်ငံအချင်းချင်း(Bilateral)ညှိနှိုင်းခြင်းများ ဆောင်ရွက်ခဲ့ပြီး အိန္ဒိယနိုင်ငံမှ ကာကွယ်ဆေး (၃၀)သန်း doses အား စာချုပ်ချုပ်ဆို၍ ဝယ်ယူခဲ့သည်။

သို့ရာတွင် COVAX Facility မှ ၎င်း၏အခြား အဖွဲ့ဝင်နိုင်ငံများသို့ Round-4 အထိ ကာကွယ်ဆေးပံ့ပိုးမှုများ ဆောင်ရွက်ခဲ့သော်လည်း မြန်မာနိုင်ငံသို့ ယနေ့အချိန်အထိ ကာကွယ်ဆေးများ ပို့ဆောင်မှုမရှိသေးဘဲ ပို့ဆောင်မည့်ကာလနှင့်ပတ်သက်၍ အကြိမ်ကြိမ်ရွေ့ဆိုင်းခဲ့ခြင်းများ ရှိခဲ့သည်။

အိန္ဒိယနိုင်ငံအနေဖြင့်လည်း ၎င်းတို့နိုင်ငံတွင် ရောဂါဖြစ်ပွားမှု အခြေအနေအရ ကာကွယ်ဆေးတင်ပို့ခြင်းကို ခေတ္တရပ်ဆိုင်းထားခဲ့ပြီး မြန်မာနိုင်ငံသို့ ကာကွယ်ဆေး လှူဒါန်းမှု(၁.၅)သန်း doses နှင့် ဝယ်ယူမှု(၂)သန်း doses စုစုပေါင်း(၃.၅)သန်း doses သာ ပို့ဆောင်ပေးခဲ့သည်။

နိုင်ငံတွင် ၂၇-၁-၂၀၂၁ ရက်နေ့မှ ၄-၁၀-၂၀၂၁ ရက်နေ့အထိ လူဦးရေစုစုပေါင်း(၈.၆၈)သန်းအား ကိုဗစ်-၁၉ ရောဂါကာကွယ်ဆေးထိုးနှံပြီးဖြစ်သည်။ ကာကွယ်ဆေးနှစ်ကြိမ်အပြည့် ထိုးနှံပြီးစီးသူ (၃.၉၂)သန်း၊ အသက်(၁၈)နှစ်နှင့်အထက် လူဦးရေ၏ (၁၀.၆၃)ရာခိုင်နှုန်းခန့်ကို အကြိမ်ပြည့်ထိုးနှံပေးပြီးဖြစ်သည်ဟု ကျန်းမာရေးဝန်ကြီးဌာနက သတင်းထုတ်ပြန်ထားသည်။