ပြည်ပသို့ အလုပ်သမားစေလွှတ်ရာတွင် ကဏ္ဍအလိုက် ဒဏ်ကြေးပေးဆောင်ခြင်းမရှိသည့် အေဂျင်စီအချို့ အလုပ်ခေါ်စာအသစ်တင်ခွင့် ဆိုင်းငံ့ထားမည်ဖြစ်ကြောင်း အလုပ်သမားဝန်ကြီးဌာနမှ အသိပေးထုတ်ပြန်ထားသည်။
ပြီးခဲ့သည့် ၂၀၂၄ -၂၀၂၅ ဘဏ္ဍာနှစ်အတွက် အခွန်မဆောင်ခြင်း၊ ဒဏ်ကြေးပေးရန်ပျက်ကွက်ခြင်းတို့ကြောင့် အလုပ်ခေါ်စာအသစ်တင်ခွင့်ဆိုင်းငံ့ထားခြင်းဖြစ်ပြီး အရေးယူခံရသည့် အေဂျင်စီပေါင်း (၆၀) နီးပါးရှိကြောင်း ထုတ်ပြန်ထားသည့် စာရင်းအရ သိရသည်။
အဆိုပါ အေဂျင်စီများအနေဖြင့် သတ်မှတ်ရက်အတွင်း ဒဏ်ကြေးမပေးဆောင်ပါက လစဉ်ကျပ်တစ်သိန်းနှုန်းတိုးမြှင့်ပေးဆောင်ရမည်ဖြစ်သလို ယင်းကာလအတွင်း အလုပ်ခေါ်စာအသစ်တင်ခွင့် ဆိုင်းငံ့ထားမည်ဖြစ်ကြောင်း သိရသည်။
ပြည်ပအလုပ်အကိုင်အေဂျင်စီများအနေဖြင့် အလုပ်သမားစေလွှတ်မှု လချုပ်စာရင်းပေးပို့ခြင်း၊ မိသားစုလွှဲပို့ငွေစာရင်း တင်ပြရန် အလုပ်သမားဝန်ကြီးဌာနမှ အသိပေးထုတ်ပြန်ထားပြီးဖြစ်သည်။
လက်ရှိတွင် ပြည်ပအလုပ်အကိုင်အေဂျင်စီ (၆၀၀) ကျော်ကို အကျိုးဆောင်လိုင်စင်ထုတ်ပေးထားကြောင်း သိရသည်။