ဂျပန်ဝန်ကြီးချုပ်ဟောင်း ဖူမီယို ကီရှီဒါကို ၂၀၂၃ ခုနှစ် မဲဆွယ်စည်းရုံးရေး အခမ်းအနားတွင် လက်လုပ် ပိုက်ဗုံးဖြင့် ပစ်ခဲ့သူ အမျိုးသားကို တရားရုံးက ထောင်ဒဏ် ၁၀ နှစ် ချမှတ်လိုက်သည်။
ဝါခါယားမာ ခရိုင်တရားရုံးက ဗုဒ္ဓဟူးနေ့တွင် ချမှတ်သော စီရင်ချက်အရ အသက် ၂၅ နှစ်အရွယ်ရှိ ယူဂျီ ကီမုရာ က ၎င်း၏တိုက်ခိုက်မှုသည်ပြင်းထန်ပြီး သေဆုံးနိုင်သည့်အလားအလာရှိသည်ဟု ဂျပန်ကျိုဒိုသတင်း အေဂျင်စီက ဖော်ပြခဲ့သည်။ အဆိုပါ တိုက်ခိုက်မှုသည် ဒီမိုကရေစီအတွက် ပြင်းထန်သော စိန်ခေါ်မှုတစ်ခုဖြစ်ပြီး လူများစွာအတွက် ကြီးမားသော အန္တရာယ်ရှိသည်ဟု တရားရုံးက ပြောကြားခဲ့သည်။
ကီမုရာ သည် ၂၀၂၃ ခုနှစ် ဧပြီလ ၁၅ ရက်နေ့တွင်အနောက်ပိုင်းမြို့ ဝါခါယားမာ ရှိ ငါးဖမ်းဆိပ်ကမ်းငယ်လေးတွင် ကီရှီဒါ ကို သတ်ဖြတ်ရန် ကြိုးပမ်းမှုတွင် အပြစ်ရှိကြောင်း တွေ့ရှိခဲ့သည်။ သူသည် ဖောက်ခွဲရေးပစ္စည်းများနှင့် အခြားလက်နက်များဆိုင်ရာ ဥပဒေချိုးဖောက်မှု အပါအဝင် အခြားပြစ်မှု လေးခုနှင့်လည်း တရားစွဲဆိုခံခဲ့ရသည်။
ကီရှီဒါ သည် ၂၀၂၂ ခုနှစ် ဇူလိုင်လတွင် ဝန်ကြီးချုပ်ဟောင်း ရှင်းဇိုအာဘေး လုပ်ကြံသတ်ဖြတ်ခံရပြီးနောက် တစ်နှစ်မပြည့်မီအချိန်၌ တိုက်ခိုက်ခံရခြင်းဖြစ်သော်လည်း ထိခိုက်ဒဏ်ရာရရှိခဲ့ခြင်း မရှိပေ။
“ယခုလိုဖြစ်ရပ်များလုပ်ဆောင်ရန် ကြိုးစားနေသူများကို တားဆီးဖို့ ပြင်းထန်တဲ့ ပြစ်ဒဏ်ပေးဖို့ လိုပါတယ်၊၊ သူက ဒီမိုကရေစီရဲ့ အခြေခံဖြစ်တဲ့ ရွေးကောက်ပွဲစနစ်ကို ပြင်းပြင်းထန်ထန် နှောင့်ယှက်ခဲ့တာဖြစ်လို့ လျှော့တွက်လို့မရပါဘူး” ဟု တရားသူကြီး ခေကို ဖုခရှီမာ က NHK တွင် ပြောဆိုခဲ့သည်။
ဖေဖော်ဝါရီ လဆန်းပိုင်း ရုံးချိန်းတွင် ကီမုရာ က ကီရှီဒါ ကိုသတ်ရန် ရည်ရွယ်ချက်မရှိဟု ပြောဆိုကာ လူသတ်မှုအတွက် အပြစ်မရှိကြောင်းထွက်ဆိုခဲ့သည်။ ဂျပန်နိုင်ငံ၏ ရွေးကောက်ပွဲစနစ်အပေါ် မကျေမနပ်ဖြစ်ပြီး နာမည်ကျော် နိုင်ငံရေးသမားတစ်ဦးကို ပစ်မှတ်ထားကာ တိုက်ခိုက်ခြင်းဖြင့် လူအများ၏ အာရုံစိုက်မှုကို ရယူလိုခြင်းဖြစ်ကြောင်း ၎င်းက ပြောကြားခဲ့သည်။
ကီရှီဒါ ကိုသတ်ရန် ကြံရွယ်ထားခြင်းမရှိသောကြောင့် ကီမုရာ ၏ တရားခံေရှေနအဖွဲ့သည် သုံးနှစ်ကြာ ခုံခံ လျှေက်လဲခဲ့သော်လည်း အစိုးရရှေ့နေများက ထောင်ဒဏ် ၁၅ နှစ် ချမှတ်ရန် ကြိုးပမ်းခဲ့ကြောင်း သတင်းများက ဆိုသည်။
တရားခွင်အတွင်း ကြားနာမှုများတွင် ကီမုရာ ၏ရှေ့နေများက ၎င်း၏ “ရည်ရွယ်ချက်မှာ လူအများ၏အာရုံစိုက်မှုကို ရရှိစေရန်ဖြစ်သည်” ၊ ထို့ကြောင့် သူ၏စွဲချက်မှာ လူသတ်မှုကို ကျူးလွန်ရန် ကြိုးပမ်းခြင်းမဟုတ်ဘဲ “ဒဏ်ရာရစေခြင်း” ဖြစ်သင့်သည်ဟု NHK ကို ပြောကြားခဲ့သည်။
သို့သော်လည်း အစိုးရရှေ့နေများက အဆိုပါဖြစ်ရပ်ကို “အန္တရာယ်ရှိသော အကြမ်းဖက်လုပ်ရပ်” ဟုခေါ်ပြီး တိုက်ခိုက်သူ၏ဖောက်ခွဲရေးပစ္စည်းသည် လူကိုသေစေနိုင်သည်ဟု ဆိုခဲ့ကြသည်။
ဂျပန်နိုင်ငံတွင် တင်းကျပ်သော လက်နက်ကိုင်ဆောင်မှုထိန်းချုပ်ရေးဥပဒေများကြောင့် သေနတ်နှင့် ပတ်သက်သည့် ရာဇ၀တ်မှုမှာ ဖြစ်ခဲသော်လည်း လက်လုပ်သေနတ်များနှင့် ဖောက်ခွဲရေးပစ္စည်းများအသုံးပြုသောပြစ်မှုများ၊ ဓားဖြင့် တိုက်ခိုက်မှုများနှင့် အခြားတိုက်ခိုက်မှုများ အစရှိသည်တို့ကို မကြာခဏတွေ့ရတတ်သည်။
Ref: အယ်လ်ဂျာဇီယား