ကာကွယ်ရေးဆွေးနွေးရန်ရုရှားအရာရှိအင်ဒိုနှင့် မလေးသို့ သွားရောက်

ရုရှားသမ္မတ ဗလာဒီမာ ပူတင်၏ ရောင်ရင်းတစ်ဦးဖြစ်သော ရုရှားလုံခြုံရေးကောင်စီ အတွင်းရေးမှူး ဆာဂျီရှိုဂူသည် လုံခြုံရေးနှင့် ကာကွယ်ရေးဆိုင်ရာ ကိစ္စရပ်များကို ဆွေးနွေးရန် တနင်္လာနေ့တွင် အင်ဒိုနီးရှားနှင့် မလေးရှားနိုင်ငံများသို့ အလုပ်သဘောခရီးသွားရောက်ခဲ့သည်ဟု ရုရှားသတင်းဌာနများက ဖော်ပြသည်။

ခရီးစဉ်သည် ဖေဖော်ဝါရီ ၂၈ ရက်အထိ ကြာမြင့်မည်ဖြစ်ကြောင်း လုံခြုံရေးကောင်စီ၏ သတင်းထုတ်ပြန်ရေးရုံးကို ကိုးကား၍ အစိုးရပိုင် RIA သတင်းဌာနက ဆိုသည်။

ခရီးစဉ်အတွင်း လုံခြုံရေးနှင့် ကာကွယ်ရေးအပါအဝင် နှစ်နိုင်ငံ ဆက်ဆံရေးဆိုင်ရာ လက်ရှိအခြေအနေများနှင့် အခြားနယ်ပယ်များတွင် အပြန်အလှန် အကျိုးတူ ပူးပေါင်းဆောင်ရွက်မှု ဖွံ့ဖြိုးတိုးတက်ရေးကိစ္စရပ်များကို ဆွေးနွေးသွားရန် စီစဉ်ထားသည်ဟု RIA က ဆက်လက်ဖော်ပြခဲ့သည်။

၂၀၂၂ ခုနှစ် ဖေဖော်ဝါရီလတွင် ရုရှားက ယူကရိန်းကို စတင် ကျူးကျော်ခဲ့ပြီးနောက် မော်စကိုအပေါ် ကိဗ်နှင့် အနောက်မဟာမိတ်များ၏ ဒဏ်ခတ်အရေးယူမှုများကြောင့် ပူတင်၏ ပထဝီဝင်နိုင်ငံရေး အကျိုးစီးပွားများကို အာရှဆီသို့ ကူးပြောင်းသွားစေခဲ့ပြီး ဒေသတွင်းနှင့် ဆက်ဆံရေး မြှင့်တင်မှုများကို တိုးမြှင့်လုပ်‌ဆောင်လာခဲ့သည်။

ကမ္ဘာ့စီးပွားရေးထွက်ကုန် ၃၅ ရာခိုင်နှုန်းကို ပိုင်ဆိုင်သည့် စီးပွားရေးထွန်းသစ်စနိုင်ငံများအုပ်စု BRICS အဖွဲ့ကို ဝင်ရောက်လိုကြောင်း အင်ဒိုနီးရှားက အောက်တိုဘာလတွင် ထုတ်ဖော်ပြောဆိုထားသည်။ ယင်းအဖွဲ့ကို အနောက်အုပ်စုကို တန်ပြန်သည့် အဖွဲ့အစည်းတစ်ခုဖြစ်လာရန် ရုရှားက တွန်းအားပေးနေသည်။

မလေးရှားဝန်ကြီးချုပ် အန်ဝါ အီဘရာဟင်သည် ၂၀၂၄ ခုနှစ် စက်တင်ဘာလတွင် စီးပွားရေးဖိုရမ်တစ်ခုသို့ တက်ရောက်ရန်အတွက် ရုရှားနိုင်ငံသို့ သွားရောက်ခဲ့ပြီး ယင်းတွင် ပူတင်နှင့် ဆွေးနွေးပြောဆိုခဲ့သည်။

Ref: စီအင်န်အေ