လာမည့် ဧပြီ ၃၀ ရက်တွင်ကျရောက်မည့် ကဆုန်လပြည့် (ဗုဒ္ဓနေ့) ဆိုင်ရာ မဟာမင်္ဂလာအခမ်းအနား (၅) မျိုးကို မာရဝိဇယဗုဒ္ဓဥယျာဉ်တော်နှင့် ဥပ္ပါတသန္တိစေတီတော်တို့တွင် နိုင်ငံတော်အဆင့်ဖြင့်ကျင်းပမည်ဖြစ်ကြောင်း သိရသည်။
မာရဝိဇယဗုဒ္ဓဥယျာဉ်တော်၌ ကြွရောက်တော်မူလာကြမည့် ဆရာတော်၊ သံဃာတော်များအား လှူဖွယ်ပစ္စည်းနှင့် နေ့ဆွမ်းဆက်ကပ်လှူဒါန်းပွဲ၊ စာတမ်းဖတ်ပွဲ၊ ကဆုန်ညောင်ရေသွန်းလောင်းပွဲ၊ ဆီမီးတိုင်များကိုင်ဆောင်လှည့်လည်ပူဇော်ပွဲ၊ ဓမ္မသဘင်တို့ကို နိုင်ငံတော်အဆင့် အခမ်းအနားများအဖြစ်ကျင်းပသွားမည်ဖြစ်ကြောင်း သိရသည်။
အဆိုပါ အခမ်းအနားများအောင်မြင်စွာကျင်းပနိုင်ရေးအတွက် ကဆုန်လပြည့်ဗုဒ္ဓနေ့ဆိုင်ရာ မဟာမင်္ဂလာအခမ်းအနားများကျင်းပရေးဦးစီးကော်မတီ၏ လုပ်ငန်းညှိနှိုင်းအား သာသနာရေးဝန်ကြီးဌာန ပြည်ထောင်စုဝန်ကြီးဦးတင်ဦးလွင် ဦးဆောင်၍ ဧပြီ ၂၃ ရက်ကကျင်းပခဲ့သည်။